នគរបាលលើកដែកចាប់ខ្លួនជនសង្ស័យម្នាក់ពីបទរំលោភលើសេចក្ដីទុកចិត្ដ
15-December-2017 | ដោយ ពលមនសិការ
កណ្ដាល ៖ ជនសង្ស័យម្នាក់ត្រូវបានសមត្ថកិច្ចនគរបាលស្រុកលើកដែកធ្វើការចាប់ខ្លួន ពីបទរំលោភលើសេចក្ដីទុកចិត្ដ ក្រោយពីជនសង្ស័យបានខ្ចីម៉ូតូរបស់ជនរងគ្រោះយកទៅបញ្ចាំ ។
ករណីចាប់ខ្លួននេះធ្វើឡើងកាលពីវេលាម៉ោង៧និង៣០នាទីព្រឹក ថ្ងៃទី១៤ ខែធ្នូ ឆ្នាំ២០១៧ ភូមិក្បាលជ្រោយ ឃុំកំពង់ភ្នំ ស្រុកលើកដែក ខេត្តកណ្ដាល ។
មន្ដ្រីនគរបាលស្រុកលើកដែកបានឲ្យដឹងថា ជនសង្ស័យឈ្មោះ ម៉ម នី ភេទប្រុស អាយុ២២ឆ្នាំ ជនជាតិខ្មែរ មុខរបរ មិនពិត មានទីលំនៅៗភូមិស្ដីសំរោង ឃុំកក់ព្រីង ស្រុកស្វយជ្រុំ ខេត្តស្វាយរៀង។ ចំណែកជនរងគ្រោះជាម្ចាស់ម៉ូតូឈ្មោះ យ៉ន សីហា ភេទប្រុស អាយុ២៨ឆ្នាំ ជនជាតិខ្មែរ មានទីលំនៅភូមិរាំងដេក ឃុំគគីរធំ ស្រុកកៀនស្វាយ ខេត្តកណ្ដាល ។ ដោយឡែកទ្រព្យសម្បត្ដិបាត់បង់ម៉ូតូ១គ្រឿង ម៉ាកហុងដាឌ្រីម ធុនសេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខភ្នំពេញ 1FW-8686 ។
ប្រភពដដែលបន្ដថា តាមការបំភ្លឺរបស់ជនរងគ្រោះជាម្ចាស់ម៉ូតូបានឲ្យដឹងថា កាលពីថ្ងៃទី២ ខែវិច្ឆិកា ឆ្នាំ២០១៧ វេលាម៉ោង១១និង៣០នាទី ឈ្មោះ វី វីត ដែលត្រូវជាក្មួយរបស់ឈ្មោះយ៉ន សីហា (ជនរងគ្រោះ) បានខ្ចីជិះថាទៅដើរលែងនៅកំពង់ភ្នំ លុះរហូតមកដល់ម៉ោងប្រហែលជាង៤ល្ងាច ឈ្មោះ វី វីត ត្រូវជាក្មួយជនសរងគ្រោះបានជិះម៉ូតូឌុបមកដល់ផ្ទះជនរងគ្រោះ រួចនិយាយ ម៉ូតូរបស់ពូត្រូវបានឈ្មោះ ម៉ម នី ហៅញ៉ាញ់ (ជនសង្ស័យ) ខ្ចីជិះយកទៅបាត់ហើយ ។
ចំណែកឯជនរងគ្រោះគិតថា ប្រហែលជាខ្ចីជិះសិនទេ ដោយពុំស្វែងរកអ្វីឡើយ។ អស់រយៈពេលជាច្រើនថ្ងៃរហូតមកដល់ថ្ងៃទី១៤ ខែធ្នូ ឆ្នាំ២០១៧ មិនឃើញជនសង្ស័យយកម៉ូតូប្រគល់ឲ្យមកខ្លួនវិញ ក៏សម្រេចដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលកំពង់ភ្នំ ដើម្បីធ្វើការចាប់ខ្លួនជនសង្ស័យផ្ទន្ទាទោសតាច្បាប់ ។
ប្រភពពីសមត្ថកិច្ចបានឲ្យដឹងថា ក្រោយពីទទួលបានពាក្យបណ្ដឹងពីជនរងគ្រោះភ្លាម សមត្ថកិច្ចក៏បានធ្វើការស្រាវជ្រាវស្វែងរករហូតចាប់ខ្លួនជនសង្ស័យមកប៉ុស្ដិ៍រដ្ឋបាលដើម្បីសួរនាំ។ នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានខ្ចីម៉ូតូពីឈ្មោះ វីត ដែលជាក្មួយជនរងគ្រោះប្រាកដមែន ក្រោយពីខ្ចីបានហើយខ្លួនជិះយកទៅបញ្ចាំនៅផ្សារឃ្លាំងរំសេវ ក្នុងរាជធានីភ្នំពេញ ក្នុងតម្លៃ២៥០ដុល្លាសហរដ្ឋអាមេរិក ។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្ដដើម្បីចាត់ការតាមផ្លូវច្បាប់ ៕
ចំនួនអ្នកទស្សនា
- ថ្ងៃនេះ7011
- ម្សិលមិញ10851
- សប្តាហ៍នេះ73531
- ខែនេះ188681
- ឆ្នាំនេះ188681
- សរុប20631137