ទំនងជិះម៉ូតូបុកគោយន្តពីក្រោយ ដេកស្លាប់ស្តូកស្តឹងកណ្តាលផ្លូវ
06-November-2017 | ដោយ ពល បញ្ញា
បាត់ដំបង ៖ យុវជនម្នាក់បានដេកស្លាប់ស្តូកស្តឹងនៅកណ្តាលទ្រូងផ្លូវ រួមជាមួយ និងម៉ូតូមួយគ្រឿងផងដែរ ក្រោមដំណក់ទឹកភ្លៀងរលឹម ដោយមានចុះអ័ព្វផង ដែលសមត្ថកិច្ចធ្វើការសន្និដ្ឋានថា អាចបណ្តាលមកពីការបើកបរក្នុងល្បឿនលឿន ហើយបានជ្រុលចង្កូតទៅបុកនឹងគូទគោយន្តពីក្រោយ ដោយសារស្ថានភាពផ្លូវរអិលមិនអាចគ្រប់គ្រងយានរបស់ខ្លួនបាន ។
តាមការរៀបរាប់ពីលោក ជា វណ្ឌី អធិការរង នគរបាលស្រុកសង្កែ ទទួលផែនសណ្តាប់ធ្នាប់បានលើកឡើងថា ហេតុការណ៍នេះបានកើតឡើងនៅវេលាម៉ោង ៥ និង៣០ នាទី ទៀបភ្លឺព្រឹកថ្ងៃទី ៦ ខែវិច្ឆិកា ឆ្នាំ២០១៧ តាមបណ្តោយផ្លូវជាតិលេខ ៥ ក្នុងភូមិអូសទូក ឃុំកំពង់ព្រៀង ស្រុកសង្កែ ខេត្តបាត់ដំបង ដែលករណីនេះសង្ស័យថា អាចរវាងម៉ូតូ ជាមួយ នឹងគោយន្តកន្ត្រៃ ។
លោកបានបន្តថា ក្រោយពីលោកបានទទួលនូវព័ត៌មាននេះភ្លាម លោកបានដឹកនាំកម្លាំងជំនាញចុះទៅកាន់ ភូមិ ឃុំ កើតហេតុខាងលើ ដោយនៅទីនោះគឺបានប្រទះឃើញជនរងគ្រោះ ដេកស្លាប់ស្តូកស្តឹងនៅកណ្តាលទ្រូងផ្លូវ ដោយនៅពេលនោះដែរ កម្លាំងបានពិនិត្យឃើញថា នៅលើក្បាំងមុខម៉ូតូមានដិតដាមជាប់ស្នាមទ្រុងគោយន្តកន្ត្រៃ ទើបធ្វើការសន្និដ្ឋានថា ម៉ូតូអាចបើកទៅបុកគោយន្តពីក្រោយ ហើយដោយសារមេឃនៅមានសភាពងងឹតទើបធ្វើអោយគោយន្តមានឱកាសបើករត់គេចខ្លួនបាត់ស្រមោល ។
យោងតាមអត្តសញ្ញាណបណ្ណ អាចបញ្ជាក់ថា ជនរងគ្រោះមានឈ្មោះ ទូច វណ្ណា ភេទប្រុស អាយុ២៦ឆ្នាំ រស់នៅភូមិវត្តលៀបសង្កាត់ចំការសំរោង ក្រុងបាត់ដំបង ដោយបានប្រើប្រាស់ម៉ូតូម៉ាកវេវ ព៌ណក្រហម ខ្មៅ ពាក់ស្លាកលេខ បាត់ដំបង1F-9976
ទើបកម្លាំងទាក់ទងទៅអធិការ ក្រុងដើម្បីស្រាវជ្រាវរកសាច់ញាតិ ក៏បានផ្តល់ដំណឹងអោយទៅទទួលយកសពមកធ្វើបុណ្យតាមប្រពៃណី ដោយឡែកគោយន្តក៏ត្រូវបានកម្លាំងស្រាវជ្រាវរកដែរ ក្នុងការយកមកសាកសួរតាមនិតិវិធី ៕
ចំនួនអ្នកទស្សនា
- ថ្ងៃនេះ1951
- ម្សិលមិញ4281
- សប្តាហ៍នេះ13481
- ខែនេះ49071
- ឆ្នាំនេះ387051
- សរុប20829507