អគ្គីភ័យឆាបឆេះផ្ទះប្រជាពលរដ្ឋមួយខ្នងគ្មានសល់និងបាត់បង់ ទ្រព្យសម្បត្ដិមួយចំនួននៅស្រុកខ្សាច់កណ្ដាល
30-October-2017 | ដោយ ពល បញ្ញា
កណ្ដាល ៖ អគ្គីភ័យបានឆាប់ឆេះផ្ទះរបស់ប្រជាពលរដ្ឋមួយខ្នងគ្មានសល់ ខណៈដែលម្ចាស់ផ្ទះបានចេញទៅធ្វើការរកស៊ីនៅខាងក្រៅ ។ ហេតុការណ៍ខាងលើនេះបានបង្កឲ្យមានការភ្ញាក់ផ្អើលឡើងកាលពីវេលាម៉ោង៩និង៣០នាទី ថ្ងៃទី២៨ ខែតុលា ឆ្នាំ២០១៧ ស្ថិតក្នុងភូមិកោះតូច ឃុំកោះឧកញ៉តី ស្រុកខ្សាច់កណ្តាល ខេត្តកណ្តាល ។
មន្ដ្រីនគរបាលស្រុកខ្សាច់កណ្ដាលបានឲ្យដឹងថា ផ្ទះដែលទទួលរងអគ្គីភ័យឆាបឆេះមានទំហំ (ទទឹង៦ម៉ែត្រគុណនិងបណ្ដោយ៩ម៉ែត្រ) សង់អំពីឈើ សសរបេតុងនិងដំបូលប្រក់ស៊ីប្រូ។ ចំណែកឯម្ចាស់ផ្ទះឈ្មោះ លឹម លាង ភេទប្រុស អាយុ៤៧ឆ្នាំ មានប្រពន្ធឈ្មោះ ជឿន ឌី ភេទស្រី អាយុ៤៤ឆ្នាំ មានកូនចំនួន៧នាក់ ស្រី១នាក់។ ក្រុមគ្រួសារមានទីលំនៅភូមិកោះតូច ឃុំកោះឧកញ៉តី ស្រុកខ្សាច់កណ្តាល ខេត្តកណ្តាល។ ក្នុងហេតុកាណ៍ភ្លើងឆេះនេះផងដែរ បានធ្វើឲ្យបាត់បង់ទ្រព្យសម្បត្ដិរួមមាន ៖ លុយដុល្លារចំនួន៥០០ដុល្លារសហរដ្ឋអាមេរិក, ប្រាក់រៀលចំនួន២៥០ម៉ឺនរៀល, ផ្លាកទីនចំនួន៥ជី ,ទូរទស្សន៍១គ្រឿង ,គ្រែដេកចំនួន២ ,ទូរឈើចំនួន១ និងទូរកញ្ចក់ចំនួន២ផងដែរ ។
ប្រភពដដែលបន្ដថា តាមការបំភ្លឺរបស់ជនរងគ្រោះជាម្ចាស់បានឲ្យដឹងថា នៅវេលាមុនពេលកើតហេតុ ពួកគាត់ទាំងអស់គ្នាគឺពុំមាននរណាម្នាក់នៅផ្ទះទេ ដោយជាប់រវល់ទៅរកស៊ីនៅខាងក្រៅ លុះមកដល់វេលាកើតហេតុស្រាប់តែទទួលព័ត៌មានពីប្រជាពលរដ្ឋជិតខាងថា ផ្ទះរបស់ពួកគាត់ត្រូវបានអគ្គីភ័យឆាបឆេះ ភ្លាមនោះពួកគាត់ក៏ត្រឡប់មករួមទាំងសមត្ថកិច្ចជួយអន្ដរាគមន៍ពន្លត់ តែដោយភ្លើងឆេះខ្លាំងពេកជួយមិនទាន់ក៏ត្រូវបាត់បង់ផ្ទះមួយខ្នងនិងទ្រព្យសម្បត្ដិមួយចំនួនផងដែរ ។
ប្រភពដដែលបានឲ្យដឹងទៀតថា ករណីអគ្គីភ័យខាងលើនេះ គឺត្រូវបានសង្ស័យថា បណ្ដាលមកពីឆ្លងចរន្តអគ្គិសនីនៅក្នុងផ្ទះ ខណៈដែលម្ចាស់ផ្ទះចេញទៅធ្វើការខាងក្រៅពុំបានមើលគ្រប់ជ្រុងជ្រោយ ឬបិតបារ៉ែតភ្លើងនោះទេ ទើបបានជាមានភ្លើងឆេះផ្ទះយ៉ាងដូច្នេះ៕
ចំនួនអ្នកទស្សនា
- ថ្ងៃនេះ7851
- ម្សិលមិញ9421
- សប្តាហ៍នេះ63511
- ខែនេះ178661
- ឆ្នាំនេះ178661
- សរុប20621117