លួចខ្សែភ្លើងពេលល្ងាច ព្រឹកឡើងត្រូវសន្តិសុខចាប់ឲ្យសមត្ថកិច្ច
27-July-2017 | ដោយ ពល បញ្ញា
ភ្នំពេញ ៖ កាលពីថ្ងៃទី២៥ ខែកក្កដា ឆ្នាំ២០១៧ វេលាម៉ោង២០និង ៣០នាទី កម្លាំងប៉ុស្តិ៍ភ្នំពេញថ្មី បានធ្វើការឃាត់ខ្លួនជនសង្ស័យម្នាក់ពាក់ព័ន្ធករណីលួច (លួចយកខ្សែភ្លើងកំណាត់ចំនួន ៤ការ៉ុង) នៅចំណុចក្នុងបូរីជីបម៉ុងលែន ផ្ទះសង់ថ្មី ផ្លូវបេតុង ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ។
លោកវរសេនីយ៍ត្រី គួក សុខហួ អធិការរងនគរបាលខណ្ឌសែនសុខបានឲ្យដឹងថាជនសង្ស័យឈ្មោះ សុន ចាន់ថន ភេទប្រុស អាយុ៣៨ឆ្នាំ មុខរបរចុងភៅក្រុមហ៊ុន ស្នាក់នៅផ្ទះជួល ផ្លូវបេតុង ភូមិបាយ៉ាប សង្កាត់ ភ្នំពេញថ្មី ខណ្ឌសែនសុខ។ ចំណែកជនរងគ្រោះឈ្មោះ កែវ រតនា ភេទប្រុស អាយុ ៥៦ឆ្នាំ មុខរបរសនិ្តសុខឯកជន ស្នាក់នៅផ្ទះលេខ៤១៨ ផ្លូវលំ ភូមិជើងឯក សង្កាត់ជើងឯក ខណ្ឌដង្កោ ។
សម្ភារៈដកហូត ៖ កំណាត់ខ្សែរភ្លើងចំនួន៤ការ៉ុង, កង់ទូកត្រីដៃត្រង់ចំនួន ១។
លោកអធិការរងបន្តថាមុនពេលកើតហេតុ ជនសង្ស័យបានធ្វើសកម្មភាពយកកង់ដឹកកំណាត់ខ្សែរភ្លើងចំនួន ៤ការ៉ុង ដែលក្រុមហ៊ុនទុកនៅក្នុងបូរី រហូតដល់ខាងកើតរបងបូរីក៏ត្រូវសន្តិសុខឃើញ ភ្លាមនោះជនសង្ស័យបានផ្តួលកង់និងកំណាត់ខ្សែភ្លើងរត់ គេចខ្លួន។ លុះព្រឹកឡើងថ្ងៃទី២៦ ខែកក្កដា ឆ្នាំ២០១៧ វេលាម៉ោងប្រហែល១០ និង១០នាទី សន្តិសុខរបស់ក្រុមហ៊ុនជីបម៉ុងលែនឃើញជនសង្ស័យឈរនៅក្នុងបរិវេណបូរី ក៏នាំខ្លួនប្រគល់ឲ្យសមត្ថកិច្ចប៉ុស្តិ៍ភ្នំពេញថ្មីតែម្តង ៕
ចំនួនអ្នកទស្សនា
- ថ្ងៃនេះ3041
- ម្សិលមិញ16391
- សប្តាហ៍នេះ49271
- ខែនេះ164421
- ឆ្នាំនេះ164421
- សរុប20606877