ចាប់ខ្លួន! ឃើញប្រាក់ដុល្លាររាប់ម៉ឺនក្នុងឡាន តែក្រោយមកក៏លែងវិញ...
15-August-2016 | ដោយ មែន កំសត់
ខេត្តស្ទឹងត្រែង ៖ មានការភ្ញាក់ផ្អើលមួយ បន្ទាប់ពីសមត្ថកិច្ចចម្រុះនៅច្រកទ្វារអន្តរជាតិត្រពាំងគ្រៀល ធ្វើការឃាត់ខ្លួនមនុស្ស៣នាក់និងរថយន្តមួយគ្រឿង រួមទាំងក្រដាសប្រាក់ដុល្លារចំនួន៣៣២សន្លឹក (ស្មើ៣.៣២០០ដុល្លារ) តែក្រោយមក ត្រូវបានដោះលែងទៅវិញ ដោយមានការសម្របសម្រួលពីព្រះរាជអាជ្ញាអមសាលាដំបូងខេត្ត កាលពីព្រឹកថ្ងៃទី១៤ សីហា ២០១៦ ។
មន្ត្រីច្រកទ្វារត្រពាំងគ្រៀលប្រាប់ឲ្យដឹងថា មនុស្សទាំង៣នាក់ខាងលើ ១-ឈ្មោះស៊ាម ម៉ុង ភេទប្រុស អាយុ៦៤ឆ្នាំ ២-ឈ្មោះកេត ចាន់ដេត ភេទប្រុស អាយុ៦១ឆ្នាំ អ្នកទាំង២ រស់នៅឃុំកោះសំពាយ ស្រុកសៀមបូកខេត្តស្ទឹងត្រែង និង៣-ឈ្មោះផែវ មិត្ត ភេទប្រុស អាយុ៥៦ឆ្នាំ រស់នៅសង្កាត់បឹងកក់១ ខណ្ឌទួលគោក រាជធានីភ្នំពេញ។
ប្រភពពីសមត្ថកិច្ចនៅច្រកទ្វារអត្តរជាតិត្រពាំងគ្រៀលឱ្យដឹងថា នៅវេលាម៉ោង០៦ និង៣០នាទីថ្ងៃទី១៣ សីហា ២០១៦ កម្លាំងចម្រុះប្រចាំច្រកទ្វារអន្តរជាតិត្រពាំងគ្រៀល បានត្រួតពិនិត្យលើមនុស្ស៣នាក់ ខណៈមកធ្វើលិខិតឆ្លងដែនចូលប្រទេសឡាវ បន្ទាប់មកបន្តត្រួតពិនិត្យនៅក្នុងរថយន្តរបស់ពួកគេ ក៏ប្រទះឃើញក្រដាសប្រាក់ដុល្លារជាច្រើនមិនប្រក្រតី ទើបសម្រេចឃាត់ពួកគេ និងប្រគល់ទៅឲ្យកម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត មកសាកសួរក្រោមការអនុញ្ញាតពីព្រះរាជអាជ្ញាអមសាលាដំបូងខេត្ត ។
លោកសាន់ និម៉ល់ ស្នងការរងទទួលផែនការិយាល័យប្រឆាំងបទល្មើសសេដ្ឋកិច្ចនគរបាលខេត្តបានប្រាប់ កាលពីរសៀលថ្ងៃទី១៤ សីហា ២០១៦ថា ករណីនេះ កម្លាំងការិយាល័យBLO ប៉ុស្តិ៍ព្រំដែន និងស្នាក់ការដុងក្រឡត្រពាំងគ្រៀល គាត់ត្រួតពិនិត្យលើប៉ាស្ព័រ ក្រោយមកឆែកឆេក៏ប្រាប់ថា ដុល្លារក្លែងក្លាយ ហើយពួកគាត់មិនបានពិនិត្យជាក់ស្តែងទេ ។
បន្ទាប់មកគាត់រាយការណ៍ជូនស្នងការឲ្យបញ្ជាកម្លាំងជំនាញធ្វើកិច្ចទៅយកមនុស្សទាំងនោះ មកស្នងការដ្ឋានគ្រានោះដែរ លោកក៏បានឲ្យនាយរងការិយាល័យ ដែលជាសេនាធិការរបស់លោក ធ្វើការត្រួតពិនិត្យរាយការណ៍ជូនលោកវិញ តែដោយលោកមិនអស់ចិត្តនៅព្រឹកឡើងថ្ងៃទី១៤ សីហា លោកក៏បានសួរផ្ទាល់ហើយមើលផ្ទាល់លុយនោះ ទើបដឹងថា ជាលុយឆេងម៉េង សម្រាប់សែនខ្មោច។
លោកស្នងការរងបន្តថា កាលណាលុយសែនខ្មោចក្នុងច្បាប់អត់មានចែង ហើយទង្វើឆ្លើយរបស់ពួកគាត់នោះឆ្លើយថា កាលពីគាត់ធ្វើបុណ្យសែនឆេងម៉េងទុកក្នុងរថយន្តនោះរហូត ដោយមិនបានយកចេញ ហើយពេលទៅដល់ព្រំដែនមិនបានចាប់អារម្មណ៍អំពីលុយសែនខ្មោចនោះទៀត ដល់ពេលខាងព្រំដែនគេមិនបានពិនិត្យមើលថា ជាលុយឆេងម៉េងទេ លុះមកដល់លោកពិនិត្យមើលលុយមួយជួរសុទ្ធជាលុយហ្វូតូកូពីទាំងអស់។
ក្រោយមក លោកបានរាយការណ៍ប្រាប់ព្រះរាជអាជ្ញាលោកថា អស់អាចធ្វើអ្វីបាននោះទេ មានតែអប់រំប្រាប់ពួកគាត់វិញថា ថ្ងៃក្រោយកុំដាក់លុយបែបហ្នឹងក្នុងរថយន្តទុកចោលនៅផ្ទះទៅសែនអីក៏សែនទៅ ទើបអប់រំណែនាំឲ្យពួកគាត់វិលទៅលំនៅឋានវិញ ។ លោកស្នងការរងបានបញ្ជាក់បន្ថែមថា ពួកគាត់ទាំងនោះមានគោលបំណងទៅទេសចរណ៍ទឹកធ្លាក់បាក់ផេង ក្នុងប្រទេសឡាវប៉ុណ្ណោះ មិនមានការពាក់ព័ន្ធរឿងអ្វីទេ។
ប្រភពព័ត៌មានមួយទៀត ដែលទទួលបានពីសមត្ថកិច្ចការពារច្រកទ្វារអន្តរជាតិត្រពាំងគ្រៀលកម្ពុជា-ឡាវថា ដំបូងឡើយគេសង្ស័យមនុស្សទាំង៣នាក់ខាងលើ ចរាចណ៍លុយក្លែងក្លាយទៅកាន់ប្រទេសឡាវ និងដើម្បីទំនាក់ទំនងរបរមិនស្របច្បាប់ ទើបមានកម្លាំងសមត្ថកិច្ចនៅច្រកទ្វារធ្វើការឃាត់ និងឆែកឆេរកឃើញក្រដាសប្រាក់ក្លែងក្លាយទាំងនោះ ប្រគល់ឲ្យកម្លាំងនៃការិយាល័យប្រឆាំងបទល្មើសសេដ្ឋកិច្ចជាអ្នកបន្តនីតិវិធីច្បាប់ ។
មន្ត្រីដដែលបន្តថា ក្រោយការឃាត់ខ្លួនមនុស្សទាំង៣នាក់នោះ សមត្ថកិច្ចបានដកហូតរថយន្តកាមរី ស៊េរីឆ្នាំ១៩៩១មួយគ្រឿង ព្រមទាំងក្រដាស់ប្រាក់សែនឆេងម៉េងចំនួន៣៣២សន្លឹក ស្មើនិង៣.៣២០០ដុល្លារ ។ មនុស្សទាំងបីនាក់នោះ ត្រូវបានដោះលែងទៅវិញ ក្រោយសមត្ថកិច្ចបញ្ចប់នីតិវិធីសាកសួរ និងពិនិត្យជាក់ស្តែងលើក្រដាស់ប្រាក់ទាំងនោះ ដោយមានការសម្របសម្រួលពីព្រះរាជអាជ្ញាអមសាលាដំបូងខេត្តឲ្យមានណែនាំអប់រំ ៕
ចំនួនអ្នកទស្សនា
- ថ្ងៃនេះ5241
- ម្សិលមិញ11441
- សប្តាហ៍នេះ35071
- ខែនេះ150221
- ឆ្នាំនេះ150221
- សរុប20592677