ក្រុមចោរ ឆក់ទ្រព្យសម្បត្តិភ្ញៀវទេសចរណ៍ មួយសំបុក ដ៏សកម្ម មកពីរាជធានីភ្នំពេញសង្ងំធ្វើសកម្មភាពឆក់ទ្រព្យសម្បត្តិភ្ញៀវទេសចរណ៍និងប្រជាពលរដ្ឋ ក្នុងក្រុងសៀមរាប ត្រូវបានបង្ក្រាប
01-December-2017 | ដោយ ពលមនសិការ
សៀមរាប ៖ កាលពីវេលាម៉ោងប្រហែល១៦និង៣០នាទី ថ្ងៃទី២៩ ខែវិច្ឆិកា ឆ្នាំ២០១៧ នៅចំណុចទំនប់អញ្ចាញ ភូមិអញ្ចាញ សង្កាត់ នគរធំ ក្រុង/ខេត្តសៀមរាប មានករណី អំពើលួចមានស្ថានទម្ងន់ទោសឆក់កាបូបតាមដងផ្លូវសាធារណៈ។
សមត្ថកិច្ចបានឲ្យដឹងថាជនសង្ស័យ២នាក់រួមមានទី១- ឈ្មោះ ជា លាងគី ភេទប្រុស អាយុ១៨ឆ្នាំ រស់នៅភូមិអូរអណ្ដូង សង្កាត់ព្រែកប្រា ខណ្ឌច្បាអំពៅ រាជធានីភ្នំពេញ ជាអ្នកបើកបរ, ជនសង្ស័យទី២- ឈ្មោះ សោ ដាណេ ភេទប្រុស អាយុ១៨ឆ្នាំ រស់នៅភូមិព្រែកទារ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ជាអ្នកជិះពីក្រោយ លើម៉ូតូ ០១គ្រឿង ម៉ាក HONDA DREAM ពណ៌ ខ្មៅ បានធ្វើសកម្មភាពឆក់កាបូបជនបរទេស។
ជនរងគ្រោះឈ្មោះ CHAN JONATHAN YIU LOON ភេទ ប្រុស កើតឆ្នាំ១៩៨៨ ជនជាតិ អង់គ្លេស កាន់លិខិតឆ្លងដែនលេខ ៥២៦៤៣២៤៦០ និងឈ្មោះ KAN SUK KWAN ភេទស្រី កើតឆ្នាំ ១៩៨៨ ជនជាតិ អង់គ្លេស កាន់លិខិតឆ្លងដែន ៨០១០២៤៥០៦។ ជនបរទេសទាំងពីរនាក់នេះជាភ្ញៀវទេសចរណ៍ស្នាក់នៅបន្ទប់លេខ ០៦២ សណ្ឋាគារជាថាតា។
សម្ភារៈបាត់បង់រួមមានៈ មួកតើបពណ៌ទឹកប៊ិចចំនួន០១, ឧបករណ៍សាកថ្មទូរស័ព្ទចំនួន០១គ្រឿង, ទូស័ព្ទម៉ាកSumSungGalaxySG ចំនួន០១គ្រឿង, Visa Card ចំនួន០១សន្លឹក, កែវសម្រាប់ ថែរក្សាភ្នែកចំនួន០៤, ខ្សែរដៃលោហធាតុ ពណ៌ទឹកប្រាក់ ចំនួន០១
, ថ្នាំបាញ់ខ្លួនបុរស +ឡេលាបខ្លួន ការពារកំដៅថ្ងៃ, រូបីយបណ្ណចំនួន២៨ដុល្លារ ប្រាក់រៀល ២៨០០៛។
ក្រោយធ្វើសកម្មភាព ជនសង្ស័យបានធ្វើការគេចខ្លួន តាមផ្លូវ៦០ម៉ែត្រឆ្ពោះទៅបរិវេណតំបន់ប្រាសាទ ខណៈដែលកម្លាំងផ្នែកអន្តរគមន៍និងកម្លាំងនគរបាលប៉ុស្តិ៍រដ្ឋបាលសង្កាត់នគរធំនៃអធិការដ្ឋាននគរបាលក្រុងសៀមរាប កំពុងធ្វើការ ល្បាតក្នុងមូលដ្ឋាន ហើយបានឃើញសកម្មភាពរបស់ជនសង្ស័យ ក៏បានធ្វើការតាមប្រដេញជនសង្ស័យ ទៅដល់ចំណុចខាងមុខសាលាសង្កាត់នគរធំ ជនសង្ស័យបានទំលាក់កាបូបរបស់ជនរងគ្រោះចោល ហើយបន្តគេចខ្លួន ទៅដល់ចំណុចខាងកើត ប្រាសាទតាព្រហ្ម ជនសង្ស័យបាន ផ្តួលម៉ូតូចោល រត់ចូលព្រៃ។ ដោយមានការចូលរួមសហការណ៍ល្អ ពីនគរបាលការពារបេតិកភណ្ឌ ក៏ដូចជាបងប្អូន ប្រជាការពារភូមិ ជនសង្ស័យទាំងពីរនាក់ដែលព្យាយាម រត់គេចខ្លួនត្រូវបានកម្លាំងចម្រុះ ធ្វើការឃាត់ខ្លួនបាន នៅក្នុងព្រៃបរិវេណខាងលិច ប្រាសាទតាព្រហ្ម និងបានបញ្ជូនមកនគរបាលផ្នែកព្រហ្មទណ្ឌនៃអធិការដ្ឋាននគរបាលក្រុងសៀមរាបដើម្បីធ្វើការ សាកសួរ។
វត្ថុតាងដកហូតបានៈ ម៉ូតូ ០១គ្រឿង ម៉ាកហុងដា ឌ្រីមពណ៌ខ្មៅស្លាកលេខ ភ្នំពេញ1KG-7188 កាបូបរបស់ជនរងគ្រោះចំនួន០១ ពណ៌ប្រផេះ។
ដោយមានការណែនាំពីលោកឧត្តមសេនីយ៍ត្រី ទិត្យ ណារ៉ុង ស្នងការនៃស្នងការដ្ឋាននគរបាលខេត្តសៀមរាប ក៏ដូចជាលោកវរសេនីយ៍ឯកភឹង ចិន្តារ៉េត ស្នងការរងទទួលផែនព្រហ្មទណ្ឌ បានណែនាំអោយបើកការស្រាវជ្រាវស៊ើបអង្កេតអោយដល់ឬសគល់ ។
កម្លាំងនគរបាលក្រុងសៀមរាប ដឹកនាំដោយលោកវរសេនីយ៍ឯក ទេព ចាន់ណា អធិការនគរបាល ក្រុងសៀមរាបនិងលោកអធិការរងទទួលបន្ទុក ព្រហ្មទណ្ឌ បានធ្វើការសាកសួរជនសង្ស័យ និងបន្តនីតិវិធី រួមនិងមានការសហការណ៍ជាមួយការិយាល័យនគរបាល ព្រហ្មទណ្ឌកំរិតស្រាល រហូតឈានដល់ធ្វើការឃាត់ ខ្លួនបានបក្ខពួកជនសង្ស័យចំនួន០៤នាក់បន្ថែមទៀត នាំមកអធិការដ្ឋាននគរបាលក្រុងសៀមរាបដើម្បីធ្វើការសាកសួរ។
ជនសង្ស័យ០៤នាក់បន្ថែមដែលត្រូវនាំខ្លួនមកធ្វើការសាកសួរទី១- ឈ្មោះ ព្រឿន សុផានិត ភេទប្រុស អាយុ២៧ឆ្នាំ ភូមិព្រែកតាកូវ ឃុំព្រែកតាកូវ ស្រុកខ្សាចកណ្តាល ខេត្តកណ្តាល(ជាចារីនិងមេក្លោង), ទី២-ឈ្មោះ ម៉ៅ ចាន់ថាវី ភេទស្រី អាយុ២១ឆ្នាំ ភូមិអំពិល សង្កាត់ទន្លេរបាសាក់ ខណ្ឌ័ចំការមន រាជធានីភ្នំពេញ (ជាចារីនិងមេក្លោង) ទី៣- ឈ្មោះ ទេព ស្រីនិច ភេទស្រី អាយុ២០ឆ្នាំ សង្កាត់ទួលទំពូង ខណ្ឌចំការមន រាជធានីភ្នំពេញ(អ្នកសមគំនិត) និងទី៤- ឈ្មោះ ម៉ៅ សុបញ្ញា ភេទស្រី អាយុ២០ឆ្នាំ ភូមិដើមគរ ខណ្ឌជ្រោយចង្វា រាជធានី ភ្នំពេញ(អ្នកសមគំនិត)។
វត្ថុតាងដកហូតបន្ថែមៈ Laptop ម៉ាក Apple ចំនួន០១គ្រឿងចិញ្ចៀនលោហៈ ធាតុពណ៌ស ចំនួន០៦វង់, វិទ្យុទាក់ទងប្រភេទអាយឌី ម៉ាកMotorola ចំនួន០១គ្រឿង, វ៉ែនតាចំនួន០៣,ម៉ូតូ ០១គ្រឿង ម៉ាកហុងដា ឌ្រីមពណ៌ខ្មៅស្លាកលេខ ភ្នំពេញ1FA-4711 កាបូបស្ពាយចំហៀងពណ៍ក្រហមចំនួន០១, សៀវភៅលិខិតឆ្លងដែន ចំនួន០១ក្បាល, ប្រាក់កាក់អង់គ្លេសចំនួន១២០ផោន, លុយអឺរ៉ូ ចំនួន០៥អឺរ៉ូ, លុយម៉ាលេស៊ីចំនួន០៥RM, លុយមីយ៉ាន់ម៉ា ចំនួន២១៣៥០kyat។
ជនសង្ស័យបានឆ្លើយសារភាពថា កន្លងមកក្រុមខ្លួន បានធ្វើសកម្មភាព ឆក់កាបូបនិងទូរស័ព្ទ ក្នុងភូមិសាស្ត្រក្រុងសៀមរាប បានចំនួន០៥លើក និងចំនួន០៣លើកនៅរាជធានីភ្នំពេញ ។
យោងតាមចម្លើយសារភាព ជនសង្ស័យនិងវត្ថុតាង ត្រូវបាននគរបាលផ្នែកព្រហ្មទណ្ឌក្រុងសៀមរាប កសាងសំណុំរឿងបញ្ជូនទៅតុលាការចាត់ការតាមនិតិវិធីច្បាប់ ចំនែកករណីដែលពួកគេប្រព្រឹត្តផ្សេង ទៀតនិងបញ្ចូនទៅកាន់តុលាការបន្ថែមទៀតនាពេលក្រោយផងដែរ ៕
ចំនួនអ្នកទស្សនា
- ថ្ងៃនេះ6251
- ម្សិលមិញ10851
- សប្តាហ៍នេះ72771
- ខែនេះ187921
- ឆ្នាំនេះ187921
- សរុប20630377