ក្រសួងមហាផ្ទៃ ៖ សំណុំរឿងបក្សសង្គ្រោះជាតិក្លែងបន្លំស្នាមមេដៃអាចឈានដល់នីតិវិធីតុលាការ
06-August-2016 | ដោយ មែន កំសត់
រាជធានីភ្នំពេញ ៖ មន្ត្រីជាន់ខ្ពស់ក្រសួងមហាផ្ទៃនៅថ្ងៃទី៥ ខែសីហា ឆ្នាំ២០១៦បានប្រកាសថា ស្នាមមេដៃប្រមាណ៦ម៉ឺន ត្រូវបានពិនិត្យរួចរាល់ បន្ទាប់ពីគណៈកម្មការស្រាវជ្រាវលើញត្តិនៃស្នាមមេដៃប្រមាណ១៧ម៉ឺនរបស់គណបក្សសង្គ្រោះជាតិ បានថ្វាយព្រះមហាក្សត្រ ។ ការប្រកាសបន្តរបស់មន្ត្រីជំនាញបានពិនិត្យឃើញថា មានស្នាមមេដៃខ្លះផ្តិតលើសពី២ដងលើញត្តិទៀតផង ។ នេះបើតាមការអះអាងរបស់លោកនាយឧត្តមសេនីយ៍ ខៀវ សុភ័គ និងលោក សក់ សេដ្ឋា បានលើកឡើងក្នុងសន្និសីទកាសែត ។
លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថា គណៈកម្មការបានចុះស្រាវជ្រាវនៅតាមខេត្តនានា បានរកឃើញថា មានសកម្មជនគណបក្សសង្គ្រោះជាតិចំនួន២៥១នាក់ បានចេញមកអះអាងស្នាមមេដៃរបស់ខ្លួនត្រូវបានគេថាយកទៅស្នើសុំរដ្ឋាភិបាលកសាងផ្លូវ ជីកស្រះ មិនមែនយកទៅថ្វាយព្រះមហាក្សត្រ ដើម្បីគាំទ្រលោក កឹម សុខានោះទេ ។ ពួកគាត់បានដាក់ពាក្យប្តឹងអ្នកដែលបានយកស្នាមមេដៃរបស់ពួកគាត់ទៅប្រើប្រាស់ខុសពីអ្វីដែលពួកគេបានប្រាប់ ។
លោកនាយឧត្តមសេនីយ៍ ខៀវ សុភ័គ បានលើកឡើងថា មានពាក្យប្តឹងមន្ត្រីគណបក្សសង្គ្រោះជាតិរហូតពេលនេះ មានចំនួន១២៧នាក់ស្រី៧នាក់ អាជ្ញាធរមូលដ្ឋានគណៈកម្មការកំពុងស្រាវជ្រាវ និងបន្តចាត់ការចំពោះអ្នកដែលបានក្លែងស្នាមមេដៃ លើញត្តិទាំងនោះ ។ លោកថា គណៈកម្មការក្រសួងមហាផ្ទៃ បានរកឃើញស្នាមមេដៃប្រឌិត ហើយករណីនេះនៅមិនទាន់ចប់ទេអាចឈានទៅដល់តុលាការផង ។
លោក ខៀវ សុភ័គ បន្តថា ស្នាមមេដៃជាង១៧ម៉ឺន គឺស្នាមមេដៃ៦ម៉ឺនបានពិនិត្យរួចហើយក្នុងចំនួនញត្តិ១៨ដុំ និងមានឈ្មោះប្រជាពលរដ្ឋប្រមាណ៦ម៉ឺននាក់ នៅក្នុងខេត្តពោធិ៍សាត់ ក្រចេះ កោះកុង និងខេត្តឧត្តរមានជ័យ ។ លោកបាននិយាយថា មិនទាន់មានចំណាត់ការយ៉ាងណានោះនៅឡើយទេ ចំពោះករណីនេះតែគណៈកម្មការនេះនឹងចាត់វិធានការ ព្រោះថាបើគណៈកម្មការនេះមិនចាត់វិធានការទេក៏មិនចាំបាច់បង្កើតគណៈកម្មការនេះធ្វើអ្វីនោះឡើយ ។
លោកនាយឧត្តមសេនីយ៍ ខៀវ សុភ័គ មានលើកឡើងថា ញត្តិខ្លះមានស្នាមមេដៃមានឈ្មោះនិងអសយដ្ឋានមានជាង១៤ម៉ឺននាក់ ។ មានញត្តិខ្លះមានឈ្មោះស្នាមម្រាមដៃមែន តែគ្មានអសយដ្ឋានសោះចំនួនជាង២ម៉ឺននាក់ ។ ដោយឡែកញត្តិដែលគ្មានឈ្មោះ គ្មានស្នាមមេដៃមានចំនួន១៨៨ឈ្មោះ ។ ចំពោះទម្រង់ និងខ្លឹមសារលើញត្តិទាំងនោះដូចគ្នាទាំងអស់ ។
លោក ខៀវ សុភ័គ មានលើកឡើងថា ពាក់ព័ន្ធបាតុភាពនេះ មានការពាក់ព័ន្ធមូលដ្ឋានដែលមន្ត្រីគណបក្សសង្គ្រោះជាតិ ថ្នាក់ឃុំ និងស្រុកមួយចំនួនបានធ្វើសកម្មភាពលួងលោមប្រជាពលរដ្ឋឲ្យផ្តិតមេដៃលើញត្តិ ដែលពលរដ្ឋមួយចំនួនបានផ្តិតមេដៃ មិនបានយល់ពីខ្លឹមសារនិងយោបល់របស់គណបក្សទេ និងប្រជាពលរដ្ឋមិនចេះអក្សរ ជឿលើការបោកបញ្ឆោតពីសកម្មជនគណបក្សសង្គ្រោះជាតិ ដោយផ្តិតមេដៃសុំបញ្ចុះតម្លៃទំនិញ កសាងផ្លូវ និងជីកស្រះជាដើម ។ ក្រសួងបានប្រាប់ទៅអាជ្ញាធរមូលដ្ឋានប្រាប់សកម្មជនគណបក្សសង្គ្រោះជាតិ ឱ្យបញ្ឈប់ការបោកបញ្ឆោតប្រជាពលរដ្ឋទៀត ។
លោក ខៀវ សុភ័គ បានលើកឡើងថា មានសកម្មជនគណបក្សសង្គ្រោះជាតិចំនួន២៥១នាក់ត្រូវបានហៅមកអប់រំពួកគាត់ ។ បន្ទាប់ពីការអប់រំ គាត់ក៏មានការបែកធ្លាយថា ញត្តិនេះយកទៅប្រើប្រាស់បែបនយោបាយ និងមានប្រជាពលរដ្ឋ១២៧នាក់ ចេញមុខប្តឹងសកម្មជនគណបក្សសង្គ្រោះជាតិ ដែលបានយកស្នាមម្រាមដៃរបស់ខ្លួន ទៅប្រើប្រាស់ខុសគោលដៅនិងប្តឹងបដិសេធលើឯកសារនេះ ។
លោក សក់ សេដ្ឋា រដ្ឋលេខាធិការក្រសួងមហាផ្ទៃបានលើកឡើងថា គណៈកម្មការបានបញ្ចប់ការងារ បន្ទាប់ពីបានស្រាវជ្រាវពិនិត្យរួចរាល់ និងបន្តស៊ើបអង្កើតបន្តទៀត ។ លោកបានចាត់ទុកថា ករណីនេះអាចឈានទៅដល់តុលាការហើយ គណៈកម្មការមិនអាចនិយាយជំនួសតុលាការបានទេ ។
លោក ខៀវ សុភ័គ បានលើកឡើងថា «យោបល់គាត់ល្អ តែបំណងមិនល្អទេ ព្រោះនាំស្នាមមេដៃចូលវាំង » ។ លោកលើកឡើងថា យើងបានរកឃើញអត្តសញ្ញាណបុគ្គលក្នុងចំណោមជាង៨ម៉ឺននាក់ លើចំនួនជាង១៤ម៉ឺននាក់ ជាលទ្ធផលឈ្មោះ១៦២៣នាក់ គ្មានវត្តមាននៅមូលដ្ឋានមុនកាលបរិច្ឆេទ មានន័យថា ឈ្មោះនោះគ្មាននៅមូលដ្ឋានទេ និងបានផ្ទេរលំនៅឋានចេញជាង៤ម៉ឺននាក់ និងស្លាប់៧៧នាក់ ។
លោក ខៀវ សុភ័គ បានលើកឡើងថាឈ្មោះដែលគ្មានអត្តសញ្ញាណមានចំនួនជាង១ម៉ឺននាក់ គ្មានឈ្មោះក្នុងមូលដ្ឋាន និងមានភាពមិនប្រក្រតីលើញត្តិចំនួនជាង២០០០សន្លឹក ហើយលើញត្តិជាង១ម៉ឺនសន្លឹក មានស្នាមម្រាមដៃជាង៤ម៉ឺន ក្នុងនោះមានស្នាមម្រាមដៃ៧៣៨ស្នាមម្រាមដៃផ្តិតច្រើនដង លើឈ្មោះអ្នកដទៃចំនួនជាង២០០០ មានខ្លះផ្តិតលើសពី២ដង និងខ្លះផ្តិត៨៨ដង ។ មានស្នាមម្រាមដៃ៤៣បានផ្តិតលើស១០ដង ។
ក្រសួងមហាផ្ទៃបានលើកឡើងថា របាយការណ៍អំពីភាពមិនប្រក្រតីនៅលើញត្តិស្នាមមេដៃប្រជាពលរដ្ឋ ដែលគណបក្សសង្គ្រោះជាតិ បានយកទៅថ្វាយព្រះមហាក្សត្រដែលសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដាក់ជូនសម្តេចតេជោ ហ៊ុន សែន ដើម្បីពិនិត្យ និងសុំចំណាត់ការបន្តនោះ គឺត្រូវបានសម្តេចនាយករដ្ឋមន្ត្រីចារបញ្ជូនត្រឡប់មកវិញ ។ បន្ទាប់ពីទទួលបានចំណារសម្តេចនាយករដ្ឋមន្ត្រី គឺសម្តេចក្រឡាហោម ស ខេង បានឲ្យអគ្គស្នងការនគរបាលជាតិ ធ្វើការបន្តចំពោះករណីនេះ ៕
ចំនួនអ្នកទស្សនា
- ថ្ងៃនេះ2541
- ម្សិលមិញ11441
- សប្តាហ៍នេះ32371
- ខែនេះ147521
- ឆ្នាំនេះ147521
- សរុប20589977