តាមរឹបអូសឧបករណ៍នេសាទខុសច្បាប់រហូតដល់ផ្សារ
12-August-2016 | ដោយ មែន កំសត់
ភ្នំពេញ៖ជិតដល់ពាក់កណ្តាលខែសីហាទៅហើយទឹកលិចដែននេសាទនៅទូទាំងខេត្តព្រៃវែងទើបតែបានប្រមាណជា៣០ភាគរយ ដើម្បីការពារកូនត្រីក្នុងស្ថានភាពទឹកនៅតូចបែបនេះរដ្ឋបាលជលផលខេត្តព្រៃវែងបានធ្វើការបង្ក្រាបបទល្មើសនេសាទដោយគ្មានការលើកលែងចាប់តាំងពីក្នុងដែននេសាទរហូតដល់ទីផ្សារ។
លោកអូន ស៊ីណាត ប្រធានខណ្ឌរដ្ឋបាលជលផលព្រៃវែង និយាយឲ្យដឹងនៅថ្ងៃទី១១ខែសីហាឆ្នាំ២០១៦ថា បទល្មើសនេសាទ នៅក្នុងខេត្តព្រៃវែងឆ្នាំនេះថយចុះនិងមានរូបភាពមិនធំដុំទេដោយសារមន្ត្រីជលផលបានចុះធ្វើការបង្ក្រាបបន្តបន្ទាប់ក្រោយពីបងប្អូនសហគមន៍នេសាទរាយការណ៍ថាមានបទល្មើសកើតឡើងនៅកន្លែងណាមួយនោះ ។
សហគមន៍នេសាទសហការបានល្អណាស់ជាមួយនឹងរដ្ឋបាលជលផលក្នុងការផ្តល់ពត៍មានបទល្មើសនេសាទ។នាយខណ្ឌរដ្ឋបាលជលផលខាងលើបានឲ្យដឹងទៀតថារាល់ពីរបីថ្ងៃម្តងមន្ត្រីតែងបានត្រឡប់ទៅមើលកន្លែងដែលបានបង្ក្រាបរួចនោះឡើងវិញទើបធ្វើឲ្យបទល្មើសកើតថ្មីមិនអាចមានទ្រុងទ្រាយធំលើសពី១០០ម៉ែត្រ(របាំងស្បៃមុង)បាន។ឧបករណ៍ដែលរឹបអូសបានពីក្នុងការបង្ក្រាប បានដុតបំផ្លាញចោល ។ ការបង្ក្រាបកន្លងទៅនេះមិនមែនធ្វើត្រឹមនៅក្នុងដែននេសាទទេ គឺនៅតាមភូមិនិងនៅតាមផ្សារក៏បានធ្វើដែរ។
មន្ត្រីដដែលបានពន្យល់ថា ការបង្ក្រាបនៅតាមផ្លូវនិងតាមផ្សារ គឺបានរឹបអូសយកឧបករណ៍នេសាទខុសច្បាប់ដែលគេបានដឹកលក់តាមផ្លូវ តាមភូមិ និងតាមផ្សារ តែមិនយកស្បៃមុងទេ គឺយកតែឧបករណ៍នេសាទ ។ការចុះឆែកឆេរនៅតាមផ្សារគឺមានដីកាចេញដោយតុលាការ ដូចជានៅផ្សារព្រៃវែងបានធ្វើរួចហើយនិងបន្តធ្វើនៅផ្សារផ្សេងៗទៀត។មានមនុស្សជាច្រើននាក់ហើយដែលប្រើប្រាស់ឧបករណ៍នេសាទខុសច្បាប់ ត្រូវបានបញ្ជូនទៅតុលាការនោះ។
លោកអូនស៊ីណាតបានបញ្ជាក់ថាវិធានការទាំងប៉ុន្មានខាងលើនេះបានធ្វើឲ្យបទល្មើសមានការថយចុះ។នៅក្នុងបឹងដែលមិនទាន់មានទឹកធំធេងឃើញមានកូនត្រីគ្រប់ប្រភេទច្រើនណាស់តែនៅតូចៗបំផុត(ប្រហែល៥.០០០ក្បាលក្នុង១គីឡូក្រាម)។កូនត្រីធំធាត់យឺតនេះដោយសារទឹកឡើងយឺតនិងមានកម្ពស់ទាបពេក។
កូនត្រីជាច្រើនត្រូវបានប្រជានេសាទលក្ខណៈគ្រួសារប្រមូលយកដោយមិនលើកលែង។មន្ត្រីជំនាញជលផលរូបនេះបានឲ្យដឹងទៀតថាទឹកឡើងលើកទី១នៅក្នុងខែកក្កដានៅអ្នកលឿងបានកម្ពស់ត្រឹមតែ៣.៦០ម៉ែត្រលើកទី២នៅក្នុងខែសីហាក៏បានត្រឹមតែក្នុងរង្វង់៣.៦០ម៉ែត្រដែរ។
កម្ពស់ទឹកត្រឹមជាង៣ម៉ែត្រនេះគឺបានលិចដែននេសាទនៅទូទាំងខេត្តព្រៃវែងតែប្រមាណជា៣០ភាគរយប៉ុណ្ណោះ។ឯទឹកដែលនឹងឡើងលើកទី៣នៅពេលខាងមុខមិនដឹងកម្រិតណាទេតែការឡើងនៅលើកចុងក្រោយនោះមិនបានធ្វើឲ្យបរិមាណកូនត្រីកើនឡើងទៀតទេដោយហេតុនេះហើយទើបយើង(ស៊ីណាត)ខិតខំការពារកូនត្រីដែលមានហើយនេះឲ្យបានគង់វង់។
នៅថ្ងៃទី១១ខែសីហា ខណ្ឌរដ្ឋបាលជលផលព្រៃវែង ធ្វើការបង្ក្រាបបទល្មើសនេសាទដោយឧបករណ៍ស្បៃមុង និង ឆក់ត្រីនៅចំណុចព្រែកបាយ៉ាម ភូមិអពៅព្រៃឃុំកោះសំពៅស្រុកពាមជរ បានពីរករណីដោយបំផ្លាញលូស្បៃមុងចំនូន ៨ មាត់របាំងស្បៃមុងប្រវែង១៣០ម៉ែត្រចម្រឹងចំនួន ៩០ ដើមលែងត្រីចំនួន ១៣ គីឡូក្រាម និងឧបករណ៍ឆក់មួយគ្រឿង៕
ចំនួនអ្នកទស្សនា
- ថ្ងៃនេះ4911
- ម្សិលមិញ11441
- សប្តាហ៍នេះ34741
- ខែនេះ149891
- ឆ្នាំនេះ149891
- សរុប20592347