ស្ត្រីម្នាក់ត្រូវរថយន្តស៊ីទែន ជាន់ស្លាប់នៅកន្លែងកើតហេតុ
11-December-2017 | ដោយ ពលមនសិការ
ពោធិ៍សាត់ ៖ គ្រោះថ្នាក់ចរាចរណ៍គួរឲ្យរន្ធត់មួយ កើតឡើងនៅវេលាម៉ោង១១និង២៥នាទី ថ្ងៃទី១០ ខែធ្នូ ឆ្នាំ២០១៧ នៅចន្លោះគីឡូម៉ែត្រលេខ១៧៣-១៧៤ ស្ថិតក្នុងភូមិត្រាំ ឃុំត្នោតជុំ ស្រុកក្រគរ ខេត្តពោធិ៍សាត់ បណ្តាលឲ្យស្ត្រីម្នាក់ត្រូវរថយន្តស៊ីទែនជាន់ ស្លាប់ភ្លាមៗនៅនឹងកន្លែងកើតហេតុ ។
ប្រភពព័ត៌មាន បានឲ្យដឹងថា មុនពេលកើតហេតុគេឃើញស្ត្រីម្នាក់ជិះម៉ូតូម៉ាក គុប ៥០ ពណ៌សំបកឪឡឹក គ្មានស្លាកលេខ បើកបរក្នុងទិសដៅពីលិចទៅកើត លុះមកដល់ចំណុចខាងលើបានឡើងជែងគោយន្តកន្ត្រៃមួយគ្រឿង បើកបរក្នុងទិសដៅស្របគ្នា តែបើកជែងមិនផុតព្រោះគោយន្តបានងាកឆ្វេង បណ្តាលឲ្យប៉ះម៉ូតូដួល ខណៈនោះស្រាប់តែមានរថយន្តស៊ីទែនក្រុមហ៊ុន សូគីមិច មួយគ្រឿងម៉ាក ហ៊ីយ៉ានដាយពណ៌សក្រហម ពាក់ស្លាកលេខ ភ្នំពេញ 4A-9767 បើកបរក្នុងទិសដៅស្របគ្នា បានបុកគោយន្តកន្ត្រៃពីក្រោយ ហើយជ្រុលទៅជាន់មនុស្សដែលជិះម៉ូតូដួល បណ្តាលឲ្យស្លាប់ភ្លាមៗនៅកន្លែងកើតហេតុ។ ក្រោយពេលកើតហេតុអ្នកបើកបររថយន្តស៊ីទែន និងគោយន្តកន្ត្រៃបានរត់គេចខ្លួនបាត់ បន្សល់ទុករថយន្តនិងគោយន្ត នៅកន្លែងកើតហេតុ
លោកវរសេនីយ៍ទោ ឯម រុន អធិការនៃអធិការដ្ឋាននគរបាលស្រុកក្រគរ បានឲ្យដឹងថា ជនរងគ្រោះឈ្មោះ វណ្ណ ជិន ភេទស្រី អាយុ៤០ឆ្នាំ រស់នៅភូមិពាលញែក១ សង្កាត់ផ្ទះព្រៃ ក្រុងពោធិ៍សាត់ ខេត្តពោធិ៍សាត់ ស្លាប់ សាកសពត្រូវប្រគល់ជូនក្រុមគ្រួសារធ្វើបុណ្យតាមប្រពៃណី សមត្ថកិច្ចបានចុះវាស់វែង យកវត្ថុតាងទៅរក្សាទុកនៅការិយាល័យនគរបាលចរាចរណ៍ផ្លូវគោកខេត្ត ដើម្បីកសាងសំណុំរឿងចាត់ការតាមនីតិវិធី ៕
ចំនួនអ្នកទស្សនា
- ថ្ងៃនេះ8651
- ម្សិលមិញ10851
- សប្តាហ៍នេះ75171
- ខែនេះ190321
- ឆ្នាំនេះ190321
- សរុប20632777