ពិធីបិទវគ្គបណ្តុះបណ្តាល កម្រិតបឋមវិជ្ជាជីវៈនគរបាលនិងប្រកាសតាំងស៊ប់ក្នុងក្របខណ្ឌមន្ត្រីនគរបាលជាតិកម្ពុជា
19-July-2017 | ដោយ ពល បញ្ញា
ភ្នំពេញ ៖ នាព្រឹកថ្ងៃទី១៩ ខែកក្កដា ឆ្នាំ២០១៧ នៅបណ្ឌិត្យសភានគរបាលកម្ពុជា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បាទអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបិទ«វគ្គបណ្តុះបណ្តាលកម្រិតបឋមវិជ្ជាជីវៈនគរបាល» លើកទី២ និងប្រកាសតាំងស៊ប់ក្នុងក្របខណ្ឌមន្ត្រីនគរបាលជាតិកម្ពុជា ដល់សិស្សនាយនគរបាលនិងនាយនគរបាលរងដែលបានជ្រើសរើសថ្មី សម្រាប់ឆ្នាំ២០១៦។
តាមរបាយការណ៍របស់ឯកឧត្តម នាយឧត្តមសេនីយ៍ សេង ផល្លី ប្រធានបណ្ឌិត្យសភានគរបាលកម្ពុជា បានលើកឡើងថា នៅក្នុងឆ្នាំ២០១៦ កន្លងទៅនេះ ក្រសួងមហាផ្ទៃ បានជ្រើសរើសមន្ត្រីនគរបាលក្របខណ្ឌថ្មីចំនួន៤,៥៣៦នាក់ តាមរយៈការប្រឡងប្រជែង ហើយអ្នកប្រឡងជាប់ជាស្ថាពរទាំងអស់ចាំបាច់ត្រូវតែឆ្លងកាត់«វគ្គបណ្តុះបណ្តាលកម្រិតបឋមវិជ្ជាជីវៈនគរបាល» រយៈពេល៧៥ថ្ងៃ នៅបណ្ឌិត្យសភានគរបាលកម្ពុជា មុននឹងតាំងស៊ុបនិងមុនចេញទៅបម្រើការងារនៅតាមអង្គភាពនានា ទូទាំងប្រទេស។
ការបណ្តុះបណ្តាលនេះត្រូវបែងចែកជា៣លើក។ ចំពោះការបណ្តុះបណ្តាលលើកទី១ មានសិស្សនាយនគរបាលនិងនាយនគរបាលចំនួន១,៧៥១នាក់ និងលើកទី២ ចំនួនសរុប១៧៦០នាក់។ សិស្សជ័យលាភីទាំងអស់ត្រូវទទួលបានវិញ្ញាបនបត្រ និងប្រកាសតាំងស៊ប់ក្នុងក្របខណ្ឌមន្ត្រីនគរបាលជាតិកម្ពុជា តាមនីតិវិធីជាធរមាន។
ដោយឡែកអ្នកបោះបង់ការសិក្សានិងអ្នកដែលមិនបានទទួលជោគជ័យក្នុងការសិក្សាមិនត្រូវបានតាំងស៊ប់ក្នុងក្របខណ្ឌនាពេលនេះទេ ត្រូវរងចាំតាំងស៊ប់នៅពេលក្រោយ។ ក្រោយពេលវគ្គបណ្តុះបណ្តាលលើកទី២នេះ ត្រូវបញ្ចប់រួចរាល់ ការបណ្តុះបណ្តាលលើកទី៣នឹងត្រូវចាប់ផ្តើមបន្តនៅថ្ងៃទី២២ ខែកក្កដា ឆ្នាំ២០១៧។
ថ្លែងក្នុងពិធីបិទវគ្គនេះសម្តេចក្រឡាហោម បានថ្លែងកោតសរសើរចំពោះកិច្ចខិតខំប្រឹងប្រែងបំពេញការងារដោយស្មារតីទទួលខុសត្រូវខ្ពស់ របស់បណ្ឌិត្យសភានគរបាលកម្ពុជា នាយកដ្ឋានបុគ្គលិកនិងអង្គភាពចំណុះពាក់ព័ន្ធទាំងអស់ក្នុងការរៀបចំនិងចាត់ចែងឲ្យវគ្គបណ្តុះបណ្តាលនេះ ដំណើរការបានល្អនិងសម្រេចបានជោគជ័យ តាមផែនការដែលបានកំណត់។
ជាមួយគ្នានេះដែរ សម្តេចក្រហោម បានគូសបញ្ជាក់ថា ដើម្បីសម្រេចនូវគោលនយោបាយកំណែទម្រង់កងកម្លាំងប្រដាប់អាវុធរាជរដ្ឋាភិបាល និងដោយយោងតាមស្ថានភាព នៃក្របខណ្ឌមន្ត្រីនគរបាលជាតិមិនទាន់គ្រប់គ្រាន់ ក្រសួងមហាផ្ទៃ បានដាក់ចេញនូវផែនការប្រចាំឆ្នាំ ក្នុងការជ្រើសមន្ត្រីនគរបាលថ្មី ដើម្បីបំពេញបន្ថែមនិងបន្តវេន និងធានាបាននូវនិរន្តរភាពនៃរដ្ឋបាលសារធារណៈក្នុងការរក្សាសន្តិសុខនិងសណ្តាប់សារធារណៈជូនសង្គមជាតិ។
បន្ថែមពីនេះ សម្តេចក្រឡាហោម បានគាំទ្រនូវវិធានការរបស់បណ្ឌិត្យសភា ក្នុងការពង្រឹងនិងលើកកម្ពស់គុណភាពអប់រំបណ្តុះបណ្តាលគ្រប់កម្រិត ពីព្រោះក្រសួងត្រូវការមន្ត្រីនគរបាលដែលមានសមត្ថភាព ដើម្បីលើកកម្ពស់ប្រសិទ្ធភាពការងារ ៕
ចំនួនអ្នកទស្សនា
- ថ្ងៃនេះ1441
- ម្សិលមិញ16391
- សប្តាហ៍នេះ47671
- ខែនេះ162821
- ឆ្នាំនេះ162821
- សរុប20605277