មួយពព្រិចភ្នែក អគ្គិភ័យឆេះម៉ត់ អស់ផ្ទះ២ល្វែង និង ទ្រព្យសម្បត្តិគ្មានសល់នៅក្រុងសៀមរាប
08-November-2017 | ដោយ ពលមនសិការ
សៀមរាប ៖ ផ្ទះ២ល្វែង ក្នុងនោះមានផ្ទះជួលមួយល្វែងមាន៥បន្ទប់ ក្នុងដីឡូត៍តែមួយត្រូវបានអគ្គិភ័យឆាបឆេះអស់ទ្រព្យសម្បត្តិគ្មានសល់បង្កឲ្យមានការភ្ញាក់ផ្អើលកាលពីវេលាម៉ោង២៣និង៣០នាទីយប់ថ្ងៃទី៧ ខែវិច្ឆិកា ឆ្នាំ២០១៧ ស្ថិតនៅក្រុមទី១ ភូមិធ្លកអណ្តូងសង្កាត់ស្លក្រាម ក្រុងខេត្តសៀមរាប ប៉ុន្តែពុំមាននរណាម្នាក់រងរបួសក្នុងគ្រោះថ្នាក់អគ្គិភ័យនោះទេ។
លោកវរសេនីយ៍ទោ អ៊ុន ភិរម្យ នាយរងការិយាល័យ បង្កា ពន្លត់អគ្គីភ័យ និង សង្គ្រោះ បានឲ្យប្រាប់ថាក្នុងប្រតិបត្តិការជួយសង្គ្រោះខាងលើកម្លាំងជំនាញបានប្រើរថយន្តពន្លត់អគ្គីភ័យ ចំនួន៤គ្រឿង ប្រើប្រាស់ទឹកអស់ ៤ឡាន។
លោកបានបន្តថាមូលហេតុបណ្តាលមកពី ឆ្លងចរន្តអគ្គិសនីចេញពីផ្ទះលក់អីវ៉ាន់ដែលជារបស់ម្ចាស់ផ្ទះទាំង២ខ្នងនេះព្រោះក្នុងពេលកើតហេតុនោះម្ចាស់ផ្ទះបានចាក់សោរទ្វា ចេញទៅកម្មវិធីនៅខាងក្រៅ មិនបាននៅផ្ទះនោះទេ នៅតែអ្នកជួលផ្ទះ។ លោកបានបន្តថាម្ចាស់ផ្ទះទាំង២ខ្នងដែលមានម្ចាស់ឈ្មោះ សួន កុសល ភេទប្រុស អាយុ៤០ឆ្នាំ មុខរបរជាងឡាន ដែលត្រូវជាកូនធម៌ម្ចាស់ផ្ទះ ឲ្យមើលការខុសត្រូវផ្ទះជួលនោះមានស្រុកកំណើតនៅភូមិព្រៃកោ ឃុំរលាប្អៀរ ខេត្តកំពង់ឆ្នាំង បច្ចុប្បន្នរស់នៅក្រុមទី១ ភូមិធ្លកអណ្តូងសង្កាត់ស្លក្រាម ក្រុងសៀមរាប។
សម្ភារៈខូចខាតទ្រព្យមានៈ រថយន្តម៉ាកទីកូចំនួន ២គ្រឿង, ទ្រព្យសម្បត្តិក្នុងផ្ទះអស់ទាំងស្រុង និង ផ្ទះចំនួន២ល្វែង ក្នុងនោះ ផ្ទះជួល ១ល្វែង មាន ៥បន្ទប់ ក្នុង១បន្ទប់ទំហំ ៤,៥ម៉ែត្រគុណ៦ម៉ែត្រ ធ្វើអំពីថ្មប្រក់ស័ង្កសីនិងផ្ទះមួយល្វែងសម្រាប់នៅលក់ដូរនោះ មានទំហំ ៥ម៉ែត្រគុណ៦ម៉ែត្រ ធ្វើអំពីឈើ ជញ្ជាំងឈើ ប្រក់ស័ង្កសី, និងរោងដាក់ឡានឆេះអស់ទាំងស្រុង ៕
ចំនួនអ្នកទស្សនា
- ថ្ងៃនេះ10231
- ម្សិលមិញ9421
- សប្តាហ៍នេះ65891
- ខែនេះ181041
- ឆ្នាំនេះ181041
- សរុប20623497