ផ្លូវលេខ២០២,១៩៤,២២៣,១៨៨ ក្លាយជាយានដ្ឋានជួសជុលរថយន្ត និងដាក់គ្រឿងបន្លាស់រថយន្តចាស់ៗ
15-July-2017 | ដោយ ពល បញ្ញា
ភ្នំពេញ ៖ មជ្ឈដ្ឋាននានាបាននិយាយថា បញ្ហាសណ្តាប់ធ្នាប់ក្នុងរាជធានីភ្នំពេញ នៅតែរញ៉េរញ៉ៃ បណ្តាលមកពីពលរដ្ឋខ្លះមិនសហការជាមួយអាជ្ញាធរ ហើយក៏មានមន្ត្រីខិលខូចខ្លះដើរយកលុយពីអ្នកលក់នៅលើចំណីផ្លូវ ដើម្បីផ្គាប់ចិត្តថ្នាក់លើ។
ជាក់ស្តែងនៅតាមបណ្តោយផ្លូវលេខ២០២,១៩៤,២២៣,១៨៨ ក្នុងសង្កាត់ផ្សារដេប៉ូ១ ខណ្ឌទួលគោក រាជធានីភ្នំពេញ មានយានដ្ឋានជួសជុលរថយន្តជាច្រើន បានយកចំណីផ្លូវជាកន្លែងស្តុកគ្រឿងបន្លាស់រថយន្តគ្រប់ប្រភេទ ព្រមទាំងដាក់តាំងលក់រថយន្ត ទន្ទ្រានចូលចំណែកទ្រូងផ្លូវថែមទៀតផង។
ប្រជាពលរដ្ឋដែលធ្វើដំណើរតាមបណ្តោយផ្លូវ២០២,១៩៤,២២៣, ១៨៨នេះ បានរអ៊ូររទាំថា ការធ្វើអាជីវកម្មបែបនេះ ពិតជាបណ្តាលឲ្យខូចសោភណ្ឌភាពទីក្រុង បង្កឲ្យខូចផ្លូវ និងបង្កការកកស្ទះយ៉ាងខ្លាំង ព្រោះម្ចាស់យានដ្ឋានទាំងនោះ បានយកចំណីផ្លូវធ្វើអាជីវកម្មផ្ទាល់ខ្លួន ដោយមិនខ្លាចញញើតសមត្ថកិច្ចឡើយ ហើយផ្លូវទាំងនេះមន្ទីរសាធារណៈការទើបនឹងជួសជុលយ៉ាងស្អាត សម្រាប់ឲ្យប្រជាពលរដ្ឋងាយស្រួលក្នុងការធ្វើដំណើរនិងកាត់បន្ថយការកកស្ទះចរាចរណ៍ ប៉ុន្តែប្រជាពលរដ្ឋមិនបានធ្វើដំណើរដោយងាយស្រួលនោះទេ ដោយសារម្ចាស់យានដ្ឋានទាំងនោះបានដាក់គ្រឿងយានយន្ត ស្ទើរដល់ទ្រូងផ្លូវទៅហើយ។
មហាជនបានលើកឡើងថា កត្តាទាំងនេះគឺជាបញ្ហាបង្កឲ្យរាជធានីភ្នំពេញ ជួបវិបត្តិនៃការកកស្ទះចរាចរណ៍ជារៀងរាល់ថ្ងៃ ដូច្នេះអាជ្ញាធរគួរចាត់វិធានការ ដើម្បីគ្រប់គ្រងចិញ្ចើមផ្លូវឲ្យបានល្អ សម្រាប់ជាផលប្រយោជន៍សាធារណៈ។
លោកវរសេនីយ៍ត្រី តី សុវណ្ណរ៉េត អធិការរងនគរបាលខណ្ឌទួលគោកផ្នែកសណ្តាប់ធ្នាប់ចរាចរណ៍បានឲ្យដឹងថាលោកបានប្រជុំជាមួយថ្នាក់លើរួចរាល់ហើយចំពោះបញ្ហាផ្លូវទាំងនោះ នឹងមានវិធានការចាត់ការចំពោះ ម្ចាស់អាជីវកម្មដែលយកចំណីផ្លូវដាក់គ្រឿងយានយន្តនិងយានដ្ឋានដែលយកចំណីផ្លូវធ្វើអាជីវកម្ម។ ចំណែកលោក ឯក ឃុនឌឿន អភិបាលខណ្ឌទួលគោក យើងមិនអាចទាក់ទងបានទេ ដោយហៅទូរសព្ទចូលគ្មានអ្នកទទួល ៕
ចំនួនអ្នកទស្សនា
- ថ្ងៃនេះ361
- ម្សិលមិញ16391
- សប្តាហ៍នេះ46591
- ខែនេះ161741
- ឆ្នាំនេះ161741
- សរុប20604197