ចាប់ឈ្មួញជួញដូរសត្វព្រៃពីរនាក់បញ្ជូនដល់ដៃមន្ទីរបរិស្ថានដោះលែងវិញ
09-August-2016 | ដោយ មែន កំសត់
មណ្ឌលគិរី៖ លោកសាតចាន់បុត្របានធ្វើសេចក្តីរាយការណ៍ថាសមត្ថកិច្ចជំនាញបរិស្ថានបានចាប់ឈ្មួញជួញដូរសត្វព្រៃចំនួនពីរនាក់ជាមួយសត្វព្រៃជាង១០០គីឡូក្រាមបានយកទៅដល់មន្ទីរតែខាងមន្ទីរបានដោះលែងវិញដោយគ្រាន់តែបង់ពិន័យអន្តរកាលនិងលើក ឡើងថាមិនមែនជាប្រភេទសត្វកម្រ។ក្នុងការដោះលែងនោះត្រូវបានមហាជននឹងមន្ត្រីរាជការក្នុងខេត្តមណ្ឌលគិរីរិះគន់យ៉ាងចាស់ដៃបំផុត។កម្លាំងបង្ក្រាបសត្វព្រៃនោះស្ថិតនៅផ្លូវលំមួយនៅភូមិឈួលឃុំស្រែហ៊ុយនិងភូមិជីមៀតឃុំណងគីលឹកស្រុកកោះញែកខេត្តមណ្ឌលគិរីកាលពីថ្ងៃទី៧ខែសីហាឆ្នាំ២០១៦។
ពាក់ព័ន្ធនិងការដោះលែងជនសង្ស័យដែលជាមេឈ្មួញជួញដូរសត្វព្រៃខាងលើនេះអ្នកឆ្លើយឆ្លងព័ត៌មានយើងបានសុំការបំភ្លឺពីលោក ឌិន ប៊ុនធឿននាយកដែនជម្រក សត្វព្រៃស្រែពកនៅរសៀលថ្ងៃទី៧សីហាលោកបានបញ្ជាក់ប្រាប់ថាជនសង្ស័យ
២នាក់នេះពិតជាបានដោះលែងឲ្យមានសេរីភាពវិញហើយគឺដោះលែងនៅមន្ទីរបរិស្ថានខេត្តមែន។ដោយសារច្បាប់យល់ឃើញថាសត្វព្រៃខាងលើនេះមិនមែនជាប្រភេទសត្វព្រៃកម្រនោះទេដូច្នេះមានការធ្វើការផាកពិន័យអន្តរកាលយកថវិការបង់ចូលរដ្ឋនិងណែនាំឲ្យបញ្ឈប់ការជួញដូរតទៅទៀត។
ចំពោះការលើកឡើងរបស់លោកឌិនប៊ុនធឿននាយកដែនជម្រកសត្វព្រៃស្រែពកត្រូវបានក្រុមអ្នកច្បាប់និយាយថាបើបទល្មើសជាក់ស្តែងចាប់បានសត្វព្រៃរស់គ្រប់ប្រភេទ មានចំនួនរហូតដល់១០៣គីឡូក្រាមហើយ នៅតែគ្មានទោសតើបទល្មើសក្នុងទំហំប៉ុនណា ទើបលោកនាយកដែនជម្រកគិតថាគួរតែមានទោស?។ក្រុមអ្នកច្បាប់បានបន្តថាតាមចាំកាលពេលដែនជម្រកមួយនេះស្ថិតក្រោមការគ្រប់គ្រងរបស់ខណ្ឌរដ្ឋបាលព្រៃឈើមណ្ឌលគិរី កុំថាឡើយបទល្មើសសត្វព្រៃមានចំនួនជាង១០០គីឡូ ក្រាម បែបនេះ សូម្បី១០គីឡូក្រាម ក៏ត្រូវចាប់បញ្ជូនទៅសាលាដំបូងខេត្តដើម្បីចាត់ការតាមផ្លូវច្បាប់ដែរ។
លោកមូលផាតប្រធានគម្រោងអភិរក្សតំបន់ទេសភាពខ្ពង់រាបភាគខាងកើតនៅរសៀលថ្ងៃទី៧សីហា២០១៦នេះលោកបានសម្តែងនូវការសោកស្តាយយ៉ាងខ្លាំង
រាល់ការបាត់បង់សត្វព្រៃយ៉ាងច្រើនសន្ធឹកសន្ធាប់ អាចបង្កឡើងដោយមានអ្នកជួញដូរសត្វព្រៃ ចេះតែកើនឡើង។
មានអ្នកញៀនការប្រម៉ាញ់សត្វព្រៃដោយការបាញ់ប្រហារដោយគ្រាប់កាំភ្លើងច្រើននាក់(អ្នកឆ្លុះយប់)ព្រានព្រៃ។ចំណែកអ្នកដាក់អន្ទាក់ក៏ច្រើនគ្មានការថមថយសោះ
កត្តាទាំងនេះហើយធ្វើអោយសត្វព្រៃគ្រប់ប្រភេទនៅតំបន់មណ្ឌលគិរីទាំងតូច ធំ ប្រឈម ទៅការបាត់បង់បណ្តើរៗ។
លោកប្រធានគម្រោងបានធ្វើការសំណូមពរនិងស្នើរឲ្យអជ្ញាធរតាំងពីមូលដ្ឋានភូមិឃុំស្រុកនិងអាជ្ញាធរមានសមត្ថកិច្ចទាំអស់រួមសហការគ្នាឲ្យបានជិតស្និទ្ធដើម្បីទទួលបានព័ត៌មានពីសកម្មភាពនេះពីមូលដ្ឋាននិងឈានទៅរកការទប់ស្កាត់និងធ្វើការបង្ក្រាប។លោកថាមានតែមូលដ្ឋានផ្ទាល់ទេដែលបានដឹងរឿងនេះច្បាស់បំផុតដូច្នេះសូមជួយធ្វើការផ្តល់ព័ត៌មាននេះដល់មន្ត្រីឧទ្យានុរក្សឈានទៅរកការទប់ស្កាត់។មិនតែប៉ុណ្ណោះលោកបានធ្វើការសំណូមពរដល់មន្ត្រីអនុវត្តច្បាប់មេត្តាដាក់ទោសឲ្យបានធ្ងន់ធ្ងរដល់ជនដែលបានប្រព្រឹត្ត។
ចំណែកព័ត៌មានពីសាលាដំបូងខេត្តមណ្ឌលគិរីបានឲ្យដឹងថារហូតមកដល់ម៉ោងនេះមន្ត្រីសាលាដំបូងនៅមិនទាន់ទទួលរបាយការណ៍ណាមួយ ពីមន្ត្រីជំនាញបញ្ជូនមកទេ។សេចក្តីរាយការណ៍បានឲ្យដឹងថា សត្វព្រៃចំនួន១០៣គីឡូក្រាមដឹកតាមរយៈ រថយន្តកាមរីមួយគ្រឿងដែល មន្ត្រីជំនាញគ្រប់គ្រងដែនព្រៃហាមឃាត់និងរឹបអូសបានទាំងវត្ថុតាងជនល្មើស។ជនប្រព្រឹត្តបទល្មើសពីរនាក់ដែលមន្ត្រីជំនាញការពារសត្វព្រៃបានបង្ក្រាបនិងឃាត់ខ្លួនបាននៅស្រុកកោះញែក ក្នុងចំណោមជនសង្ស័យចំនួន៣នាក់ ដោយមានម្នាក់ មិនទាន់គ្រប់អាយុ ត្រូវដោះលែងវិញ។ចំណែកក២នាក់ ឈ្មោះ សម្បត្តិ វុទ្ធថា នឹងម្នាក់ទៀតឈ្មោះ សម្បិត្ត វុទ្ធី ដោយរឹបអូសបានរថយន្តម៉ាកកាម៉ារីស្វិត មួយ គ្រឿងរួមទាំងសត្វព្រៃ ចំនួន ១០៣ គីទ្បូក្រាម មានសត្វត្រកួតចំនួន ៤០ក្បាល ស្វាមួយក្បាល ពពិចមួយក្បាល ពោះវែកក្បាល ៦ អណ្ដើក ៨ក្បាល និងសំពោចមួយក្បាល៕
ចំនួនអ្នកទស្សនា
- ថ្ងៃនេះ4341
- ម្សិលមិញ11441
- សប្តាហ៍នេះ34171
- ខែនេះ149321
- ឆ្នាំនេះ149321
- សរុប20591777