សមត្ថកិច្ចចាប់ខ្លួនជនសង្ស័យបីនាក់ ពាក់ព័ន្ធករណីលួចគោប្រាំក្បាល
16-October-2017 | ដោយ ពល បញ្ញា
ពោធិ៍សាត់ ៖ ជនសង្ស័យ០៣នាក់ ត្រូវបានសមត្ថកិច្ចចាប់ឃាត់ខ្លួន ពាក់ព័ន្ធករណីលួចគោប្រជាពលរដ្ឋចំនួន០៥ក្បាល ឡើងឡានគោលបំណងយកទៅលក់បន្តនៅភ្នំពេញ កាលពីវេលាម៉ោង០៦ព្រឹកថ្ងៃទី១៥ ខែតុលា ឆ្នាំ២០១៧ នៅចំណុចអូរស្ពាន ក្នុងភូមិកំពែង ឃុំព្រងិល ស្រុកភ្នំក្រវាញ ខេត្តពោធិ៍សាត់ ។
តាមការរៀបរាប់របស់ម្ចាស់គោជាជនរងគ្រោះឈ្មោះ រ៉ុង សុផាត ភេទប្រុស អាយុ៣៧ឆ្នាំ រស់នៅភូមិកំពែង ឃុំព្រងិល ស្រុកភ្នំក្រវាញ បានប្រាប់សមត្ថកិច្ចអោយដឹងថា មុនពេលកើតហេតុ កាលពីថ្ងៃទី១៤ ខែតុលា ឆ្នាំ២០១៧ រូបគាត់បានយកគោញីឈ្មោលចំនួន០៥ក្បាល អោយស៊ីស្មៅ នៅចំណុចបោះរាំង ស្ថិតនៅភូមិ.ឃុំខាងលើ ខណៈពេលជនរងគ្រោះ ទៅយកគោអោយផឹកទឹក ស្រាប់តែបាត់គោអស់ពីចំណង ភ្លាមៗនោះ ជនរងគ្រោះបានដើររកតែមិនប្រទះឃើញគោរបស់គាត់ឡើយ រួចក៏ទៅប្តឹងសមត្ថកិច្ចប៉ុស្តិ៍នគរបាលរដ្ឋបាលព្រងិល រហូតដល់ថ្ងៃទី១៥ ម្សិលមិញវេលាម៉ោង០៦ព្រឹក ទើបប្រទះឃើញជនសង្ស័យ កំពុងដឹកគោឡើងឡាន ជនរងគ្រោះផ្តល់ព័ត៌មានជូនសមត្ថកិច្ច ចាប់ឃាត់ជនសង្ស័យជាបន្តបន្ទាប់ បានចំនួន០៣នាក់ ក្នុងចំណោមបក្សពួក០៥នាក់ ។
លោកវរសេនីយ៍ទោ វង សាវ៉េត អធិការនគរបាលស្រុកភ្នំក្រវាញ បានឲ្យដឹងថា ដោយមានការសម្របសម្រួលពីលោកព្រះអាជ្ញាសាលាដំបូងខេត្ត សមត្ថកិច្ចបានឃាត់ខ្លួនចំនួន០៣នាក់ទី១-ឈ្មោះ វិន សៀត ឈ្មោះក្នុងបញ្ជីជាតិ សុះ រ៉ូសៀត ជនជាតិខ្មែរ-ឥស្លាម ភេទប្រុស អាយុ៣៧ឆ្នាំ រស់នៅភូមិពោ ឃុំគា ស្រុកមោងឫស្សី ខេត្តបាត់ដំបង ជាអ្នកជួលរថយន្តមកដឹកគោ ទី២-ឈ្មោះ គង់ សា វ៉ាត ភេទប្រុស អាយុ៤៣ឆ្នាំ រស់នៅភូមិព្រែក៣ ឃុំសំរោង ស្រុកភ្នំក្រវាញ ខេត្តពោធិ៍សាត់ ទី៣-ឈ្មោះ លី ទូច ភេទប្រុស អាយុ៤៣ឆ្នាំ រស់នៅភូមិវាល ឃុំសំរោង ស្រុកភ្នំក្រវាញ ខេត្តពោធិ៍សាត់ ជាមេក្លោង ។ និងបក្សពួក០២នាក់ទៀតឈ្មោះ អៀ តាល់ ភេទប្រុស អាយុ៣២ឆ្នាំ រស់នៅភូមិកែវមុនី សង្កាត់បន្ទាយដី ក្រុង.ខេត្តពោធិ៍សាត់ រត់គេចខ្លួនបាត់ ចំណែកម្ចាស់រថយន្ត បានបើករថយន្តគេចខ្លួនបាត់សមត្ថកិច្ចមិនស្គាល់អត្តសញ្ញាណ។ ក្រោយពេលសមត្ថកិច្ចចាប់ឃាត់ខ្លួនជនសង្ស័យទាំងបីបានសារភាពប្រាប់សមត្ថកិច្ចថា ខ្លួនបានលួចគោរបស់ប្រជាបលរដ្ឋខាងលើ ដឹកឡើងឡាន ក្នុងគោលបំណងយកទៅលក់នៅភ្នំពេញ និងទិសខាងលិចស្រុកបាកាន។ ជនសង្ស័យទាំងបី បានបន្តថាក្រោយពេលឃើញសមត្ថកិច្ចពួកគេបានទម្លាក់គោ ចុះពីលើឡានព្រមៗគ្នា ខ្លះរត់គេចខ្លួននិងខ្លះទៀតត្រូវសមត្ថកិច្ចចាប់ខ្លួននៅនឹងកន្លែង តែទោះជាគេចយ៉ាងណាក៏ដោយ ក៏គេចមិនផុតពីក្រញាំសមត្ថកិច្ចឡើយ។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅតុលាការដើម្បីចាត់ការតាមច្បាប់ ចំពោះគោចំនួន០៥ក្បាលសមត្ថកិច្ចបានប្រគល់ជូនជនរងគ្រោះ រ៉ុង សុផាត នៅថ្ងៃទី១៥ ម្សិលមិញនេះ ៕
ចំនួនអ្នកទស្សនា
- ថ្ងៃនេះ5901
- ម្សិលមិញ9421
- សប្តាហ៍នេះ61561
- ខែនេះ176711
- ឆ្នាំនេះ176711
- សរុប20619167