រថយន្តមិនស្គាល់ម៉ាកបើកបុកម៉ូតូបណ្តាលឲ្យបុរសពីរនាក់ស្លាប់ នៅលើផ្លូវជាតិលេខ៦
17-July-2017 | ដោយ ពល បញ្ញា
កណ្តាល ៖ ហេតុការណ៍គ្រោះថ្នាក់ចរាចរណ៍មួយបានកើតឡើងរវាងរថយន្តមិនស្គាល់ម៉ាកបើកបុកម៉ូតូមួយគ្រឿងពេញមួយទំហឹង បណ្តាលឲ្យបុរស ពីរនាក់ស្លាប់ភ្លាមៗមួយរំពេច។ ករណីនេះបានកើតឡើង កាលពីវេលាម៉ោង២និង១០នាទី ទាបភ្លឺថ្ងៃទី១៧ ខែកក្កដា ឆ្នាំ២០១៧ នៅលើផ្លូវជាតិលេខ៦ ត្រង់ចំណុចចន្លោះគីឡូម៉ែត្រលេខ២៩-៣០ ស្ថិតក្នុងភូមិឫស្សីជ្រោយ ឃុំឫស្សីជ្រោយ ស្រុកមុខកំពូល ។
មន្ត្រីនគរបាលចរាចរណ៍ស្រុកមុខកំពូលបានឲ្យដឹងថា ជនរងគ្រោះ ទី១-ឈ្មោះ ពឿន ហ៊ី ភេទប្រុស អាយុ២៦ឆ្នាំ (ជាអ្នកបើកបរម៉ូតូ) ទី២-ឈ្មោះ ស៊ីម សៀន ភេទប្រុស អាយុ២៤ឆ្នាំ។ ជនរងគ្រោះទាំងពីរនាក់មានទីលំនៅភូមិភ្នំតូច ឃុំត្រប់ ស្រុកបាធាយ ខេត្តកំពង់ចាម ជិះម៉ូតូម៉ាកស៊ុយហ្ស៊ូគីស្មាស់ ពណ៌ខៀវ ពាក់ស្លាកលេខភ្នំពេញ1O-2475។ ចំណែកឯរថយន្តមិនស្គាល់ម៉ាក ក្រោយពីបើកបុកមនុស្សស្លាប់បានបើកគេចខ្លួនបាត់ស្រមោល ។
ប្រភពដដែលបានបន្តថា នៅមុនពេលកើតហេតុសាក្សីបានឃើញជនរងគ្រោះជិះម៉ូតូឌុបគ្នាតាមបណ្តោយផ្លូវជាតិលេខ៦ ក្នុងទិសដៅពីជើងទៅត្បូងដោយល្បឿនលឿន។ លុះជិះដល់ចំណុចកើតហេតុក៏ត្រូវរថយន្តមិនស្គាល់ម៉ាកបើកបុកពីក្រោយពេញមួយទំហឹង បណ្តាលឲ្យម៉ូតូដួលបោកជនរងគ្រោះទាំងពីរនាក់ទៅលើផ្លូវស្លាប់តែម្តង។ ក្រោយពីមានហេតុការណ៍កើតឡើង រថយន្តមិនស្គាល់ម៉ាកបានបើកគេចខ្លួនបាត់ស្រមោល ។
ដោយឡែកសាកសពជនរងគ្រោះទាំងពីរនាក់ ត្រូវបានសមត្ថកិច្ចនគរបាលចរាចរណ៍ ស្រុកមុខកំពូលប្រគល់ទៅឲ្យក្រុមគ្រួសារចាត់ចែងធ្វើបុណ្យតាមប្រពៃណី។ ចំណែកឯម៉ូតូត្រូវបានបញ្ជូនទៅរក្សាទុកនៅប៉ុស្តិ៍នគរបាលរដ្ឋបាលឫស្សីជ្រោយ ដើម្បីចាត់ការតាមច្បាប់ ៕
ចំនួនអ្នកទស្សនា
- ថ្ងៃនេះ861
- ម្សិលមិញ16391
- សប្តាហ៍នេះ47091
- ខែនេះ162241
- ឆ្នាំនេះ162241
- សរុប20604697