ប្រកាសចាប់ខ្លួនជនដែលដៀលនិងប្រមាថរបបថាតិរច្ឆាន
14-August-2016 | ដោយ មែន កំសត់
ភ្នំពេញ ៖ លោកផៃ ស៊ីផាន មន្ត្រីនាំពាក្យរដ្ឋាភិបាលកម្ពុជា បានឲ្យដឹងថា អ្នកដែលប្រមាថកម្ពុជា ច្បាស់ជានឹងទទួលចំណាត់ការផ្លូវច្បាប់ ដើម្បីការពារកិត្យានុភាពជាតិ។
ការលើកឡើងរបស់មន្ត្រីនាំពាក្យរូបនេះ ក្នុងន័យជាការឆ្លើយតបទៅនឹងព្រះអង្គម្ចាស់ ស៊ីសុវត្ថិ ធម្មិកោ ដែលជាមន្ត្រីជាន់ខ្ពស់គណបក្សប្រឆាំងនិងជាសែរាជវង្សបានហៅរបបបច្ចុប្បន្នដែល ដឹកនាំដោយគណបក្សប្រជាជនរបស់សម្តេចតេជោ ហ៊ុន សែន ថាជា «របបតិរច្ឆាន»។
ថ្លែងក្នុងបទសម្ភាសន៍ជាមួយរស្មីកម្ពុជា នារសៀលថ្ងៃទី១២ ខែសីហា នេះ លោកផៃ ស៊ីផាន រដ្ឋលេខាធិការនិងជាអ្នកនាំពាក្យទីស្ដីការគណៈរដ្ឋមន្ត្រី បានលើកឡើងថា លោកហាក់មានការសោកស្ដាយ ដែលព្រះអង្គម្ចាស់ស៊ីសុវត្ថធម្មិកោ ដែលជាសែស្រឡាយរាជវង្សតែបែរជាមើលងាយរាជវង្សានុវង្សខ្លួនឯងទៅវិញ ដោយហេតុថា របបរបស់កម្ពុជាសព្វថ្ងៃ គឺមានព្រះមហាក្សត្រជាព្រះប្រមុខរដ្ឋ ដូចនេះការចោទប្រកាន់របបនេះក៏ជាការមើលងាយដល់អង្គព្រះមហាក្សត្រដែរ។
ប៉ុន្តែទោះជាយ៉ាងណា លោកបានបញ្ជាក់ថា រដ្ឋាភិបាលកម្ពុជា ប្រឆាំងដាច់ខាត ហើយនឹងខំប្រឹងប្រែងឲ្យអស់ពីលទ្ធភាពដើម្បីការពារអង្គព្រះមហាក្សត្រមិនឲ្យនរណាមកប្រមាថឡើយ។
លោកក៏បានបញ្ជាក់ដែរថា ការដឹកនាំប្រទេសកម្ពុជាសព្វថ្ងៃ ដែលហៅថា “...ព្រះរាជាណាចក្រទី២នេះ យើងបានរៀនសូត្រពីព្រះរាជាណាចក្រទី១ ដែលនៅក្នុងរាជវង្សានុវង្ស ធ្វើការក្បត់នឹងព្រះករុណាបរមរនកោដ្ឋ ក្នុងការចូលដៃជាមួយបរទេសធ្វើឲ្យមានរដ្ឋប្រហារឆ្នាំ១៩៧០...ដូច្នេះរដ្ឋប្រហារឆ្នាំ១៩៧០ មិនមានអ្នកណាក្រៅពីរាជវង្សខ្លួនឯង...ក្នុងនាមផលប្រយោជន៍ខ្មែរ គឺយើងការពាររបបហ្នឹង ការពារព្រះមហាក្សត្រ...”។
លោកបានបន្ដថា អ្វីដែលព្រះអង្គម្ចាស់ស៊ីសុវត្ថិធម្មិកោ បានចោទ គឺចោទបន្លំ ដោយហាក់មានន័យប្រមាថដល់អង្គព្រះមហាក្សត្រដែលជាព្រះប្រមុខរដ្ឋ ដូចនេះ ដើម្បីការពារអង្គព្រះមហាក្សត្រ ក៏ជាការពារកិត្យានុភាពជាតិ រដ្ឋាភិបាលកម្ពុជានឹងចាត់វិធានការសមរម្យណាមួយ តាមផ្លូវច្បាប់។
ព្រះអង្គម្ចាស់ ស៊ីសុវត្ថិធម្មិកោហៅបានមានព្រះបន្ទូលថា ព្រះអង្គត្រូវតែក្លាហាន ហើយត្រូវតែហ៊ានប្រឈមមុខទទួលខុសត្រូវនូវរាល់ពាក្យសម្ដីដែលព្រះអង្គធ្លាប់លើកឡើងនៅលើទឹកដីកម្ពុជា និងចំពោះតុលាការកម្ពុជា ។ ព្រះអង្គមានព្រះបន្ទូលលើកឡើងបែបនេះ ធ្វើឡើងនៅលើទំព័រហ្វេសប៊ុករបស់ព្រះអង្គនៅរសៀលថ្ងៃព្រហស្បតិ៍ទី១១ សីហានិងត្រូវផ្សាយបន្តដោយវិទ្យុបណ្តាញព្រះសង្ឃឯករាជ្យនៅថ្ងៃដដែល៕
ចំនួនអ្នកទស្សនា
- ថ្ងៃនេះ6771
- ម្សិលមិញ11441
- សប្តាហ៍នេះ36601
- ខែនេះ151751
- ឆ្នាំនេះ151751
- សរុប20594207