ខ្យល់កន្ត្រាក់លិចទូកនេសាទ១គ្រឿង អ្នកនេសាទ២នាក់ ហែលតោងពីដុងទឹក ជិត១ម៉ោង រួចជីវិតដោយបានទូកដឹកភ្ញៀវទេសចរណ៍ធុនធំ ជួយសង្គ្រោះទាន់ពេល
10-July-2017 | ដោយ ពល បញ្ញា
ព្រះសីហនុ ៖ លោកវរសេនីយ៍ទោខឹម សុផល នាយការិយាយ័យនគរបាលចរាចរណ៍ផ្លូវទឹកខេត្តព្រះសីហនុបានឲ្យដឹងថា នៅវេលាម៉ោង៩និង៣០នាទី ថ្ងៃទី១០ ខែកក្កដា ឆ្នាំ២០១៧នេះ មានទូកនេសាទបង្គាមួយ បានត្រូវខ្យល់ព្យុះបោកពន្លិចនៅ ចម្ងាយប្រហែល១គីឡូម៉ែត្រ ស្ថិតនៅខាងជើងកោះដែកគោល មុខកំពង់ផែស្វយ័តក្រុងព្រះសីហនុ។ លុះដល់ម៉ោង១០និង២៥នាទីត្រូវបានទូកយន្តធុនធំដឹកភ្ញៀវទេសចរណ៍របស់ក្រុមហ៊ុនកោះរ៉ុងដាយស៊ីនធឺ ជួយសង្គ្រោះ ខណៈ ជនរងគ្រោះទាំង២នាក់ខាងលើកំពុងហែលទឹកតោងជាមួយពីដុងទឹក ខាងជើងកោះដែកគោលប្រហែល២គីឡូម៉ែត្រ និងបាននាំមកផែទេសចរណ៍។
ក្រោយពីការសាកសួរអំពីព័ត៌មាន ទើបដឹងថាទូកនេសាទខាងលើ បានលិចដោយសារពេលកំពុងទម្លាក់មងបង្គារហើយមានខ្យល់កន្ត្រាក់ និងមានភ្លៀងទឹករលកធំៗ បណ្តាលអោយក្រឡាប់ទូក លិចតែម្តង។
សមត្ថកិច្ចបានឲ្យដឹងថាជនរងគ្រោះទី១-ឈ្មោះ ជ័យ សំអុល ភេទប្រុស អាយុ៣៨ឆ្នាំ មុខរបរនេសាទ (ត្រូវជាម្ចាស់ទូក) ទីលំនៅបច្ចុប្បន្នក្រុម២៥ ភូមិ៣ សង្កាត់១ក្រុង/ខេត្តព្រះសីហនុ, ទី២-ឈ្មោះ សាង មឿន ភេទប្រុស អាយុ៤៧ឆ្នាំ ជាកម្មករនេសាទ ទីលំនៅ បច្ចុប្បន្នក្រុម២៥ ភូមិ៣ សង្កាត់១ ក្រុង/ខេត្តព្រះ សីហនុ។
សម្ភារ:ខូចខាតរួមមាន ៖ ទូកឈើកន្ទុយវែងក្តា ៧គូរ ពណ៌សំបកឪឡឹក ម៉ាស៊ីនម៉ាហ្សូតកម្លាំង១០សេះ ១គ្រឿង លិចបាត់ ទាំងស្រុង, មងអូសបង្គាចំនួន២ផែ, ទូរសព្ទ ១គ្រឿង និងសម្ភារៈផ្សេងនៅលើទូកមួយចំនួន ៕
ចំនួនអ្នកទស្សនា
- ថ្ងៃនេះ15321
- ម្សិលមិញ11441
- សប្តាហ៍នេះ45151
- ខែនេះ160301
- ឆ្នាំនេះ160301
- សរុប20602757