បិទអាជីវកម្មរ៉ែមាសខុសច្បាប់លើផ្ទៃដី១០ហិកតានៅស្រុកមេមត់
03-August-2016 | ដោយ មែន កំសត់
ត្បូងឃ្មុំ៖ មន្ត្រីនៃមន្ទីររ៉ែនិងថាមពលរួមសហការជាមួយមន្ត្រីនរគបាលនិង អាជ្ញាធរខេត្តត្បូងឃ្មុំបានចុះបិទបញ្ឈប់អាជីវកម្មរ៉ែមាសខុសច្បាប់ ដែលប្រព្រឹត្តដោយប្រជាពលរដ្ឋចំនួន ២៩ គ្រួសារ ជាមួយវត្ថុតាង លើផ្ទៃដីប្រមាណ ១០ ហិកតានៅតំបន់សំពៅលូន ឃុំជាំតាម៉ៅ ស្រុកមេមត់កាលពីរសៀលថ្ងៃទី ០១ ខែសីហាឆ្នាំ២០១៦។ក្នុងនោះសមត្ថកិច្ច និង អាជ្ញាធរមិនបានធ្វើការឃាត់ខ្លួន ឬរឹបអូសវត្ថុតាងអ្វីនោះទេ គឺគ្រាន់តែធ្វើការអប់រំណែនាំ ធ្វើកិច្ចសន្យាឲ្យបញ្ឈប់សកម្មភាពរុករករ៉ែបន្តទៀត និង ទុករយ:ពេលមួយថ្ងៃដើម្បីឲ្យពួកគាត់រុះរើ ជញ្ជូនសម្ភារ:ចាកចេញ។
លោកវរសេនីយ៍ហុងគឹមហឿនអធិការនគរបាលស្រុកមេមត់បានឲ្យរស្មីកម្ពុជា ដឹងនៅព្រឹកថ្ងៃទី០២សីហាថាខាងលោករួមជាមួយអាជ្ញាធរស្រុកមេមត់ ពិតជាបានចុះទៅណែនាំសកម្មភាពរុករករ៉ែមាសរបស់ប្រជាពលរដ្ឋរស់នៅ ជុំវិញតំបន់សំពៅលូននោះហើយការណែនាំអប់រំឲ្យបញ្ឈប់នេះបានធ្វើ ច្រើនលើកហើយតាំងពីក្រុមហ៊ុនវិនិយោគស្របច្បាប់បានក្ស័យទុនទុកចោល ឈប់ធ្វើ។
លោក ស៊ា ចាន់ដារ៉ា ប្រធានមន្ទីររ៉ែ និង ថាមពលខេត្តត្បូងឃ្មុំបានឲ្យដឹងនៅថ្ងៃទី ០២ សីហានេះដែរថា"ករណីនេះយើងឲ្យពួកគាត់សរុបចំនួន ២៩គ្រួសារធ្វើកិច្ចសន្យាបញ្ឈប់សកម្មភាពអនាធិបតេយ្យហ្នឹងហើយឲ្យ ពួកគាត់ងាកទៅរកច្បាប់វិញ។ក្នុងនោះយើងបានទុកពេលវេលាសម្រាប់ ពួកគាត់ចាកចេញពីទីកន្លែងធ្វើអាជីវកម្មរុករករ៉ែមាសខុសច្បាប់នោះ មួយថ្ងៃដើម្បីរបស់របរចេញ"។
លោកប្រធានមន្ទីរបានឲ្យដឹង ទៀតថាអ្នកទៅធ្វើការជីករករ៉ែមាសខុសច្បាប់ទាំងអស់នោះគឺពួកគាត់ជា កម្មកររបស់ក្រុមហ៊ុនចិនមួយដែលបានវិនិយោគធ្វើអាជីវកម្មរុករករ៉ែ មាសលើផ្ទៃដីប្រមាណ១០ហិកតានៅសំពៅលូឃុំជាំតាម៉ៅស្រុកមេមត់ដែល បានខ្សាយទុនទុកចោលកន្លងទៅនេះ៕
ចំនួនអ្នកទស្សនា
- ថ្ងៃនេះ11021
- ម្សិលមិញ6261
- សប្តាហ៍នេះ29401
- ខែនេះ144551
- ឆ្នាំនេះ144551
- សរុប20587007