បាញ់សម្លាប់ប្រពន្ធស្លាប់និងបាញ់សម្លាប់ខ្លួនឯងតាមក្រោយព្រោះរឿងប្រចណ្ឌ
28-August-2017 | ដោយ ពល បញ្ញា
ភ្នំពេញ ៖ បុរសម្នាក់បានបាញ់សម្លាប់ប្រពន្ធហើយបាញ់ខ្លួនឯងស្លាប់តាមក្រោយ កាលពីថ្ងៃទី២៧ ខែសីហា ឆ្នាំ២០១៧ វេលាម៉ោង១៨និង២០នាទី នៅផ្ទះគ្មានលេខ ផ្លូវលេខ ២១ បេតេ ក្រុមទី៣ ភូមិ សន្សំកុសល្យ១ ខណ្ឌមានជ័យ។លោកវរសេនីយ៍ឯក លន់ មុនីរ័ត្ន ប្រធានការិយាល័យវិទ្យាសាស្ត្របច្ចេកទេសនិងកោសល្យវិច្ច័យ នៃស្នងការដ្ឋាននគរបាលរាជធានីភ្នំពេញ បានឲ្យដឹងថាសពទី១-ឈ្មោះ ខៀវ កូណែល ភេទប្រុស អាយុ ៣៤ឆ្នាំ មុខរបរនគរបាលបម្រើការនៅស្នងការដ្ឋាននគរបាលរាជធានីភ្នំពេញ ទីលំនៅផ្ទះកើតហេតុខាងលើ។
ស្នាមគ្រាប់ចូលនៅលើសៀតផ្កាស្តាំទៅធ្លាយចេញក្បាលខាងឆ្វេងលើស្លឹកត្រចៀក និងសពទី២-ឈ្មោះ យ៉េង លក្ខិណា ហៅ តុប អាយុ៣៧ឆ្នាំ មុខរបរ បុគ្គលិកវិទ្យុទន្លេ ទីលំនៅផ្ទះកើតហេតុ ត្រូវជាប្រពន្ធ។ ស្នាមគ្រាប់ចូលនៅនៅលើចិញ្ចើមស្តាំទៅធ្លាយចេញថ្ពាល់ឆ្វេង។
តាមការបំភ្លឺពីឈ្មោះ យ៉េង ស៊ីណា ភេទស្រី ត្រូវជាម្តាយក្មេកនិងឈ្មោះ យ៉េង ចរិយា ភេទប្រុស ត្រូវជាប្អូនថ្លៃលោក ខៀវ កូ ណែល បានបញ្ជាក់ថា កន្លងមកពីរនាក់ប្តីប្រពន្ធមានការប្រចណ្ឌគ្នាទៅវិញទៅមកស្ទើតែរាល់ថ្ងៃ លុះដល់ថ្ងៃកើតហេតុខាងលើម្តាយក្មេកនិងប្អូនថ្លៃកំពុងអង្គុយលេងនៅខាងក្រោមចំណែកឈ្មោះយ៉េង លក្ខិណា នៅដេកក្នុងបន្ទប់ជាន់ទី១ ពេលនោះកូនប្រសារខ្ញុំបានជិះឡានមកដល់ផ្ទះក៏សួរកូនប្រុសខ្ញុំឈ្មោះយ៉េង ចរិយាថា អត់ទៅធ្វើការទេឬកូនខ្ញុំឆ្លើយថា អត់ស្រួលខ្លួនរួចក៏ដើរឡើងទៅលើបាត់ចំណែកខ្ញុំនិងកូនខ្ញុំនៅខាងក្រោម មួយសន្ទះស្រាប់តែឮសូរផ្ទះអាវុធតែមិនដឹងប៉ុន្មានគ្រាប់ខ្ញុំក៏នាំគ្នាស្ទុះឡើងទៅឃើញកូនប្រសារខ្ញុំស្លាប់នៅគែមគ្រែក្បាលក្រាបលើពូកបាត់ទៅហើយចំណែកកូនស្រីរបស់ខ្ញុំដេកនៅលើគ្រែពូកមានហូរឈាមនៅដង្ហើមកូនប្រុសខ្ញុំឈ្មោះយ៉េង ចរិយាក៏ដឹកកូនស្រីខ្ញុំមកមន្ទីរពេទ្យមិត្តភាពខ្មែរ-សូវៀត ពេលមកដល់គ្រូពេទ្យពិនិត្យរួចប្រាប់ថា ស្លាប់បាត់ហើយ។
វត្ថុតាងនៅកន្លែងកើតហេតុៈ អាវុធខ្លីមួយដើមម៉ាកឡុកលេខGSSF៥៩៦, គ្រាប់ចំនួន១៤ សំបកគ្រាប់០២, ក្បាលគ្រាប់០២។
ក្រោយការធ្វើកោសល្យវិច្ច័យនិងត្រួតពិនិត្យកន្លែងកើតហេតុរួចមក កម្លាំងជំនាញសន្និដ្ឋានថាហេតុការណ៍ខាងលើពិតជាករណីបាញ់សម្លាប់ប្រពន្ធនិងបាញ់ខ្លួនឯងពិតប្រាកដមែន ហើយសពត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
ចំនួនអ្នកទស្សនា
- ថ្ងៃនេះ1051
- ម្សិលមិញ9421
- សប្តាហ៍នេះ56711
- ខែនេះ171861
- ឆ្នាំនេះ171861
- សរុប20614317