នគរបាលចាប់ខ្លួនជនសង្ស័យម្នាក់លួចគាស់ផ្ទះប្រជាពរដ្ឋប្រមូលយកទ្រព្យសម្បត្តិនៅស្រុកខ្សាច់កណ្ដាល
20-October-2017 | ដោយ ពល បញ្ញា
កណ្ដាល ៖ ជនសង្ស័យម្នាក់ត្រូវបាននគរបាលស្រុកខ្សាច់កណ្ដាលធ្វើការចាប់ខ្លួន យកមកអធិការដ្ឋាននគរបាលស្រុកដើម្បីចាត់ការតាមច្បាប់ បន្ទាប់ពីជនសង្ស័យរូបនេះបានធ្វើសកម្មភាពចូលគាស់ផ្ទះដើម្បីលួចប្រមូលយកទ្រព្យសម្បត្តិ របស់ប្រជាពលរដ្ឋ។ ករណីខាងលើនេះកើតឡើងកាលពីវេលាម៉ោង១និង៣០នាទីរំលងអធ្រាត្រ ថ្ងៃទី១៩ ខែតុលា ឆ្នាំ២០១៧ ស្ថិតក្នុងភូមិកំពង់ចំលង ឃុំកំពង់ចំលង ស្រុកខ្សាច់កណ្តាល ខេត្តកណ្តាល ។
មន្ត្រីនគរបាលស្រុកខ្សាច់កណ្ដាលបានឲ្យដឹងថា ជនសង្ស័យចាប់ខ្លួនបានមានឈ្មោះ សែន ឈីវវៃភេទប្រុស អាយុ១៧ ឆ្នាំ ជនជាតិខ្មែរមុខរបរ កសិករ រីឯជនរងគ្រោះឈ្មោះ សែម ចន្ធូ ភេទស្រី អាយុ៣៤ឆ្នាំ ជនជាតិខ្មែរ មុខរបរ លក់ដូរ។ ជនសង្ស័យនិងជនរងគ្រោះមានទីលំនៅភូមិកំពង់ចំលង ឃុំកំពង់ចំលង ស្រុកខ្សាច់កណ្តាល ខេត្តកណ្តាល។
ដោយឡែកទ្រព្យសម្បត្ដិបាត់បង់មាន ប្រាក់ដុល្លារ១៦០០ដុល្លារសហរដ្ឋអាមេរិក ,ប្រាក់រៀលចំនួន១លានរៀលនិងកាបូបស្ពាយពណ៌ស្វាយ១ ។ ក្នុងការចាប់ខ្លួននេះផងដែរ សមត្ថកិច្ចធ្វើការដកហូតវត្ថុតាងយកមកវិញមាន៖ ប្រាក់ដុល្លារចំនួន ១៣៩០ដុល្លារសហរដ្ឋ អាមេរិក ,ទូរស័ព្ទម៉ាក Iphone5 ០១គ្រឿង ,កាបូបស្ពាយពណ៌ស្វាយចំនួន១ និងកាបូបដៃចំនួន១ផងដែរ ។
ប្រភពដដែលបានបន្តថា តាមការរៀបរាប់របស់ជនរងគ្រោះឈ្មោះ សែម ចន្ធូ នៅមុនពេលកើតហេតុថ្ងៃទី១៨ ខែតុលា ឆ្នាំ២០១៧ វេលាម៉ោង ២១និង៣០នាទី រូបគេជាជនគ្រោះបានយកលុយរបស់ខ្លួនដាក់ក្នុងកាបូបស្ពាយពណ៌ស្វាយ រួចយកទៅទុកក្រោមពូកក្បាលដំណេកក្នុងបន្ទប់របស់ខ្លួន ហើយចូលដេកជាធម្មតា។ លុះភ្លឺឡើងខណៈដែលខ្លួនក្រោកពីដេកវិញស្រាប់បាត់លុយដែលទុកក្រោមពូកហើយជញ្ជាំងផ្ទះមានស្នាមគាស់ទៀតផង ភ្លាមនោះជនរងគ្រោះក៏បានដាក់ពាក្យបណ្ដឹងទៅប៉ុស្ដិ៍នគរបាលរដ្ឋបាលកំពង់ចំលងដើម្បីជួយអន្ដរាគមន៍ ។
ប្រភពដដែលបានបន្តទៀតថា ក្រោយពីបានពាក្យបណ្ដឹងរបស់របស់ជនរងគ្រោះរួចហើយ កម្លាំងសមត្ថកិច្ចបានធ្វើការស្រាវជ្រាវស៊ើបអង្កេត រហូតចាប់ខ្លួនជនសង្ស័យជាមុខសញ្ញាយកមកប៉ុស្ដិ៍នគរបាលរដ្ឋបាលកំពង់ចំលង នៅថ្ងៃទី១៩ ខែតុលា ឆ្នាំ២០១៧ វេលាម៉ោង១០ ដើម្បីយកមកធ្វើការសាកសួរ ។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានធ្វើសកម្មភាពលួចគាស់ផ្ទះជនរងគ្រោះឈ្មោះ សែម ចន្ធូ ប្រាកដមែន ។ កាលពីវេលាម៉ោង១និង៣០នាទីយប់ រូបគេជាជនសង្ស័យបានចូលក្នុងផ្ទះដោយឡើងតាមជញ្ជាំង រួចចូលក្នុងបន្ទប់លួចយកកាបូបទុកលុយរបស់ជនរងគ្រោះហើយបានហែកជញ្ជាំងស័ង្កសីខាងមុខរត់គេចខ្លួនទៅ ។ ក្រោយពីរូបគេជាជនសង្ស័យបានលួចលុយនោះហើយ រូបគេបានយកលុយចំនួន ១៣៩០ដុល្លារសហរដ្ឋអាមេរិក ទៅលាក់ទុកក្នុងផ្ទះរបស់ខ្លួន ដោយប្រាក់ដុល្លារចំនួន២១០ដុល្លារ និងប្រាក់រៀលប្រហែល ១លានរៀល យកទៅច្រៀងខារ៉ាអូខេនិងទិញទូរស័ព្ទម៉ាកIphone5 ០១គ្រឿង។
ក្រោយពីធ្វើការសាកសួរកម្លាំងប៉ុស្តិ៍សហការជាមួយកម្លាំងផ្នែកនគរបាលយុត្តិធម៌ស្រុក ឃាត់ខ្លួនជនសង្ស័យដកហូតវត្ថុតាងដូចខាងលើបញ្ជូនមកអធិការដ្ឋាននគរបាលស្រុកចាត់ការតាមនីតិវិធី ៕
ចំនួនអ្នកទស្សនា
- ថ្ងៃនេះ7101
- ម្សិលមិញ9421
- សប្តាហ៍នេះ62761
- ខែនេះ177911
- ឆ្នាំនេះ177911
- សរុប20620367