នគរបាលបើកប្រតិបត្តិការចុះបង្ក្រាបក្រុមជនជាតិចិនជំរិតទារប្រាក់តាមប្រព័ន្ធ internet ក្នុងភូមិសាស្ត្ររាជធានីភ្នំពេញ
17-July-2017 | ដោយ ពល បញ្ញា
ភ្នំពេញ ៖ នាព្រឹកថ្ងៃទី១៧ កក្កដា ឆ្នាំ២០១៧នេះ កម្លាំងនគរបាល នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ សហការជាមួយនគរបាលអន្តោប្រវេសន៍រាជធានីភ្នំពេញ បានបើកប្រតិបត្តិការទ្រង់ទ្រាយធំ ចុះបង្ក្រាបក្រុមចិនជំរិតទារប្រាក់តាមប្រព័ន្ធ internet នៅតាមបណ្តាលគោលដៅធំៗចំនួន៣ ក្នុងភូមិសាស្ត្ររាជធានីភ្នំពេញ ។
ប្រតិបត្តិការចុះបង្ក្រាបនេះ ធ្វើឡើងដោយមានការដឹកនាំកម្លាំង និងបញ្ជារផ្ទាល់ពីសំណាក់លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ និងមានការសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញលោកសៀង សុខ ។
ឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្គេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ បានប្រាប់អោយដឹងថា ថ្ងៃនេះកម្លាំងនគរបាលបើកប្រតិបត្តិការចុះបង្ក្រាបក្រុមជនជាតិចិនជំរិតទារប្រាក់តាម internet ចំនួន៣គោលដៅធំៗ ក្នុងនោះរួមមាន ខណ្ឌចំការមន ខណ្ឌជ្រោយចង្វារ និងខណ្ឌ៧មករា ។
ជាលទ្ធិផលគិតមកត្រឹមវេលាម៉ោង៩ព្រឹកថ្ងៃខែដដែល កម្លាំងសមត្ថកិច្ចបានឃាត់ខ្លួនជនជាតិចិនប្រុសស្រីជាបន្តបន្ទាប់ប្រមាណជាង២០នាក់ រួមទាំងធ្វើការដកហូតនូវវត្ថុតាង ឧបករណ៍ជាគ្រឿងអេឡិចត្រូនិចពាក់ព័ន្ធនឹងអំពើជំរិតមួយចំនួនធំទៀតផងដែរ ។
លោកឧត្តមសេនីយ៍ឯកប្រធាននាយកដ្ឋាន បានបញ្ជាក់ថា នៅក្នុងប្រតិបត្តិការបង្ក្រាបនេះ គឺពុំមែនជាការឃាត់ខ្លួនជនជាតិចិនពាក់ព័ន្ធនឹងការចូលមកធ្វើការ ឬរស់នៅដោយខុសច្បាប់ឡើយ គឺជាការបង្ក្រាបក្រុមជនជាតិចិនជំរិតទារប្រាក់តាមប្រព័ន្ធ internet ដែលពួកគេយកប្រទេសកម្ពុជា ជាកន្លែងស្នាក់អាស្រ័យ ហើយបញ្ជារតាមប្រព័ន្ធ internet ចេញពីកម្ពុជាទៅជំរិតពលរដ្ឋចិនដូចគ្នា នៅឯប្រទេសរបស់ខ្លួន ៕
ចំនួនអ្នកទស្សនា
- ថ្ងៃនេះ411
- ម្សិលមិញ16391
- សប្តាហ៍នេះ46641
- ខែនេះ161791
- ឆ្នាំនេះ161791
- សរុប20604247