រថយន្តក្រុងក្រុមហ៊ុនG.S.Tបើកលឿនជ្រុលទៅបុករថយន្តធុនធំដឹកទំនិញពីក្រោយ បណ្តាលខ្ទេចមុខតែគ្មានអ្នករងគ្រោះ
05-October-2017 | ដោយ ពល បញ្ញា
បន្ទាយមានជ័យ ៖ រថយន្តក្រុងរបស់ក្រុមហ៊ុនG.S.Tបើកលឿនឡើងជែងរថយន្តមួយគ្រឿងទៀត ហើយជ្រុលទៅបុករថយន្តធុនធំដឹកទំនិញពីក្រោយបណ្តាលខ្ទេចមុខតែគ្មានអ្នករងគ្រោះ។ ហេតុការណ៍គ្រោះថ្នាក់ខាងលើកើតឡើងនៅម៉ោង៥៖៣០នាទីទៀបភ្លឺថ្ងៃទី០៥ ខែតុលា ឆ្នាំ២០១៧ នៅតាមបណ្តោយផ្លូវជាតិលេខ៥ ស្ថិតភូមិ/សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។
លោកវរសេនីយ៍ទោ ធិន ស៊ិនដេត អធិការនគរបាលក្រុងប៉ោយប៉ែតបានឲ្យដឹងថា នៅមុនពេលគ្រោះថ្នាក់ចរាចរណ៍កើតឡើងមានរថយន្តក្រុងក្រុមហ៊ុនG.S.Tបានដឹកអ្នកដំណើរពីភ្នំពេញមកក្រុងប៉ោយប៉ែត បើកបរតាមបណ្តោយផ្លូវជាតិលេខ៥ ក្នុងទិសដៅពីកើតមកលិចក្នុងល្បឿនលឿនពេលមកដល់កន្លែងកើតហេតុបានជែងរថយន្តមួយគ្រឿងទៀតនៅខាងមុខ ពេលជែងនោះរថយន្តបង្កហេតុបានជួបឧបសគ្គខាងមុខហើយ ក៏ជ្រុលទៅបុករថយន្តដឹកទំនិញធុនធំមួយគ្រឿងបណ្តាលឲ្យខ្ទិចមុខ។
លោកបានបញ្ជាក់ថា មូលហេតុដែលគ្រោះថ្នាក់ចរាចរណ៍កើតឡើងទាំងព្រលឹមអុលនេះ បណ្តាលមកពីរថយន្តក្រុងក្រុមហ៊ុនG.S.Tបើកគ្មានការប្រុងប្រយ័ត្ន។ ក្រោយកើតហេតុកម្លាំងជំនាញបាន វាស់វែងយករថយន្តបង្កទៅរក្សាទុកនៅអធិការដ្ឋាននគរបាលក្រុងប៉ោយប៉ែត ៕
ចំនួនអ្នកទស្សនា
- ថ្ងៃនេះ4561
- ម្សិលមិញ9421
- សប្តាហ៍នេះ60221
- ខែនេះ175371
- ឆ្នាំនេះ175371
- សរុប20617827