ឃាត់ខ្លួន២នាក់ប្តីប្រពន្ធករណីរក្សាទុកថ្នាំញៀននៅខណ្ឌមានជ័យ
07-October-2017 | ដោយ ពល បញ្ញា
ភ្នំពេញ ៖ សមត្ថកិច្ចចម្រុះរបស់គណៈបញ្ជាការឯកភាពរដ្ឋបាលខណ្ឌមានជ័យធ្វើការឃាត់ខ្លួនមុនដំបូងបុរសជាប្តីដោយឆែកឆេររកឃើញមានលាក់ទុកថ្នាំញៀន មួយកញ្ចប់តូចក្នុងប្រអប់បារី ដោយគិតថាបុរសជាប្តីនោះជាអ្នកសេពថ្នាំញៀនមិនពាក់ព័ន្ធនឹងប្រពន្ធនោះទេ។
ក្រោយពីធ្វើតេស្តទឹកនោមស្ត្រីជាប្រពន្ធទើបដឹងថា ស្ត្រីជាប្រពន្ធក៏មានសារធាតុផងដែរនោះសមត្ថកិច្ចក៏សម្រេចចិត្តធ្វើការឃាត់ទាំង២នាក់ប្តីប្រពន្ធតែម្តង។
ហេតុការណ៍ឃាត់ខ្លួននេះ បានធ្វើឡើងនៅវេលាម៉ោងជាង៨យប់ថ្ងៃទី៦ ខែតុលា ឆ្នាំ២០១៧ នៅចំណុចមុខវត្តនន្ទមុនី លើកំណាត់ផ្លូវ២១៧ សង្កាត់ស្ទឹងមានជ័យ ខណ្ឌមានជ័យខណៈដែលសមត្ថកិច្ចចម្រុះដាក់គោលដៅឆែកឆេរ និងត្រួតពិនិត្យអាវុធជាតិផ្ទុះដែលដឹកនាំដោយលោក ឌី រ័ត្ឋខេមរុណ អភិបាល រង នៃគណៈអភិបាលខណ្ឌមានជ័យ។
ជនសង្ស័យមានឈ្មោះ ឌួង គង្គា អាយុ២០ និងប្រពន្ធឈ្មោះ សុខ លី អាយុ២៣ឆ្នាំ អ្នកទាំងពីរបម្រើការងារនៅក្លឹបខារ៉ាអូខេ ស្នាក់នៅផ្ទះជួលខាងក្រោយរោងភាពយន្តគីរីរម្យ សង្កាត់បឹងកេងកង២ ខណ្ឌចំការមន។
សមត្ថកិច្ចបានឲ្យដឹងថា ជនសង្ស័យពីរនាក់ប្តីប្រពន្ធជាអ្នកប្រើប្រាស់ថ្នាំ ញៀនពួកគេបានឌុបគ្នាទៅលេងផ្ទះឪពុកម្តាយនៅភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ។ពួកគេចេញពីលេងផ្ទះឪពុកម្តាយហើយក៏ជិះម៉ូតូទៅថ្នាំញៀននៅម្តុំក្លឹបមីតណាយមួយថង់តូចតម្លៃ២ម៉ឺនរៀលដើម្បីសេព។
សមត្ថកិច្ចបន្តថា ក្រោយពីទិញថ្នាំញៀនហើយ ពួកគេជិះម៉ូតូត្រឡប់ទៅ ផ្ទះរបស់ខ្លួនវិញនៅឯខាងក្រោយរោងភាពយន្តគីរីរម្យ ខណ្ឌចំការមន។ នៅពេលពួកគេជិះម៉ូតូឆ្លងកាត់គោលដៅឆែកឆេរត្រួតពិនិត្យអាវុធជាតិផ្ទុះសមត្ថកិច្ចយើងក៏បានឆែកឆេររកឃើញមានរក្សាទុកថ្នាំញៀនមួយថង់តូចនៅក្នុងប្រអប់បារីដាក់ក្នុងហោប៉ៅខោបុរសជាប្តីនោះ ហើយភ្លាមៗសមត្ថកិច្ចក៏ចាប់ឃាត់ខ្លួននាំមកកាន់ស្នាក់ការប៉ុស្តិ៍រដ្ឋបាលនគរបាលស្ទឹងមានជ័យ។ ក្នុងនោះសមត្ថកិច្ចបានដកហូតថ្នាំមួយកូនថង់តូច និងម៉ូតូមួយគ្រឿងម៉ាក Scopy ពណ៌ស ពាក់ស្លាកលេខភ្នំពេញ 1FG-2872 ។
សមត្ថកិច្ចបន្តថា ក្រោយពីសួរនាំហើយកម្លាំងប៉ុស្តិ៍រដ្ឋបាលស្ទឹងមានជ័យក៏កសាងសំណុំរឿងបញ្ជូនទៅកាន់អធិការដ្ឋាននគរបាលខណ្ឌមានជ័យ ដើម្បីចាត់ការបន្តទៅតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ5091
- ម្សិលមិញ9421
- សប្តាហ៍នេះ60751
- ខែនេះ175901
- ឆ្នាំនេះ175901
- សរុប20618357