​ភ្នំពេញ ៖ មុខសញ្ញា​ជួញដូរ​សារធាតុ​ខុសច្បាប់​ម្នាក់​ត្រូវបាន​កម្លាំង​នគរបាល​ប៉ុស្តិ៍​ចោមចៅ សហការ​ជាមួយ​កម្លាំង​អន្តរាគមន៍​ខណ្ឌ​ពោធិ៍​សែន​ជ័យ​បង្ក្រាប​ជាក់ស្តែង កាលពី​ថ្ងៃទី​យប់​ថ្ងៃទី​២៩ ខែកញ្ញា ឆ្នាំ​២០១៧ ស្ថិត​ក្នុងភូមិ​ថ្មគោល សង្កាត់​ចោមចៅ ខណ្ឌ​ពោធិ៍​សែន​ជ័យ រាជធានី​ភ្នំពេញ ។​

​លោក​វរសេនីយ៍ឯក យឹម សារ៉ាន់ អធិការ​ខណ្ឌ​ពោធិ៍​សែន​ជ័យ​បាន​ឲ្យ​ដឹងថា​ជនសង្ស័យ​ឈ្មោះ ណុប ត្រា ហៅ​អា​ខ្មៅ ភេទ​ប្រុស អាយុ​១៩​ឆ្នាំ មុខរបរ​លក់​គ្រឿងញៀន ស្នាក់នៅ​ថ្មគោល សង្កាត់​ចោមចៅ ខណ្ឌ​ពោធិ៍​សែន​ជ័យ ។ សមត្ថកិច្ច​បាន​ដកហូត​បាន​វត្ថុតាង ៖ ក្រាម​ស​ថ្លា​ចំនួន​១៧​កញ្ចប់​ថង់​តូច​។​

​លោក​អធិការ​បន្តថា​មុនពេល​ឃាត់ខ្លួន​ជនសង្ស័យ​ខាងលើ​កម្លាំង​នគរបាល​ប៉ុស្តិ៍​ចោមចៅ សហការ​ជាមួយ​កម្លាំង​អន្តរាគមន៍​នៃ​អធិការនគរបាល​ខណ្ឌ​ពោធិ៍​សែន​ជ័យ ចុះ​ល្បាត​ក្នុង​តំបន់​ស្មុកស្មាញ​ជាពិសេស​កន្លែងកើតហេតុ​លើ ក៏​ប្រទះឃើញ​ជនសង្ស័យ ៥​នាក់​កំពុង​អង្គុយ​លើ​គ្រែ ដោយ​កម្លាំង​មានការ​សង្ស័យ បាន​ឈប់​សួរនាំ ភ្លាមនោះ​ជនសង្ស័យ​ចំនួន ៤​នាក់​បាន​រត់គេចខ្លួន​បាត់អស់​នៅសល់តែ​ជនសង្ស័យ​ម្នាក់​ឈ្មោះ ណុប ត្រា ហៅ​អា​ខ្មៅ បន្ទាប់មក​កម្លាំង​សមត្ថកិច្ច​យើង​បាន​ឆែកឆេរ​រកឃើញ​ថ្នាំញៀន​ក្រាម​ពណ៌​ថ្លា​ចំនួន​១៧​នៅក្រោម​គ្រែ ដែល​ជនសង្ស័យ​អង្គុយ ទើប​កម្លាំង​សមត្ថកិច្ច​បាន​នាំខ្លួន​ជនសង្ស័យ​ខាងលើ​មក​សួរនាំ​នៅ​ប៉ុស្តិ៍​តែម្តង​។ ក្រោយពី​សួរនាំ ជនសង្ស័យ​បាន​សារភាពថា​គ្រឿងញៀន​នេះ​ខ្លួន​ទុក​លក់​ចែកចាយ​បន្ត​។​

​បច្ចុប្បន្ន​ជនសង្ស័យ​ទាំង​រួម​និង​វត្ថុតាង ត្រូវបាន​បញ្ចូនទៅ​អោយ​ផ្នែក​ជំនាញ​ប្រឆាំង​គ្រឿងញៀន​នៃ​អធិការ​ដ្ធា​ន​នគរបាល​ខណ្ឌ​ពោធិ៍​សែន​ជ័យ ដើម្បី​ចាត់ការ​បន្ត ៕


​