រថយន្តក្រុងដឹកអ្នកដំណើរបស់ក្រុមហ៊ុន LTC បុកម៉ូតូបណ្តាលឲ្យស្លាប់ម្នាក់និងរបួសធ្ងន់ម្នាក់
07-November-2017 | ដោយ ពល បញ្ញា
ពោធិ៍សាត់ ៖ គ្រោះថ្នាក់ចរាចរណ៍មួយបង្កឡើងដោយរថយន្តក្រុងដឹកអ្នកដំណើររបស់ក្រុមហ៊ុន LTC ពាក់ស្លាកលេខ 3C-7287 ពណ៌សក្រហម បើកតាមបណ្តោយផ្លូវជាតិលេខ៥ ក្នុងទិសពីលិចទៅកើត បានបុកម៉ូតូម៉ាកហុងដា សេ១២៥ ពណ៌ខ្មៅ ពាក់ស្លាក 1ឈ-1725 ធ្វើដំណើរពីជើងទៅត្បូង ឆ្លងកាត់ផ្លូវ ត្រូវរថយន្តក្រុងបុកយ៉ាងពេញទំហឹង បណ្តាលឲ្យស្លាប់ម្នាក់ និងរងរបួសធ្ងន់ម្នាក់ ឧបទ្ទវហេតុកើតឡើងនៅចំណុចមុខស្ថានីយ៍ប្រេងឥន្ធនៈ លឹម ហ៊ង ស្ថិតនៅក្នុងភូមិស្ថានីយ៍ សង្កាត់ស្វាយអាត់ ក្រុងពោធិ៍សាត់ ខេត្តពោធិ៍សាត់ កាលពីវេលាម៉ោង១២ និង៣០នាទីយប់ នាថ្ងៃទី០៧ ខែវិច្ឆិកា ឆ្នាំ២០១៧ ។
ប្រភពព័ត៌មាននៅកន្លែងកើតហេតុ បានឲ្យដឹងថា មុនពេលកើតហេតុ គេឃើញបុរសម្នាក់ជិះម៉ូតូម៉ាកខាងលើ និងអ្នករួមដំណើរម្នាក់ បើកបរពីជើងទៅត្បូង លុះមកដល់ចំណុចខាងលើ អ្នកជិះម៉ូតូបានបើកឆ្លងផ្លូវមិនទាន់ផុត ខណៈនោះស្រាប់តែមានរថយន្តក្រុងមួយគ្រឿង ធ្វើដំណើរពីលិចទៅកើត បានបុកម៉ូតូយ៉ាងពេញទំហឹង បណ្តាលស្ត្រីម្នាក់ស្លាប់ នៅនឹងកន្លែង និងបុរសម្នាក់រងរបួសធ្ងន់។
លោកវរសេនីយ៍ឯក រស់ ចំរើន ប្រធានការិយាល័យនគរបាលចរាចរណ៍ក្រុងពោធិ៍សាត់ បានឲ្យដឹងថា ជនរងគ្រោះឈ្មោះ ឡេង វណ្ណា ភេទប្រុស អាយុ៥៦ឆ្នាំ រស់នៅភូមិលលកស សង្កាត់លលកស ក្រុង/ខេត្តពោធិ៍សាត់ ជាអ្នកបើកបរម៉ូតូ រងរបួសធ្ងន់ និងអ្នករួមដំណើរឈ្មោះ សុទ្ធ លីដា ភេទស្រី អាយុ២០ឆ្នាំ រស់នៅភូមិយួស ឃុំកណ្តៀង ស្រុកកណ្តៀង ខេត្តពោធិ៍សាត់ ស្លាប់នៅនឹងកន្លែង។
លោកប្រធានការិយាល័យបានបន្តថា ក្រោយពេលកើតហេតុ ជនរងគ្រោះត្រូវបានបញ្ជូនមកសង្គ្រោះនៅមន្ទីរពេទ្យបង្អែកខេត្តពោធិ៍សាត់ ដោយឃើញអាការរបស់ជនរងគ្រោះមានសភាពធ្ងន់ធ្ងរ ក្រុមគ្រួសារបញ្ជូនទៅសង្គ្រោះនៅមន្ទីរពេទ្យរាជធានីភ្នំពេញ។ រីឯអ្នកបើកបររថយន្ត បានរត់គេចខ្លួនបាត់ ចំពោះរថយន្តនិងម៉ូតូ សមត្ថកិច្ចយករក្សាទុកនៅការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលខេត្តពោធិ៍សាត់ ដើម្បីកសាងសំណុំរឿងតាមនីតិវិធី ៕
ចំនួនអ្នកទស្សនា
- ថ្ងៃនេះ9451
- ម្សិលមិញ9421
- សប្តាហ៍នេះ65111
- ខែនេះ180261
- ឆ្នាំនេះ180261
- សរុប20622717