រថយន្តអ៊ីសុយស៊ុយបុកគោយន្តកន្ត្រៃស្លាប់ម្នាក់របួសធ្ងន់ម្នាក់
12-July-2017 | ដោយ ពល បញ្ញា
ពោធិសាត់ ៖ រថយន្តអ៊ីសុយស៊ុយពណ៌ស្លែមួយគ្រឿងពាក់ស្លាកលេខបន្ទាយមានជ័យ2A-1931ធ្វើដំណើរតាមបណ្តោយផ្លូវលេខ៥៥បានបុកគោយន្តកន្ត្រៃបណ្តាលឲ្យស្លាប់អ្នកបើកបរគោយន្តម្នាក់និងរបួសធ្ងន់ម្នាក់ករណីនេះកើតឡើងនៅចំណុចស្ពានដំណាក់ឈើក្រម ស្ថិតក្នុងភូមិព្រែក១ ឃុំសំរោង ស្រុកភ្នំក្រវាញ ខេត្តពោធិសាត់ នាវេលាម៉ោង២០និង២០នាទីថ្ងៃទី១១ម្សិលមិញនេះ។
ប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ មានអ្នកបើកគោយន្តកន្ត្រៃជិះគ្នាពីរអ្នកធ្វើដំណើរតាមបណ្តោយផ្លូវលេខ៥៥ តភ្ជាប់ពីផ្លូវជាតិលេខ៥ ឆ្ពោះទៅកាន់ព្រំដែនប្រទេសថៃក្នុងទិសដៅពីលិចទៅកើតមកដល់ចំណុចខាងលើមានរថយន្តម៉ាក រថយន្តអ៊ីសុយស៊ុយពណ៌ស្លែមួយគ្រឿងដឹកបំពង់ហ្គាសបើកបរក្នុងទិសដៅពីកើតទៅលិច(បញ្ច្រាសទិសគ្នា)បានបុក គោយន្តកន្ត្រៃយ៉ាងពេញទំហឹង បណ្តាលឲ្យរបួសធ្ងន់ ពីរនាក់ ខណៈពេលបញ្ជូនមកដល់ពាក់កណ្តាលផ្លូវស្លាប់តៃកុងគោយន្តកន្ត្រៃម្នាក់និងម្នាក់ទៀតកំពុងសម្រាកព្យាបាលនៅមន្ទីរពេទ្យពោធិសាត់។
ក្រោយពេលកើតហេតុអ្នកបើកបររថយន្តរត់គេចខ្លួនបាត់ស្រមោល ដោយបន្សល់ទុករថយន្តនៅកន្លែងកើតហេតុ សមត្ថកិច្ចយកមករក្សាទុកនៅអធិការដ្ឋាននគរបាលស្រុកភ្នំក្រវាញ។
សមត្ថកិច្ចនគរបាលចរាចរណ៍ស្រុកភ្នំក្រវាញបានឲ្យដឹងថា ជនរងគ្រោះត្រូវបានគេស្គាល់ឈ្មោះឌី ឌឿន ភេទប្រុស អាយុ៣៥ឆ្នាំ ជាអ្នកបើកបរស្លាប់និងឈ្មោះឌី ដន ភេទប្រុស អាយុ២៩ឆ្នាំ របួសធ្ងន់កំពុងសម្រាកព្យាបាលនៅមន្ទីរពេទ្យខេត្តពោធិសាត់ អ្នកទាំងពីររស់នៅភូមិអូររំចេក ឃុំត្រពាំងជង ស្រុកបាកាន ខេត្តពោធិសាត់ ចំពោះអ្នកបើកបររថយន្តសមត្ថកិច្ចមិនស្គាល់អត្តសញ្ញាណ នោះឡើយ ចំពោះករណីនេះសមត្ថកិច្ចកំពុងកសាងសំណុំរឿងតាមនិតិវិធីច្បាប់ ៕
ចំនួនអ្នកទស្សនា
- ថ្ងៃនេះ16151
- ម្សិលមិញ11441
- សប្តាហ៍នេះ45981
- ខែនេះ161131
- ឆ្នាំនេះ161131
- សរុប20603587