ទីតាំងលួចបើកល្បែងស៊ីសងខុសច្បាប់ ត្រូវសមត្ថកិច្ចខណ្ឌឫស្សីកែវបង្ក្រាប
14-August-2017 | ដោយ ពល បញ្ញា
ភ្នំពេញ ៖ កម្លាំងជំនាញនៃអធិការដ្ឋាននគរបាលខណ្ឌឫស្សីកែវ សហការជាមួយគណៈបញ្ជាការឯកភាពខណ្ឌ បានបើកកិច្ចប្រតិបត្តិការបង្ក្រាបទៅលើទីតាំងលេងល្បែងស៊ីសងប្រភេទ(ហ្គេមបាញ់ត្រី)២កន្លែង ស្ថិតនៅចំណុចផ្លូវរថភ្លើង ក្រុម ភូមិបាក់ទូក សង្កាត់ទួលសង្កែ១ នៅថ្ងៃទី១៤ ខែសីហា ឆ្នាំ២០១៧ វេលាម៉ោង០៩និង៤០នាទី។
លោកវរសេនីយ៍ឯក ទៀង ចាន់សា អធិការខណ្ឌឫស្សីកែវបានឲ្យដឹងថាចំពោះទីតាំងខាងលើនេះ សមត្ថកិច្ចធ្លាប់បានបើកការបង្ក្រាបម្តងរួចមកហើយកាលពីដើមខែមិថុនា ឆ្នាំ២០១៧ នឹងបានកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់ ប៉ុន្តែសមាសភាពខាងលើនៅតែបន្តលបលួចបើកល្បែងស៊ីសងប្រភេទហ្គេមបាញ់ត្រីនេះដដែល ទើបអធិការដ្ឋាន នឹងគណៈបញ្ជាការឯកភាពតែងតែពិនិត្យជាប់ជាប្រចាំនៅពេលឃើញមានសកម្មភាពក៏បើកការបង្ក្រាបជាក់ស្តែងតែម្តង។
លោកអធិការបន្តថាក្នុងប្រតិបត្តិការនេះសមត្ថកិច្ច បានធ្វើការឃាត់មនុស្សចំនួន ៣នាក់ រួមមានៈ ទី១-ឈ្មោះ សុខ ម៉ៅ ភេទប្រុស អាយុ៤៤ឆ្នាំ ជនជាតិខ្មែរ ស្នាក់នៅបន្ទប់ជួល ភូមិបាក់ទូក សង្កាត់ទួលសង្កែ (អ្នកលេងនិងប្រើប្រាស់គ្រឿងញៀន), ទី២-ឈ្មោះ ផែន សុខវិសាល ភេទប្រុស អាយុ១៥ឆ្នាំ ជនជាតិខ្មែរ ស្នាក់នៅបន្ទប់ជួល ភូមិបាក់ទូក សង្កាត់ទួលសង្កែ (អ្នកលេងនិងប្រើប្រាស់គ្រឿងញៀន),ទី៣-ឈ្មោះ អ៊ុំ ដាវី ភេទស្រី អាយុ៣៦ឆ្នាំ ជនជាតិខ្មែរ មុខរបរសិល្បៈ ស្នាក់នៅបន្ទប់ជួល ភូមិបាក់ទូក សង្កាត់ទួលសង្កែ (ប្រើប្រាស់គ្រឿងញៀន)។
វត្ថុតាងដកហូតរួមមានៈ ទូរហ្គេមបាញ់ត្រីចំនួនពីរ, ក្រាមពណ៌សថ្លាចំនួន ៥កញ្ចប់, ជញ្ជីងថ្លឹងគ្រឿងញៀនចំនួនមួយ, ថង់សម្រាប់ច្រកគ្រឿងញៀនមួយចំនួន, ឧបករណ៍ប្រើប្រាស់គ្រឿងញៀនមួយចំនួន។
បច្ចុប្បន្នកម្លាំងជំនាញ កំពុងកសាងសំណុំរឿងបញ្ជូនតាមនីតិវិធីទៅសាលាដំបូងរាជធានី ៕
ចំនួនអ្នកទស្សនា
- ថ្ងៃនេះ6211
- ម្សិលមិញ16391
- សប្តាហ៍នេះ52441
- ខែនេះ167591
- ឆ្នាំនេះ167591
- សរុប20610047