បើកគោយន្តឡើងផ្លូវជាតិមិនប្រយ័ត្នត្រូវរថយន្តបុកប៉ើងរបួសធ្ងន់ម្នាក់
11-September-2017 | ដោយ ពល បញ្ញា
បាត់ដំបង ៖ បុរសវ័យចំណាស់ម្នាក់ បានរងរបួសយ៉ាងធ្ងន់ធ្ងរ និងត្រូវបានបញ្ជូនទៅកាន់មន្ទីរពេទ្យបង្អែកស្រុកដើម្បីសង្គ្រោះ ខណៈដែលបុរសរូបនេះបានបើកបរគោយន្តកន្ត្រៃចេញពីផ្ទះ ឡើងទៅលើផ្លូវជាតិដោយខ្វះការប្រុងប្រយ័ត្ន ក៏ត្រូវរថយន្តបុកពីចំហៀងយ៉ាងពេញទំហឹងតែម្តង ។
យោងតាមរបាយការណ៍របស់សមត្ថកិច្ចបានអោយដឹងថា ករណីគ្រោះថ្នាក់ចរាចរណ៍នេះបានកើតឡើងនៅវេលាម៉ោង ៦ និង ១៥ នាទី ព្រឹកថ្ងៃទី ១១ ខែកញ្ញា ឆ្នាំ២០១៧តាមបណ្តោយផ្លូវជាតិលេខ៥ ត្រង់ចំណុចក្រុមទី៣ ភូមិកាឡោមភ្លុក ឃុំព្រៃស្វាយ ស្រុកមោងឫស្សី ខេត្តបាត់ដំបង រវាងរថយន្ត និងគោយន្តកន្ត្រៃ ។
របាយការណ៍បានបន្តថា នៅមុនពេលកើតហេតុគឺមានរថយន្តមួយគ្រឿង ម៉ាកហ៊ីយ៉ាន់ដាយ ប្រភេទ ដឹកខ្សាច់ ពាក់ស្លាកលេខ តាកែវ 3D-2379 អ្នកបើកបរ ឈ្មោះ តាំង រាជ ភេទប្រុស អាយុ២៤ឆ្នាំ រស់នៅភូមិព្រៃផ្តៅ ឃុំសំបូរ ស្រុកទ្រាំង ខេត្តតាកែវ បានបើកបរក្នុងទិសដៅពីលិចទៅកើត ។
លុះនៅពេលដែលរថយន្តនេះបានមកដល់ត្រង់ចំណុចកើតហេតុខាងលើ ក៏ស្រាប់តែមានគោយន្តកន្ត្រៃកូនកាត់សណ្តោងរ៉ឺម៉កមួយគ្រឿង ដែល បើកបរដោយឈ្មោះ ដៀង វឹង ភេទប្រុស អាយុ៥១ឆ្នាំ មុខរបរធ្វើស្រែ រស់នៅភូមិកាឡោមភ្លុក ឃុំព្រៃស្វាយ ស្រុកមោងឫស្សី ខេត្តបាតដំបង បានបើកចេញពីផ្ទះឡើងទៅលើផ្លូវជាតិដោយមិនបានមើលមុខ មើលក្រោយ ទើបត្រូវរថយន្តនោះបុកចំពីចំហៀងយ៉ាងពេញទំហឹងតែម្តងធ្វើអោយអ្នកបើកបរគោយន្តផ្លោងធ្លាក់ទៅលើទ្រូងផ្លូវ បណ្តាលអោយរងរបួសត្រង់ក្បាលយ៉ាងធ្ងន់ធ្ងរ រីឯរថយន្តក៏បានជ្រុលចង្កូតក្រឡាប់តែម្តង ដោយភ្លាមៗនោះជនរងគ្រោះត្រូវ ក្រុមគ្រួសារបញ្ជូនទៅមន្ទីរពេទ្យបង្អែកស្រុកមោងឫស្សីចំណែករថយន្ត និងគោយន្តកន្ត្រៃ ត្រូវបានប៉ូលីសយកទៅរក្សាទុកនៅអធិការដ្ឋាននគរបាលស្រុកមោងឫស្សី ជាបណ្តោះអាសន្នរង់ចាំធ្វើការដោះស្រាយជាក្រោយ ៕
ចំនួនអ្នកទស្សនា
- ថ្ងៃនេះ2731
- ម្សិលមិញ9421
- សប្តាហ៍នេះ58391
- ខែនេះ173541
- ឆ្នាំនេះ173541
- សរុប20615997