អគ្គស្នងការនគរបាលជាតិបំភ្លឺការចោទប្រកាន់ថាបានធ្វើខុសនីតិវិធីដាក់មន្ត្រីនគរបាលឲ្យចូលនិវត្តន៍
18-July-2017 | ដោយ ពល បញ្ញា
ភ្នំពេញ ៖ អគ្គស្នងការនគរបាលជាតិ នៅថ្ងៃទី១៨ ខែកក្កដាឆ្នាំ២០១៧នេះ បានធ្វើការបកស្រាយបំភ្លឺទៅនឹងការចោទប្រកាន់របស់មន្ត្រីនគរបាលម្នាក់នៅក្នុងខេត្តបាត់ដំបង ដែលថាមន្ត្រីថ្នាក់លើបានធ្វើខុសនីតិវិធីក្នុងការដាក់រូបលោកឲ្យចូលនិវត្តន៍។
ការបកស្រាយបំភ្លឺរបស់អគ្គស្នងការនគរបាលជាតិនេះបានធ្វើឡើងក្រោយមានការផ្សាយតាម រយៈគេហទំព័រ www.botkhmer.com កាលពីថ្ងៃទី១៦ ខែកក្កដា ឆ្នាំ២០១៧ នេះ ដោយរួមមានទាំងលិខិត និង រូបថត របស់មន្ត្រីនគរបាលចូលនិវត្តន៍ ឈ្មោះ ឃុំ សយ អត្ថលេខ ០៣៦៤៨ ជាអធិការ នៃអធិការរដ្ឋាននគរបាលស្រុក រតនមណ្ឌល ខេត្តបាត់ដំបង ផ្ញើជូន សម្តេចអគ្គសេនាបតីតេជោហ៊ុន សែន ដោយបានចោទប្រកាន់ថា ការដាក់លោកឲ្យចូលនិវត្តបានធ្វើខុស នីតិវិធី ដោយពុំបានជូនដំណឹងមកលោកជាមុន ។
អគ្គស្នងការនគរបាលជាតិ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន បានធ្វើការស្រាយបំភ្លឺបញ្ហានេះ តាមរយៈលិខិតផ្ញើជូន សម្តេចអគ្គសេនាបតីតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដោយបានបញ្ជាក់ថា៖ អាស្រ័យដោយកាលពីថ្ងៃទី ១៦ ខែកក្កដា ឆ្នាំ២០១៧ កន្លងទៅនេះ លោកវរសេនីយ៍ទោ ឃុំ សយ អធិការនគរបាលស្រុករតនមណ្ឌល ខេត្តបាត់ដំបង បានផ្ញើលិខិតមួយច្បាប់ជូនសម្តេច បង្ហាញពីការទោមនស្សចំពោះការមិនបានជូនដំណឹង និងមិនបានអញ្ជើញរូបលោកឲ្យចូលរួមក្នុងពិធីប្រកាស ដាក់ឲ្យចូលនិវត្តន៍ និងតែងតាំងអធិការថ្មីជំនួសកាលពីថ្ងៃទី ២២ ខែមិថុនា ឆ្នាំ២០១៧។ អគ្គស្នងការដ្ឋាននគរបាលជាតិសូមអនុញ្ញាតគោរពរាយការណ៍ជូនសម្តេចមេត្តាជ្រាបដ៏ខ្ពង់ខ្ពស់ដូចខាងក្រោមៈ
ទី១. រយៈពេលកន្លងមកនេះ អគ្គស្នងការដ្ឋាននគរបាលជាតិ ក៏ដូចជាក្រសួងមហាផ្ទៃ បានពិនិត្យឃើញថាលោក ឃុំ សយ ពិតជាមន្ត្រីនគរបាលជាតិដែលបានចូលរួមសកម្មនៅក្នងចលនារក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ដូចលោកបានបញ្ជាក់ពិតមែន។ ហេតុនេះហើយ អគ្គស្នងការដ្ឋាននគរបាលជាតិ និងក្រសួងមហាផ្ទៃបានតែងតាំងលោក ឃុំ សយ ជាអធិការនគរបាល ស្រុករតនៈមណ្ឌល តាំងពីឆ្នាំ ១៩៨៧ មក និងបានដំឡើងឋានន្តរសក្តិជាបន្តបន្ទាប់ជូន។
ទី២. ការរៀបចំដាក់ឲ្យលោក ឃុំ សយ ចូលនិវត្តន៍ គឺបានប្រព្រឹត្តទៅត្រឹមត្រូវតាមលក្ខន្តិក ដោយឡែក ស្តីពីនគរបាលជាតិ និងនីតិវិធីនានាដែលបានកំណត់ ដែលកន្លងមកនេះក្រសួងមហាផ្ទៃ ក៏ដូចអគ្គស្នងការដ្ឋាននគរបាលជាតិ បានអនុវត្តទៀងទាត់ចំពោះមន្ត្រីគ្រប់រូបដែលដល់អាយុត្រូវចូលនិវត្តន៍។
ទី៣. ចំពោះការអន់ចិត្តរបស់លោក ឃុំ សយ អគ្គស្នងការដ្ឋាននគរបាលជាតិបានពិនិត្យឡើងវិញ ឃើញថាស្នងការដ្ឋាននគរបាលខេត្តបាត់ដំបងមានការចន្លោះប្រហោងមិនបានអញ្ជើញគាត់ចូលរួមដោយសំអាងថា នឹងមានការធ្វើពិធីប្រកាសមន្ត្រីចូលនិវត្តន៍ដោយឡែកៗ ជាក់ស្តែងតាមការិយាល័យ និងតាមអធិការដ្ឋាននគរបាលនីមួយៗ ។
អគ្គស្នងការនគរបាលជាតិ បានធ្វើការបញ្ជាក់ថា៖ ប៉ុន្តែទោះជាយ៉ាងណាអគ្គស្នងការដ្ឋាននគរបាលជាតិនឹងពិនិត្យកែលម្អកិច្ចការនេះឲ្យកាន់តែប្រសើរជាងនេះ ដើម្បីការពារមិនឲ្យមានការថ្នាំង ថ្នាក់កើតឡើងបន្តទៀត ៕
ចំនួនអ្នកទស្សនា
- ថ្ងៃនេះ1351
- ម្សិលមិញ16391
- សប្តាហ៍នេះ47581
- ខែនេះ162731
- ឆ្នាំនេះ162731
- សរុប20605187