ខេត្តបន្ទាយមានជ័យ៖ កាលពីវេលាម៉ោង១១និង៣០នាទីព្រឹកថ្ងៃទី៣០ ខែកក្កដា ឆ្នាំ២០១៦ នៅលើកំណាត់ផ្លូវជាតិលេខ៥៦A ស្ថិតក្នុងភូមិសាស្ត្រឃុំរលួស ស្រុកស្វាយចេក ខេត្តបន្ទាយមានជ័យ ។

កម្លាំងនគរបាលស្រុកស្វាយចេកឃាត់ខ្លួនជនស្ស័យមានឈ្មោះ វឹក វី ភេទប្រុសអាយុ ២៤ឆ្នាំ រស់នៅភូមិថ្មីលិច ឃុំភូមិថ្មី ស្រុកថ្មពួក បានសម្រេចនៅពេលនេះ ក្រោយពីលោកអធិការនគរបាលស្រុកថ្មពួកបានរាយការណ៍តាមទូរស័ព្ទមកលោកឱ្យជួយស្ទាក់ចាប់ជនសង្ស័យរូបនេះ ដែលបានលួចម៉ូតូម៉ាកស្កបភី ពណ៌ស របស់ គ្រូបង្រៀនម្នាក់ នៅសាលាអនុវិទ្យាល័យឃុំភូមិថ្មី ខណៈដែលគ្រូបង្រៀនដាក់បញ្ឈរម៉ូតូទុកចោលមិនដកសោចេញហើយចូលក្នុងអាគារបណ្ណាល័យ។ ម្ចាស់ម៉ូតូមានឈ្មោះ ទុយ ប៊ុនទាប់ ភេទប្រុស អាយុ២៩ឆ្នាំ រស់នៅភូមិផ្សារថ្មី ឃុំគំរូ ស្រុកថ្មពួក។ ក្រោយពីទទួលព័ត៌មានពីខាងស្រុកថ្មពួកនោះហើយ លោកក៏បានដាក់ពង្រាយកម្លាំងនគរបាល តាមផ្លូវជាតិលេខ៥៦A ក្នុងភូមិសាស្ត្រ ស្រុក ស្វាយចេក ។

លុះមួយសន្ទុះក្រោយមកសមត្តកិច្ចឃើញមុខសញ្ញាជនសង្ស័យជិះម៉ូតូដែលគេលួចនោះ ឆ្លងកាត់ចំណុចត្រួតពិនិត្យកម្លាំងនគរបាល ។ សមត្ថកិច្ចក៏បានចេញស្ទាក់ហើយជិះម៉ូតូប្រដេញចាប់បាននៅពេលជនសង្ស័យព្យាយាមបើករត់គេចចូលវាលស្រែនិងចំការចំការដំឡូង។ ជនសង្ស័យនៅថ្ងៃដដែលបន្ទាប់មកត្រូវបាននគរបាលស្រុកស្វាយចេក ចាប់ប្រគល់ឱ្យនគរបាលស្រុកថ្មពួកដើម្បីយកទៅចាត់ការតាមផ្លូវច្បាប់ ៕