ប៉ុស្តិ៍ប៉មឆ្មាំសមុទ្រ នៅឆ្នេរអូរឈើទាល ត្រូវអគ្គីភ័យឆាបឆេះដោយសារភ្ញៀវទេសចរណ៍ដុតគោម ហោះធ្លាក់លើដំបូល
13-July-2017 | ដោយ ពល បញ្ញា
ព្រះសីហនុ ៖ មានអគ្គីភ័យមួយបានកើតឡើង នៅឆ្នេរអូរឈើទាល សង្កាត់លេខ៤ ក្រុងព្រះសីហនុ ម្តុំបន្ទាយប៉េអឹមចាស់ បណ្តាលឲ្យឆេះប៉មយាមឆ្មាំសមុទ្រមួយ ស្ទើរអស់ទាំងស្រុង សង់អំពីឈើប្រក់ស្បូវ នៅយប់ថ្ងៃទី១២ ខែកក្កដា ឆ្នាំ២០១៧។
លោកវរសេនីយ៍ទោប៉ោ ប៊ុណ្ណារ៉ា នាយការិយាល័យនគរបាលទេសចរណ៍ខេត្តព្រះសីហនុ បានឲ្យដឹងថាអគ្គីភ័យនេះកើតឡើង ដោយសារមានភ្ញៀវទេសចរម្នាក់ បានដុតគោមបង្ហោះលេង ហើយត្រូវខ្យល់ផាត់រសាត់ មកធ្លាក់លើដំបូលប៉មយាម ដែលប្រក់ស្បូវ បណ្តាលឲ្យឆាបឆេះតែម្តង។ ហើយភ្ញៀវ ទេសចរណ៍ម្នាក់នោះ ក៏បានដើរគេចបាត់ទៅ។
លោកប៉ោ ប៊ុណ្ណារ៉ា បានបញ្ជាក់ថា ដោយសារតែកន្លងមកធ្លាប់មានគ្រោះថ្នាក់ ដោយសារការដុតផាវ កាំជ្រួច គោមហោះយ៉ាងនេះហើយ ទើបលោកឧត្តមសេនីយ៍ទោជួន ណារិន្ទស្នងការនគរបាលខេត្ត បានដាក់បទបញ្ជារ ឲ្យសមត្ថកិច្ចហាមឃាត់ នូវការលេងល្បែង ប្រកបដោយ គ្រោះថ្នាក់បែបនេះ។
លោកឧត្តមសេនីយ៍ត្រីណុប បញ្ញា ស្នងការរងទទួលការងារនគរបាលទេសចរណ៍ និងចរាចរណ៍ផ្លូវទឹក បានឲ្យដឹងថាកន្លងមកលោកបានធ្វើរបាយការណ៍ អំពីបញ្ហាគ្រោះថ្នាក់ នៃការលេងល្បែង ដុតផាវ,កាំជ្រួច,និងគោមហោះ ជូនគណៈអភិបាលខេត្តព្រះសីហនុ ឲ្យលោកបានជ្រាបអំពីបញ្ហាគ្រោះថ្នាក់ទាំងនេះរួចហើយ និងស្នើសុំគោលការណ៍ខេត្ត ចេញសារាចរ ឬ ការណែនាំ ឬការហាមឃាត់ ជាផ្លូវការមួយច្បាស់លាស់ ដើម្បីយកមកអនុវត្ត។ តើទីកន្លែងណាគួរឲ្យដុត ឬមិនត្រូវឲ្យដុត អ្នកល្មើសនិងការហាមឃាត់ ត្រូវមានទោសកម្រិតណា ?
លោកឧត្តមសេនីយ៍ត្រីណុប បញ្ញា បានបញ្ជាក់ថា កន្លងមកការចាប់កាំជ្រួច ផាវ គោមហោះនេះ មានការប៉ះទង្គិច ប្រទាំងប្រទើស ជាមួយក្រុមអាជីវករ ជាញឹកញាប់ ជាផលលំបាកមួយផងដែរ បើយើងមិនមានគោលការណ៍ច្បាប់មួយ កំណត់ច្បាស់លាស់ ៕
ចំនួនអ្នកទស្សនា
- ថ្ងៃនេះ16051
- ម្សិលមិញ11441
- សប្តាហ៍នេះ45881
- ខែនេះ161031
- ឆ្នាំនេះ161031
- សរុប20603487