សង្ស័យពុលអាហារបង្ករឲ្យបុរសម្នាក់ស្លាប់អត់មានសាច់ញាតិ
21-August-2016 | ដោយ មែន កំសត់
មណ្ឌលគិរី៖បុរសម្នាក់សង្ស័យពុលអាហារ បានដាច់ខ្យល់ស្លាប់ តែម្នាក់ឯងនៅមណ្ឌលសុខភាពអូរអាម ដោយគ្មានសាច់ ញាតិ ណាម្នាក់នៅក្បែរ។ហេតុការណ៍នេះបានកើតឡើងស្ថិតនៅក្នុងមណ្ឌលសុខភាព អូរអាម ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរីកាលពីព្រលប់ថ្ងៃ២០ខែសីហាឆ្នាំ២០១៦ ។
លោកសាតចាន់បុត្របានរាយការណ៍ដោយដកស្រងប្រភពអ្នកឃើញហេតុការណ៍បានឲ្យដឹងថាមុនកើតហេតុគេបានឃើញរថយន្តឈ្នួលមួយគ្រឿងដឹកអ្នកដំណើរចេញពីខេត្តមណ្ឌលគិរី។លុះមកដល់មុខលំនៅស្ថានអភិបាលស្រុកកែវសីមានៅម៉ោងប្រមាណជាង៦ល្ងាចរថយន្តឈ្នួលខាងលើ បានឈប់ចតឲ្យបុរសម្នាក់ចុះ។បន្តិចក្រោយមកគេក៏បានឃើញបុរសនោះដើរចុះឡើងៗមានសភាពដូចជារាគរូស។ ឃើញសភាពមិនស្រួលក្រុមប្រជាកាពារភូមិ បានឌុបជនរងគ្រោះ ទៅកាន់មណ្ឌលសុខភាព។
ប្រភពព័ត៌មានបានបន្តថាពេលទៅដល់មណ្ឌលគ្រូពេទ្យប្រចាំការនៅមណ្ឌលសុខភាពបានឲ្យដឹងថាជនរងគ្រោះបានមកដល់មណ្ឌលសុខភាពបានដើរចូលបង្គន់ ម្តងទៅ២ដង ដោយមិនមាននិយាយស្តីជាមួយគ្រូពេទ្យនោះទេ។លុះចេញពីបង្គន់វិញ ជនរងគ្រោះក៏សំដៅទៅលើគ្រែ ក្នុងបន្ទប់សម្ភពរួចក៏បែកពពុះមាត់សន្លប់លែងដឹងខ្លួនតែម្តង។គ្រូពេទ្យថាបានព្យាយាមជួយសង្គ្រោះជនរងគ្រោះដែរ។តែជនរងគ្រោះនោះបានដាច់ខ្យល់ស្លាប់បាត់ទៅហើយ។គ្រូពេទ្យបញ្ជាក់ថា ស្ថានភាពនៃជនរងគ្រោះ មានសភាព រាគរួសលាយឈាម និងបែកពពុះមាត់ ដោយសង្ស័យបឋមថាជាករណីពុល។
នាយនគរបាលប៉ុស្តិ៍រដ្ឋបាលស្រែខ្ទុមលោកជិនសុខនបានសហការគ្នាជាមួយអាវុធហត្ថចុះត្រួតពិនិត្យសពជាមួយគ្រូពេទ្យភ្លាមៗនិងបានដាក់ការសង្ស័យថាជនរងគ្រោះអាចនិងស្លាប់ដោយករណីពុលអាហារ។ទោះជាយ៉ាងណាការសន្និដ្ឋានខាងលើសមត្ថកិច្ចនៅមិនទាន់ប្រាកដច្បាស់នៅឡើយទេដោយរង់ចាំក្រុមជំនាញធ្វើកោសល្យវិច្ច័យម្តងទៀត។
មន្ត្រីនគរបាលបញ្ជាក់ថាក្នុងលិខិតសម្គាល់ខ្លួនជនរងគ្រោះមានឈ្មោះកង បុណ្យភេទ្យប្រុសអាយុ៣៨ឆ្នាំមានស្រុកកំណើតភូមិព្រៃស្វាយឃុំចុងអំពិលស្រុកកញ្ជៀចខេត្តព្រៃវែង។បច្ចុប្បន្នសពជនរងគ្រោះខាងលើ ត្រូវបានតំកល់ទុកនៅមណ្ឌលសុខភាពរង់ចាំធ្វើកោសល្យវិច្ច័យបន្ថែមនិងផ្តល់ព័ត៌មានឲ្យសាច់ញាតិមកទទូលទៅធ្វើបុណ្យតាមប្រពៃណី៕
ចំនួនអ្នកទស្សនា
- ថ្ងៃនេះ11081
- ម្សិលមិញ11441
- សប្តាហ៍នេះ40911
- ខែនេះ156061
- ឆ្នាំនេះ156061
- សរុប20598517