បង្ក្រាបសិប្បកម្មដ៏ធំមួយកន្លែងរឹបអូសឈើប្រណីតបានជិត១ពាន់ដុំ
22-August-2016 | ដោយ មែន កំសត់
ស្ទឹងត្រែង៖មន្ត្រីជំនាញរដ្ឋបាលព្រៃឈើនិងសមត្ថកិច្ចខេត្តស្ទឹងត្រែងបានចុះទៅបង្ក្រាបរោងសិប្បកម្មកែច្នៃឈើមួយកន្លែងស្ថិតត្រង់ចំណុចអូរចាំងហា ភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់ជាប់ព្រំប្រទល់ស្រុកឆែបខេត្តព្រះវិហារ ដោយរឹបអូសបានម៉ាស៊ីនអារជ្រៀកមួយនិងឈើប្រណីតបានជិត១ពាន់ដុំកាលពីថ្ងៃទី២០ខែសីហាឆ្នាំ២០១៦។
លោក រី រស្មី នាយសង្កាត់រដ្ឋបាលព្រៃឈើគ្រប់គ្រងតំបន់នោះមិនអាចសុំការបំភ្លឺបានទេដោយសារលោកមិនលើកទូរស័ព្ទនៅព្រឹកថ្ងៃទី២២ខែសីហាឆ្នាំ២០១៦ជុំវិញករណីចុះបង្ក្រាបឈើខុសច្បាប់នោះ។ប៉ុន្តែបើតាមប្រភពព័ត៌មានបានឱ្យដឹងថាម្ចាស់សិប្បកម្មកែច្នៃឈើឈ្មោះជឿន ធឿន ភេទប្រុសអាយុ៥៣ឆ្នាំ ស្នាក់នៅភូមិឃុំខាងលើមានឯកសារមួយចំនួនទទួលស្គាល់ ដោយអាជ្ញាធរ ភូមិឃុំនិងថ្នាក់ស្រុក តាំងពីឆ្នាំ២០១៥មក។
ឈ្មោះជឿន ធឿន ហៅតាបាក់ក្រោយពីទទួលបានសិទ្ធិអនុញ្ញាតពីអាជ្ញាធរដែនដីរួចហើយក៏បានប្រមូលទិញឈើពីគ្រប់ទិសទីយកមកស្តុកទុកនិងកែច្នៃឈើដឹកចេញជាបន្តបន្ទាប់ទៅក្រៅខេត្ត។ប៉ុន្តែមិនដឹងថាមុខរបររកស៊ីមួយនោះយ៉ាងម៉េចទេទើបមន្ត្រីជំនាញនិងសមត្ថកិច្ចនគរបាលខេត្តចុះទៅបង្ក្រាបនៅពេលនេះ។
ជុំវិញការចុះបង្ក្រាបបទល្មើសឈើខុសច្បាប់នោះសមត្ថកិច្ចបានបញ្ជាក់ថាគេមិនបានឃាត់ខ្លួនម្ចាស់សិប្បកម្មនោះឡើយ។ហើយឈើប្រណីត ទាំងអស់នោះក្រោយពីរឹបអូសបានត្រូវមន្ត្រីជំនាញបញ្ជាឱ្យដឹកជញ្ជូនទៅរក្សាទុកនៅផ្នែករដ្ឋបាលព្រៃឈើស្រុកថាឡាបរិវ៉ាត់។
របាយការណ៍មួយបានឱ្យដឹងថានៅក្រុងស្ទឹងត្រែងមានសិប្បកម្មកែច្នៃឈើធំៗចំនួន៩កន្លែងសុទ្ធសឹងតែជាជនជាតិវៀតណាម។ទី១.ឈ្មោះចាន់គឹមចឹមទី២.ឈ្មោះសុខឃឿនទី៣.ឈ្មោះលីវឆាយឡែនទី៤.ឈ្មោះហេងសំនៀងទី៥.ឈ្មោះផនភាតទី៦.ឈ្មោះខាំប៊ុនម៉េងទី៧.ឈ្មោះសូលីណាទី៨.ឈ្មោះលីសំហួតនិងទី៩.ឈ្មោះសុខពៅ។ ប៉ុន្តែ រោងសិប្បកម្មផ្សេងៗទៀត នៅក្នុងក្រុងស្ទឹងត្រែងនោះពុំមានច្បាប់ត្រឹមត្រូវឡើយ៕
ចំនួនអ្នកទស្សនា
- ថ្ងៃនេះ11181
- ម្សិលមិញ11441
- សប្តាហ៍នេះ41011
- ខែនេះ156161
- ឆ្នាំនេះ156161
- សរុប20598617