មេព្រៃត្បូងឃ្មុំអនុញ្ញាតឲ្យម្ចាស់ដេប៉ូឈើទិញឈើអត់ច្បាប់ ដោយសេរី
08-August-2016 | ដោយ មែន កំសត់
ត្បូងឃ្មុំ៖ មន្ត្រីផ្នែករដ្ឋបាលព្រៃឈើត្បូងឃ្មុំ បានឃុបឃិតជាមួយឈ្មួញ និងម្ចាស់ដេប៉ូឈើប្រមូលទិញឈើ ដែលគ្មានច្បាប់ ដែលដឹកតាមរ៉ឺម៉កម៉ូតូ និងរថយន្តកែច្នៃជាច្រើនគ្រឿង ក្នុងមួយថ្ងៃៗ ហើយបានអនុញ្ញាតឲ្យដឹកជញ្ជូនឆ្លងកាត់ ទៅលក់តាមខេត្តមួយចំនួនទៀតយ៉ាងគគ្រឹកគគ្រេងទាំងយប់ ទាំងថ្ងៃ ដោយសេរីគ្មានការបង្ក្រាបឡើយ ។ ប៉ុន្តែមន្ត្រីសង្កាត់រដ្ឋបាលព្រៃឈើក្រូចឆ្មារ បានឆ្លើយថាពិតមានឈ្មួញដឹកជញ្ជួនឈើខុសច្បាប់ ឆ្លងកាត់សង្កាត់រដ្ឋបាលព្រៃឈើ យកមកលក់ចែកចាយតាមដេប៉ូនិងតាមបណ្តាខេត្តមួយចំនួនមែន ។ តែរូបភាពនៃការដឹកជញ្ជួននោះវាជាលក្ខណ:តូចតាចប៉ុណ្ណោះ គឺពិបាកបង្ក្រាប និងទប់ស្កាត់ណាស់ ។
ប្រភពព័ត៌មានក្រុមអ្នកស៊ីឈ្នួលដឹកជញ្ជួនឈើតាមរ៉ឺម៉ក បានឲ្យដឹងនាពេលថ្មីៗនេះ ថាអ្នកដឹកឈើពីស្រុកសម្បូរ ខេត្តក្រចេះ តាមរ៉ឺម៉កម៉ូតូភាគច្រើន យកមកលក់នៅតាមដេប៉ូឈើនៅខេត្តត្បូងឃ្មុំ ខេត្តកំពង់ចាម និងខេត្តព្រៃវៃង ជាដើម ។ នេះគឺស៊ីឈ្នួលដឹកឲ្យដឹកលក់ចែកចាយ ឲ្យឈ្មួញធំម្នាក់ឈ្មោះកុល ផ្ទះនៅស្រុកឆ្លូង ខេត្តក្រចេះ ។ ដោយក្នុងមួយជើងទទួល បានឈ្នួលតម្លៃបួនម៉ឺនរៀល គឺដឹកជញ្ជូនតែពេលថ្ងៃទេពេលយប់សម្រាក ។
ប្រភពព័ត៌មាននោះបានឲ្យដឹងទៀតថា ក្នុងការដឹកជញ្ជូនឈើមួយលើកៗ នៃរ៉ឺម៉កម៉ូតូអាចផ្ទុកបានពីពីរទៅបីម៉ែត្រគូប ឈើអារហើយស្រេច ជាប្រភេទលេខ១ និងជាឈើស្រឡៅ ភាគច្រើនដឹកលក់ចែកចាយឲ្យខេត្តត្បូងឃ្មុំ មាននៅក្រុងសួង ស្រុកអូរាំងឪ ជាដើម ។ ខេត្តកំពង់ចាម មាននៅស្រុកកោះសូទិន ស្រុកស្រីសន្ធរ និង ខេត្តព្រៃវែង លក់តាមដេប៉ូនៅស្វាយអន្ទរ និង ព្រែកសណ្តែក ។ ប៉ុន្តែនៅតាមផ្លូវឆ្លងកាត់មានសមត្ថកិច្ចមេព្រៃ ប៉ូលិសចាំទារតាមដងផ្លូវច្រើនកន្លែង ។ ពិសេសនៅខេត្តត្បូងឃ្មុំ ដូចជាក្នុងស្រុកក្រូចឆ្មារ និងស្រុកត្បូងឃ្មុំ ។ តែពុំដឹងអស់ប៉ុន្មានទេក្នុងមួយរ៉ឺម៉កម៉ូតូនោះ គឺមេខ្លួនឈ្មោះ កុល ជាអ្នកតាមរត់ការណ៍ឲ្យលុយសមត្ថកិច្ចទាំងនោះ។
ប្រភពពីឈ្មួញឈើម្នាក់សូមមិនបញ្ចេញឈ្មោះ បានឲ្យដឹងដែរថា ឈើដែលដឹកតាមរថយន្តកែច្នៃ និងរ៉ឺម៉ូតូ យកមកលក់តាមដេប៉ូតាមខេត្ត ដូចបានរៀបរាប់ខាង គឺគ្មានច្បាប់អនុញ្ញាតទេ ។ ដោយអ្នកជាឈ្មួញបានប្រមូលទិញពីក្នុងព្រៃអារ ហើយជាប្រភេទឈើស្រឡៅ ក្នុងមួយម៉ែត្រគូប តម្លៃ ៨០ម៉ឺនរៀល ហើយយកមកលក់វិញបាន១៤០ ទៅ១៥០ម៉ឺនរៀល ។ក្នុងនោះបានរត់ការណ៍ឲ្យសមត្ថកិច្ចតាមផ្លូវមួយអង្គភាព ពី៦ទៅ៨ម៉ឺនរៀលក្នុងគោយន្តដឹកជញ្ជូនឈើមួយគ្រឿង និង សម្រាប់រ៉ឺម៉កម៉ូតូដឹកឈើមួយគ្រឿងពី២ទៅ៣ម៉ឺនរៀល។
ប្រភពដដែលបានឲ្យដឹងបន្ថែមថា ចំណែកដេប៉ូឈើដែលប្រមូលទិញឈើដឹកតាមគោយន្តរថយន្តសាំងយ៉ុង កែច្នៃ (សាំងយ៉ុងយីឌុប) និង រ៉ឺម៉កម៉ូតូទាំងអស់នោះមាន នៅក្រុងសួង ខេត្តត្បូងឃ្មុំ មានដេប៉ូឈើ ឈ្មោះថាំង,ឈ្មោះហុច និងឈ្មោះអូន ។ នៅជីហែ ស្រុកកោះសូទិន ខេត្តកំពង់ចាម ដេប៉ូឈើឈ្មោះតាឡឹង ,តាសេង និងឈ្មោះហួត ។ ក្រៅពីនោះដេប៉ូជាច្រើនកន្លែងទៀតនៅស្រុកស្វាយអន្ទរ និងព្រែកសណ្តែក ខេត្តព្រៃវែង គឺជាឈើអត់ច្បាប់ ឬអត់ពាក់មីដែលបានដឹកឆ្លងកាត់ផ្លូវ របស់ខេត្តត្បូងឃ្មុំ និងដែលមេព្រៃគ្មាន ការបង្ក្រាបទប់ស្កាត់នោះទេ ។
គួរបញ្ជាក់ថា កាលពីមុនមិនទាន់មានការបង្ក្រាបឈើប្រណីត ជាទ្រង់ទ្រាយធំ នៅភូមិភាគឦសាន ឆ្លងដែនទៅកាន់ប្រទេសវៀតណាម កន្លងមកនោះ គឺដេប៉ូឈើទាំងប៉ុន្មានដូចបានជំរាបជូនខាងលើនេះ ពួកគាត់ទទួលទិញឈើច្បាប់ ឬពែកមី ពីក្រុមហ៊ុនរបស់ឧកញ៉ាស៊ឹង សំអុល និង ក្រុមហ៊ុនរបស់ឧកញ៉ា វ័ន្ត ប៊ុនថៃ ដែលដឹកតាមរថយន្តចំណុះភ្លៅប្រាំ ឬយីឌុប ។ ម្យ៉ាងខាងសាធារណការ និងដឹកជញ្ជូនបានរឹតបន្តឹងផ្ទុកលើសទម្ងន់ ទើបពុំសូវឃើញរថយន្តធុនធំទាំងនោះ គឺបែរជាលេចចេញការដឹកជញ្ជូនឈើខុសច្បាប់ កើតឡើងយ៉ាងព្រោងព្រាត តាមរូបភាពគោយន្តកែច្នៃ រថយន្តសាំងយ៉ុងកែច្នៃទៅជាយីឌុប ឬសាំងយ៉ុងធម្មតាប៉ុន្តែដោះកៅអីចេញ និងតាមរ៉ឺម៉កម៉ូតូ ។
ទាក់ទងនឹងរឿងឈ្មួញឈើដឹកជញ្ជូនឈើអត់ច្បាប់តាមគោយន្ត និងរ៉ឺម៉កម៉ូតូឆ្លងកាត់មកលក់ចែកចាយឲ្យដេប៉ូខាងលើលោក នងរ៉ានី នាយសង្កាត់រដ្ឋបាលព្រៃឈើក្រូចឆ្មារ បានឆ្លើយប្រាប់រស្មីកម្ពុជាតាមទូរស័ព្ទ នៅថ្ងៃទី៦ ខែសីហា គឺមុនឆ្លើយសំណួររបស់អ្នកកាសែត លោកបានអស់សំណើហើយពោលថាឃើញតែអ្នកកាសែតសួរមកកាន់ច្រើនគ្នា គឺផ្តោតតែមកលើរូបលោក គឺពិតជាមានសកម្មភាពដឹកជញ្ជូនឈើខុសច្បាប់មែន ។ ប៉ុន្តែការដឹកជញ្ជួននោះ ជារូបភាពតូចតាចបើបង្ក្រាប ទៅយើងបារម្ភ មានការប៉ះទង្គិច និងបង្កភាពរញ៉េរញ៉ៃ កើតឡើងដូចការបង្ក្រាបនៅខេត្តក្រចេះ នាពេលថ្មីៗនេះ។
លោកនង រ៉ានី បានឆ្លើយបកស្រាយទៀតថា បញ្ហាចោទប្រកាន់លើសមត្ថកិច្ច បានចាំទារលុយ ពីរ៉ឺម៉ក និងរថយន្តដឹកឈើខុសច្បាប់នោះ ពិតជាមានមែន ។ ប៉ុន្តែខាងកូនចៅលោក មិនទារច្រើនម៉ឺនរៀល ដូចការចោទប្រកាន់ទេ គឺតែពី៥.០០០ទៅ១០.០០០រៀល ។ ចំណែកខាងមន្ត្រីផ្នែក និងមន្ត្រីខណ្ឌរដ្ឋបាលព្រៃឈើ ព្រមទាំងមន្ត្រីនគរបាលជាច្រើនកន្លែង ក្នុងរូបភាពត្រួតពិនិត្យអាវុធជាតិផ្ទុះ និងមានដល់ទៅខាងមន្ត្រីអយ្យការអមសាលាដំបូង ខេត្តត្បូងឃ្មុំ ទៀតផងដែរនោះ គឺពុំដឹងថាគេទារលុយពីឈ្មួញឈើប៉ុន្មានទេ។
ប៉ុន្តែនៅរសៀល ថ្ងៃទី០៦ សីហា ដដែល បានទំនាក់ទំនងទៅកាន់លោកសួ ដាវី ជានាយផ្នែករដ្ឋបាលព្រៃឈើត្បូងឃ្មុំ គឺលោកបានទទួលទូរស័ព្ទ ហើយអ្នកកាសែតបានណែនាំខ្លួន គាត់ឆ្លើយថាស្តាប់ពុំបាន ហើយក៏ចុចបិទការសន្ទនា និងមិនព្រមទទួលការហៅចូលជាច្រើនដង បើទោះជាយើងបានព្យាយាមសុំការបំភ្លឺពី សកម្មភាពដឹកជញ្ជូនឈើខុសច្បាប់ និងការទិញឈើអត់ច្បាប់ ពីសំណាក់ម្ចាស់ដេប៉ូឈើក្នុងខេត្តត្បូងឃ្មុំ ៕
ចំនួនអ្នកទស្សនា
- ថ្ងៃនេះ4931
- ម្សិលមិញ11441
- សប្តាហ៍នេះ34761
- ខែនេះ149911
- ឆ្នាំនេះ149911
- សរុប20592367