នគរបាលចាប់ខ្លួនជនសង្ស័យ២នាក់និងដកហូតថ្នាំញៀនចំនួន៣កញ្ចប់នៅស្រុកពញាឮ
29-July-2017 | ដោយ ពល បញ្ញា
កណ្ដាល ៖ នគរបាលចាប់ខ្លួនជនសង្ស័យ២នាក់ រួមទាំងដកហូតថ្នាំញៀន បញ្ជូនមកកាន់អធិការដ្ឋាននគរបាលស្រុកចាត់ការតាមនីតិវិធីច្បាប់ បន្ទាប់ពីជនសង្ស័យទាំង២នាក់នេះធ្វើសកម្មភាពជួញដូរដោយខុសច្បាប់នូវសារធាតុញៀន ។ ករណីចាប់ខ្លួនខាងលើនេះធ្វើឡើងនៅវេលាម៉ោង១៥និង៤៥នាទីថ្ងៃទី២៨ ខែកក្កដា ឆ្នាំ២០១៧ ស្ថិតក្នុងភូមិស្លែង ឃុំជ្រៃលាស់ ស្រុកពញាឮ ខេត្តកណ្តាល ។
មន្ត្រីនគរបាលស្រុកពញាឮបានឲ្យដឹងថា ជនសង្ស័យឈ្មោះ គឹង សារ៉ាត់ ភេទប្រុស អាយុ២៣ឆ្នាំជនជាតិខ្មែរ មុខរបរ កម្មករ និងម្នាក់ទៀតឈ្មោះ អៀង សាហាក់ ភេទប្រុស អាយុ២៤ឆ្នាំ ជនជាតិខ្មែរមុខរបរកម្មករ ។ ជនសង្ស័យទាំង២នាក់មានទីលំនៅភូមិស្លែង ឃុំជ្រៃលាស់ ស្រុកពញាឮ ខេត្តកណ្តាល ។ដោយឡែកវត្ថុតាងដកហូតបានមានថ្នាំញៀនប្រភេទមេតំហ្វេតាមីនហៅម៉ាទឹកកកចំនួន ៣កញ្ចប់តូចនិងទូរស័ព្ទដៃមួយគ្រឿងផងដែរ ។
ប្រភពដដែលបន្ដថា ជនសង្ស័យខាងលើគឺជាមុខសញ្ញាជួញដូរគ្រឿងញៀនយ៉ាងសកម្មក្នុងភូមិសាស្ដ្រឃុំជ្រៃលាស់ កន្លងមកសមត្ថកិច្ចបានតាមដានក្រុមជនសង្ស័យខាងលើជាយូរមកហើយ ។ លុះមកដល់ថ្ងៃទី២៨ ខែកក្កដា ឆ្នាំ២០១៧ សមត្ថកិច្ចនគរបាលផ្នែកប្រឆាំងគ្រឿងញៀនស្រុកបានទទួលព័ត៌មានច្បាស់ការថា មានមុខសញ្ញាក្រុមជនសង្ស័យខាងលើកំពុងធ្វើសកម្មភាពជួញដូរថ្នាំញៀន ភ្លាមនោះសមត្ថកិច្ចនគរបាលស្រុកសហការជាមួយកម្លាំងនគរបាលប៉ុស្ដិ៍រដ្ឋបាលជ្រៃលាស់ ចុះបង្ក្រាបឆែកឆេរជនសង្ស័យរហូតរកឃើញថ្នាំញៀនចំនួន៣កញ្ចប់តូច ឈានដល់ធ្វើការឃាត់ខ្លួនជនសង្ស័យទាំង២នាក់បញ្ជូនមកកាន់អធិការដ្ឋាននគរបាលស្រុកដើម្បីចាត់ការតាមច្បាប់ ៕
ចំនួនអ្នកទស្សនា
- ថ្ងៃនេះ3961
- ម្សិលមិញ16391
- សប្តាហ៍នេះ50191
- ខែនេះ165341
- ឆ្នាំនេះ165341
- សរុប20607797