បាត់ដំបង ៖ ជនសង្ស័យ​ដែលជា​មុខសញ្ញា​ចែកចាយ​គ្រឿងញៀន​យ៉ាងសកម្ម​ម្នាក់​ត្រូវបាន​កម្លាំង សមត្ថកិច្ច​ចាប់ខ្លួនបាន​នៅ​ក្នុងករណី​ជាក់ស្តែង​បន្ទាប់ពី​កម្លាំង​បានធ្វើ​ការតាមប្រមាញ់​អស់​រយៈពេល​ជា​យូរ​មកហើយ រហូត​ឈានដល់​ការចាប់ខ្លួន រួម​ជាមួយនឹង​ថ្នាំញៀន​ជាង​៣០០ គ្រាប់​ផងដែរ ។​

កិច្ចប្រតិបត្តិការ​នេះ​បាន​ប្រព្រឹត្តឡើង​នៅវេលា​ម៉ោង​១១ ថ្ងៃទី​២៥ ខែកក្កដា ឆ្នាំ​២០១៧ ដោយ​កម្លាំង​បាន​ចុះបង្ក្រាប​ករណី​ជួញ​ដោយ​ខុសច្បាប់​នូវ​សារធាតុ​ញៀន មួយកន្លែង​ស្ថិតនៅ​ក្នុងភូមិ​អូរ​ថ្មី ឃុំ​ពេជ្រ​ចិន្តា ស្រុក​ភ្នំព្រឹក ខេត្តបាត់ដំបង ដោយបាន​ឃាត់ខ្លួន​ជនសង្ស័យ​ម្នាក់​ផងដែរ ខណៈដែល​ជននេះ​កំពុង​ប្រព្រឹត្ត​នូវ​សកម្មភាព​ជាក់ស្តែង ។​

​មុខសញ្ញា​ដែល​សមត្ថកិច្ច​ចាប់ខ្លួន​មាន ឈ្មោះ អ៊ុំ វី ភេទ​ប្រុស អាយុ​៤២​ឆ្នាំ រស់នៅ​ត្រង់ចំណុច​ខាងលើ ដោយបាន​ដកហូត​ថ្នាំញៀន​ប្រភេទ​យ៉ាម៉ា​ចំនួន ៣៣៩ គ្រាប់ ដែល​ជននេះ​បាន​លាក់ទុក​សម្រាប់ធ្វើ​ការចែក​ចាយ​។​

​បច្ចុប្បន្ន សមត្ថកិច្ច​កំពុង​កសាង​សំណុំរឿង​ដើម្បី​បញ្ជូន​ខ្លួន រួម​ជាមួយនឹង​វត្ថុតាង​ទៅកាន់​សាលាដំបូង​ខេត្ត​ក្នុងការ​ចាត់វិធានការ​តាមផ្លូវ​ច្បាប់ ៕