សាប៊ូក្លែងបន្លំពាណិជ្ជសញ្ញាម៉ាក និងគ្មានច្បាប់ ជាង១១តោន ត្រូវបានសមត្ថកិច្ចបង្ក្រាប
13-November-2017 | ដោយ ពលមនសិការ
ភ្នំពេញ ៖ ឃ្លាំងស្តុក និងចែកចាយ សាប៊ូក្លែងបន្លំពាណិជ្ជសញ្ញាម៉ាក និងគ្មានច្បាប់ (រំលោភច្បាប់កម្មសិទ្ធិបញ្ញា) ត្រូវបានកម្លាំងនគរបាលប្រឆាំងបទល្មើសសេដ្ឋកិច្ច ដែលដឹកនាំផ្ទាល់ដោយលោក ឧត្តមសនីយ៍ត្រី មាស រ៉ាវុធ អនុប្រធាននាយកដ្ឋាន ទទួលបន្ទុកការិយាល័យប្រឆាំងបទល្មើសកម្មសិទ្ធិបញ្ញា សហការជាមួយអាជ្ញាធរមូលដ្ឋាន ក្រោមការសម្របសម្រួលនីតិវិធីពីលោក ស្រី ម៉ាកនី ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានចុះបង្ក្រាបនៅចំណុចផ្ទះលេខ ០៩Eo ផ្លូវលំ ភូមិទ្រា សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ នៅថ្ងៃទី១៣ ខែវិច្ឆិកា ឆ្នាំ ២០១៧ ដែល ម្ចាស់ទីតាំងឈ្មោះ តៅ ប្រសិទ្ធ ភេទប្រុស អាយុ៣៨ឆ្នាំ ជនជាតិខ្មែរ ។
លោកឧត្តមសេនីយ៍ត្រីបានឲ្យដឹងថា ក្រោយការត្រួតពិនិត្យឆែកឆេរជាក់ស្តែង សមត្ថកិច្ចចម្រុះបានរកឃើញវត្ថុតាង រួមមាន សាប៊ូក្លែងបន្លំម៉ាក Viera និង Lavita ចំនួន១៣កេស និងសាប៊ូជាង១០មុខទៀត ដែលសង្ស័យថា គ្មានច្បាប់អនុញ្ញាតជិត ៨០០កេសទៀត សរុបទាំងអស់ជាង ១០តោន ។
ចំពោះវត្ថុតាងទាំងអស់នោះលោកព្រះរាជអាជ្ញារងបានសម្រេចឲ្យសមត្ថកិច្ចដកហូតសាប៊ូក្លែងបន្លំម៉ាក Viera និង Lavita ចំនួន១៣កេស យកទៅរក្សាទុកជាបណ្តោះអាសន្ន នៅនាយកដ្ឋាននគរបាលប្រឆាំងបទល្មើសសេដ្ឋកិច្ច និងក្រៅពីនោះធ្វើការផ្លំបេសៀលទុកក្នុងផ្ទះ រង់ចាំម្ចាស់ចូលខ្លួន ដោះស្រាយ និងនាំខ្លួនតំណាងម្ចាស់ទីតាំងឈ្មោះ ញឹម ស៊ីណា មកបំភ្លឺនៅ នាយកដ្ឋាននគរបាលប្រឆាំងបទល្មើសសេដ្ឋកិច្ច ដើម្បីបន្តនីតិវិធី ៕
ចំនួនអ្នកទស្សនា
- ថ្ងៃនេះ451
- ម្សិលមិញ10851
- សប្តាហ៍នេះ66971
- ខែនេះ182121
- ឆ្នាំនេះ182121
- សរុប20624577