​​កំ​ពតៈ​ សព​បុរស​ម្នាក់​ត្រូវ​ប្រជាពលរដ្ឋ​ប្រទះឃើញ​ស្ថិតនៅ​ក្បែរផ្លូវ​ក្នុងភូមិ​កំពង់​ចិន ឃុំ​ស្ទឹង​កែវ ស្រុក​ទឹកឈូ កាលពី​ព្រលប់​ថ្ងៃទី​២២ ខែសីហា​ឆ្នាំ​២០១៦​។​សមត្ថកិច្ច​សន្និដ្ឋានថា​ជា​ករណី​ខ្យល់គរ​។​ជនរងគ្រោះ​ឈ្មោះ​ស៊ឹម​ប៊ុនធឿន​អាយុ​ប្រហែល​៥០​ឆ្នាំមាន​ទីលំនៅ​ភូមិ​ព្រៃ​ពាយ ឃុំ​ត្រពាំង​ភ្លាំង ស្រុក​ឈូក ខេត្តកំពត​។​
  
មន្ត្រីនគរបាល​នៃ​ស្នងការដ្ឋាន​ខេត្ត​បាន​ប្រាប់​ឱ្យដឹងថា​បន្ទាប់ពី​ទទួល​ព័ត៌មាន​ស្តីអំពី​ករណី​ប្រទះឃើញ​សព​បុរស​ម្នាក់​ស្ថិតនៅ​តាមផ្លូវ​ក្នុងភូមិ​សាស្ត្រ​ភូមិ​កំពង់​ចិន ឃុំ​ស្ទឹង​កែវ ស្រុក​ទឹកឈូ នា​វេលា​ម៉ោងជាង​៧​យប់​ថ្ងៃទី​២២ ខែសីហា សមត្ថកិច្ច​ជំនាញ​ក៏បាន​ចុះ​ដល់​គោលដៅ និង​ពិនិត្យឃើញថា​ជនរងគ្រោះ​ស្លាប់​ដោយសារ​ខ្យល់គរ ពោលគឺ​មិន​ពាក់ព័ន្ធ​នឹង​អំពើ​ឃាតកម្ម​បង្កឡើង​ពី​សំណាក់​ជនណាម្នាក់​ឡើយ​។ មន្ត្រីនគរបាល​បានបញ្ជាក់​ទៀតថា​ជនរ​ង​គ្រោះ​អាច​ជួប​ស្ថានភាព​ជំងឺ​ធ្ងន់ធ្ងរ​ខ្លាំង​បន្ទាប់ពី​ចុះ​ដងទឹក​រួច​យួរ​មកដល់​ចំណុច​ក្បែរ​ម៉ូតូ​របស់ខ្លួន​ត្រង់​កន្លែង​ដួល​ស្លាប់​នោះ​៕