បុរសម្នាក់ជិះម៉ូតូបុកគូថរថយន្តរងរបួសធ្ងន់ នៅស្រុកក្រគរ
30-October-2017 | ដោយ ពល បញ្ញា
ពោធិ៍សាត់ ៖ បុរសម្នាក់ទំនងជាស្រវឹង បានជិះម៉ូតូម៉ាក ហុងដា សេ១២៥ ពណ៌ខ្មៅ គ្មានស្លាកលេខ តាមបណ្តោយផ្លូវជាតិលេខ៥ ខណៈមកដល់ចំណុចបង្គោលគីឡូម៉ែត្រលេខ១៥៣-១៥៤ ស្ថិតក្នុងភូមិផ្សារ ឃុំអន្លង់ត្នោត ស្រុកក្រគរ ខេត្តពោធិ៍សាត់ បានបុកគូថរថយន្តពីក្រោយ ដែលកំពុងធ្វើចរាចរណ៍ បណ្តាលឲ្យរងរបួសយ៉ាងធ្ងន់ធ្ងរ ករណីនេះកើតឡើងនៅវេលាម៉ោង០៧និង១៥នាទីថ្ងៃទី២៩ ខែតុលា ឆ្នាំ២០១៧ ។
ប្រភពព័ត៌មានបានឲ្យដឹងថា មុនពេលកើតហេតុគេឃើញរថយន្ត មិនស្គាល់ម៉ាកមួយគ្រឿងបើកតាមបណ្តោយផ្លូវជាតិលេខ៥ លុះមកដល់ខាងលើ ស្រាប់តែមានបុរសម្នាក់ជិះម៉ូតូ ម៉ាក ហុងដា សេ១២៥ ក្នុងទិសដៅពីកើតទៅលិចស្របទិសគ្នា បានបុកគូថរថយន្តពីក្រោយ បណ្តាលឲ្យរងរបួសធ្ងន់ ក្រោយពេលកើតហេតុ គេឃើញអ្នកបើកបររថយន្តបន្ថែមល្បឿន បើករត់គេចខ្លួនបាត់ បន្សល់ទុកជនរងគ្រោះ និងម៉ូតូនៅកន្លែងកើតហេតុ ។
សមត្ថកិច្ចនគរបាលចរាចរណ៍ស្រុកក្រគរ បានឲ្យដឹងថា ជនរងគ្រោះឈ្មោះ ស៊ីណា សារវ័ន្ត ភេទប្រុស អាយុ២៤ឆ្នាំ រស់នៅភូមិស្រែឬស្សី ឃុំក្បាលត្រាច ស្រុកក្រគរ ខេត្តពោធិ៍សាត់ រងរបួសធ្ងន់ ជនរងគ្រោះត្រូវបានបញ្ជូនមកសង្គ្រោះនៅមន្ទីរពេទ្យបង្អែកខេត្តពោធិ៍សាត់ រីឯម៉ូតូជនរងគ្រោះ សមត្ថកិច្ចយកមករក្សាទុកនៅអធិការដ្ឋាននគរបាលស្រុកក្រគរ ៕
ចំនួនអ្នកទស្សនា
- ថ្ងៃនេះ8031
- ម្សិលមិញ9421
- សប្តាហ៍នេះ63691
- ខែនេះ178841
- ឆ្នាំនេះ178841
- សរុប20621297