បុរសម្នាក់ត្រូវជនសង្ស័យជាមុខសញ្ញាជួញដូរថ្នាំញៀនបាញ់ប្រហារបណ្ដាលឲ្យរបួសធ្ងន់
03-October-2017 | ដោយ ពល បញ្ញា
កណ្ដាល ៖ បុរសម្នាក់ដែលជាមុខសញ្ញាជួញដូរគ្រឿងញៀនទើបចេញពីពន្ធនាគារដកកាំភ្លើងបាញ់ប្រហារ បណ្ដាលឲ្យរបួសធ្ងន់។ករណីនេះបានកើតឡើងកាលពីវេលាម៉ោង១០និង៣០នាទី ថ្ងៃទី១ ខែតុលាឆ្នាំ២០១៧ ត្រង់ចំណុចលើផ្លូវលំទំនប់ដីចិន ស្ថិតក្នុងភូមិឬស្សីស្រុក២ ឃុំឈើទាល ស្រុកកៀនស្វាយ ខេត្តកណ្ដាល ។
មន្ដ្រីនគរបាលស្រុកកៀនស្វាយបានឲ្យដឹងថា ជនរងគ្រោះឈ្មោះ ញ៉ាន ពិសី ភេទប្រុស អាយុ១៩ឆ្នាំ ជនជាតិខ្មែរ មុខរបរកសិករ (រងរបួសធ្ងន់ត្រូវកំភួនដៃស្ដាំ ធ្លាយមកត្រូវពោះខាងស្ដាំ) រីឯជនសង្ស័យឈ្មោះ ឌី វីរៈ ហៅតាក់ ភេទប្រុស អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ (ជននេះគឺជាមុខសញ្ញាជួញដូរគ្រឿងញៀនទើបចេញពីពន្ធនាគារពីបទជួញដូរដោយខុសច្បាប់នូវសារធាតុញៀន)។ ជនសង្ស័យនិងជនរងគ្រោះមានទីលំនៅភូមិឬស្សីស្រុក២ ឃុំឈើទាល ស្រុកកៀនស្វាយ ខេត្តកណ្តាល ។ ចំណែកវត្ថុតាងដកហូតបានមានក្បាលគ្រាប់កាំភ្លើងខ្លី១គ្រាប់ ។
ប្រភពដដែលបន្ដថា នៅមុនពេលកើតហេតុជនរងគ្រោះទៅស៊ីឈ្នួលលីផ្លែចេករបស់ឈ្មោះ ម៉ៅ ស៊ីនឿន លុះដល់ពេលលីផ្លែចេករួចហើយជនរងគ្រោះបានត្រឡប់មកផ្ទះវិញ ខណៈមកដល់ចំណុចកើតហេតុស្រប់តែជនសង្ស័យឈ្មោះ ឌី វិរៈ បានជិះម៉ូតូស៊ុយហ្ស៊ូគីនិច ពណ៌ក្រហម មកកាន់ជនរងគ្រោះ រួចទាញកាំភ្លើងខ្លីបាញ់ទៅលើជនរងគ្រោះមួយគ្រាប់ដោយពុំដឹងជាមានមូលហេតុអ្វីនោះទេបណ្ដាល ឲ្យត្រូវចំកំភួនដៃខាងស្ដាំ ធ្លាយមកត្រូវពោះខាងស្ដាំទទួលរងរបួសធ្ងន់ រីឯជនសង្ស័យបានជិះម៉ូតូរត់គេចខ្លួនក្រោយធ្វើសកម្មភាពរួច
ក្រោយពីមានហេតុការណ៍កើងឡើង ជនរងគ្រោះត្រូវបានឈ្មោះម៉ៅ ស៊ីនឿន និងឈ្មោះ ពុំ បញ្ញាហៅយ៉ែ បានជួយដឹកបញ្ជូនទៅព្យាបាលនៅពេទ្យឯកជនឈ្មោះ ចំរើន តែដោយស្ថានភាពធ្ងន់ធ្ងរពេកជនរងគ្រោះត្រូវបានក្រុមគ្រួសារបញ្ជូនទៅព្យាបាលបន្ដនៅមន្ទីរពេទ្យកាល់ម៉ែត្រ រាជធានីភ្នំពេញ។ ករណីខាងលើនេះ កម្លាំងសមត្ថកិច្ចកំពុងស្រាវជ្រាវស៊ើបអង្កេតបន្ដរកមុខសញ្ញាដើម្បីចាប់ខ្លួនជនសង្ស័យចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ5281
- ម្សិលមិញ9421
- សប្តាហ៍នេះ60941
- ខែនេះ176091
- ឆ្នាំនេះ176091
- សរុប20618547