អតីតយោធិនពិការជើងម្ខាងត្រូវមន្ត្រីនគរបាលទួលទំពូងទី២វាយគាត់ បែកក្បាលហូរឈាមស្រោចពេញខ្លួន
29-July-2016 | ដោយ មែន កំសត់
រាជធានីភ្នំពេញ ៖ អតីតយោធិនពិការជើងម្ខាងដោយសារគ្រាប់មីនក្នុងសម័យសង្គ្រាមម្នាក់ បាននាំប្រពន្ធ និងកូន មកពាក្យបណ្តឹងនៅអធិការដ្ឋាននគរបាលខណ្ឌចំការមន កាលពីព្រឹកថ្ងៃទី២៩ ខែកក្កដា ឆ្នាំ២០១៦ បន្ទាប់ពីបានដាក់ពាក្យបណ្តឹងនៅប៉ុស្តិ៍នគរបាលទួលទំពូងទី២ហើយ គ្មានអ្នកណាម្នាក់អើពើ ដោយចោទប្រកាន់មន្ត្រីនគរបាលទួលទំពូងទី២ម្នាក់ថាបានវាយគាត់ បែកក្បាលហូរឈាមស្រោចពេញខ្លួន និងដេរជាច្រើនថ្នេរ ។
លោក ស៊ីថា ករុណា ជាជនរងគ្រោះ បានរៀបរាប់ប្រាប់ឱ្យដឹងថា រូបគាត់មានអាយុ៤៨ឆ្នាំ មានប្រពន្ធ និងកូនម្នាក់ ស្នាក់នៅផ្ទះជួលនៅម្តុំខាងក្រោយរោងចក្រដែកគោល ក្នុងសង្កាត់បឹងទំពុន ខណ្ឌមានជ័យ ជាអតីតយោធិនពិកាជើងខាងឆ្វេងម្ខាង ដោយសារតែគ្រាប់មីនក្នុងសម័យសង្គ្រាម ដោយធ្លាប់បម្រើការងារនៅក្នុងអង្គភាពវរៈសេនាតូចការពារអង្គរ ក្នុងខេត្តសៀមរាប ។
លោកបន្តទៀតថា កាលពីវេលាម៉ោង៨ និង១៥នាទីព្រឹក ថ្ងៃទី២៨កក្កដាម្សិលមិញ ដោយក្នុងអាការៈស្រវឹងស្រាយ៉ាងខ្លាំងនោះ រូបគាត់ក៏បានដើរចេញពីផ្ទះឡើងមកលើផ្លូវត្រង់ចំណុចផ្លូវលេខ២៧១ កែងផ្លូវលេខ៤៣០ ក្នុងសង្កាត់ទួលទំពូងទី២ ខណ្ឌចំការមន ធ្វើការអំពាវនាវទៅដល់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីសុំការជួយសង្គ្រោះដល់ក្រុមគ្រួសាររបស់គាត់ដែលកំពុងរងនូវ ការខ្វះខាតក្នុងគ្រួសារ ។ ខណៈពេលដែលរូបគាត់កំពុងធ្វើការស្រែករកការជួយសង្គ្រោះនៅតាមផ្លូវ សារធារណៈនោះ ក៏ស្រាប់តែមានមនន្ត្រីនគរបាលប៉ុស្តិ៍ទួលទំពូងទី២ម្នាក់ បានដេញរូបគាត់ឲ្យដើរចេញឆ្ងាយពីទីនោះ ព្រោះមានការកកស្ទះចរាចរណ៍ ។ ពេលដែលមានការបណ្តេញពីមន្ត្រីនគរបាលរូបនោះ ដោយក្នុងសភាពស្រវឹងស្រាជោគជាំ រូបគាត់មិនបានដើរចេញទៅតាមការប្រាប់របស់ក្រុមមន្ត្រីនគរបាលឡើយ ហើយជំនះនៅឈរដដែល ទើបបង្កឲ្យមានការជជែកតឹងសសៃកដាក់គ្នា ក៏ត្រូវមន្ត្រីនគរបាលរូបនោះប្រើអាយឌី១គ្រឿងដែលកាន់ជាប់នឹងដៃ វាយទៅលើក្បាលរបស់គាត់បណ្តាលឲ្យបែកលើចិញ្ចើមខាងស្តាំហូរឈាម ស្រោចពេញខ្លួនតែម្តង ។ ពេលដែលរូបគាត់ត្រូវមន្ត្រីនគរបាលប៉ុស្តិ៍ទួលទំពូងទី២វាយក្បាល គាត់បែកចេញឈាមហើយ គាត់ក៏ត្រូវនគរបាលម្នាក់ដែលអះអាងថា ជាមេរបស់ជនដៃដល់នោះនាំទៅព្យាបាលនៅក្នុងគ្លីនិកឯកជនមួយកន្លែង ក្បែរកន្លែងកើតហេតុ រួចហើយក្នុងថ្ងៃដដែលរូបគាត់ក៏បានទៅដាក់ពាក្យបណ្តឹងនៅនគរបាល ប៉ុស្តិ៍ទួលទំពូងទី២ តែមិនមានដំណោះស្រាយឡើយ ទើបក្នុងថ្ងៃនេះ គាត់ ប្រពន្ធ និងកូន យកពាក្យបណ្តឹងមកដាក់នៅអធិការនគរបាលខណ្ឌចំការមនជាថ្មីម្តងទៀត ។
ពាក់ព័ន្ធទៅនឹងករណីមន្ត្រីនគរបាលប៉ុស្តិ៍ទួលទំពូងទី២ប្រើ អំពើហិង្សាទៅលើអតីតយោធិនពិការនេះដែរ លោក យិន សាន្ត អធិការនគរបាលខណ្ឌចំការមន បានប្រាប់អ្នកយកព័ត៌មានតាមទូរស័ព្ទថា លោកមិនបានដឹងទេ អំពីបញ្ហានេះ ដោយឥឡូវលោកកំពុងតែជាប់រវល់ប្រជុំនៅស្នងការនគរបាលរាជធានីភ្នំពេញ ។ ចំណែកមន្ត្រីសាលាខណ្ឌចំការមនមួយចំនួនបានលួចខ្សិបប្រាប់ថា ពិតជាមានករណីវាយបុរសពិការជើងម្នាក់បែកក្បាលមែនកាលពីម្សិលមិញ តែចំពោះដំណោះស្រាយយ៉ាងណានោះ លោកមិនបានដឹងទេ ។
ចំនួនអ្នកទស្សនា
- ថ្ងៃនេះ10031
- ម្សិលមិញ6261
- សប្តាហ៍នេះ28411
- ខែនេះ143561
- ឆ្នាំនេះ143561
- សរុប20586017