ព្រះសង្ឃមួយអង្គយកញញួរដំជញ្ជាំង រអិលព្រះបាត ធ្លាក់ចំឈើ សុគតនៅមន្ទីរពេទ្យពោធិ៍សាត់
24-October-2017 | ដោយ ពល បញ្ញា
ពោធិ៍សាត់ ៖ ព្រះសង្ឃ តេជគុណព្រះនាម ង៉ែត មុនីសុខហេង មានព្រះជន្ម ៣៦ព្រះវស្សា គង់នៅវត្តកែវវិជ័យ បានយកញញួរមួយទម្ងន់០៥គីឡូក្រាម ទៅដំជញ្ជាំងថ្ម ដែលចាស់ទ្រុឌទ្រោម ខណៈនោះ ក៏រអិលព្រះបាត ធ្លាក់មកដី ត្រូវនឹងឈើ ចំទ្រូងខាងឆ្វេង បណ្តាលសុគត ពេល បញ្ជូនដល់មន្ទីរពេទ្យបង្អែកពោធិ៍សាត់ ករណីនេះកើតឡើងនៅវេលាម៉ោង០៦និង១០នាទីល្ងាច ថ្ងៃទី២៣ ខែតុលា ឆ្នាំ២០១៧ ស្ថិតក្នុងភូមិកណ្តៀង ឃុំកណ្តៀង ស្រុកកណ្តៀង ខេត្តពោធិ៍សាត់ ។
តាមការឲ្យដឹងពីគណកម្មការអាចារ្យវត្តកែវវិជ័យ លោកតា ស្មោញ លាង បានប្រាប់សមត្ថកិច្ចឲ្យដឹងថា មុនពេលកើតហេតុ ព្រះសង្ឃព្រះនាម ង៉ែត មុនីសុខហេង គង់នៅវត្តមុនីសាគរ ហៅវត្តរាំងទិលស្ថិតក្នុង ភូមិរាំងទិល ឃុំរាំងទិល ស្រុកកណ្តៀង ព្រះសង្ឃអង្គនេះត្រូវបានគណៈកម្មការនិមន្តព្រះអង្គ មកគង់នៅវត្តកែវវិជ័យ លុះដល់ថ្ងៃកើតហេតុ ព្រះសង្ឃ គណៈកម្មការ ពុទ្ធបរិស័ទ្ធបានឃើញកុដិមួយ មានសភាពទ្រុឌទ្រោម គិតថានឹងសាងសង់ថ្មី ខណៈនោះគណៈកម្មការ និងព្រះសង្ឃ ក៏នាំគ្នារុះរើ ព្រះសង្ឃរងគ្រោះបានយកញញួរ ឡើងទៅដំជញ្ជាំងដែលមានកំពស់០២ម៉ែត្រ មានស្នាមប្រេះស្រាំស្រាប់ នៅពេលព្រះសង្ឃលើកញញួរដំជញ្ជាំងក៏រអិលព្រះបាត ធ្លាក់មកដី ចំឈើនៅពីក្រោម ត្រូវដើមទ្រូងខាងឆ្វេង សន្លប់បាត់បង់វិញ្ញាណ ព្រះសង្ឃ និងគណៈកម្មការ ឃើញហេតុដូចនេះ ក៏នាំគ្នាបញ្ជូនព្រះសង្ឃព្រះនាម ង៉ែត មុនីសុខហេង មកសង្គ្រោះ នៅមន្ទីរពេទ្យបង្អែកពោធិ៍សាត់ ខណៈបញ្ជូនមកដល់មន្ទីរពេទ្យព្រះសង្ឃ អង្គនេះ ក៏បានសុគតតែម្តង ៕
ចំនួនអ្នកទស្សនា
- ថ្ងៃនេះ7431
- ម្សិលមិញ9421
- សប្តាហ៍នេះ63091
- ខែនេះ178241
- ឆ្នាំនេះ178241
- សរុប20620697