មុខសញ្ញាជួញដូរនិងប្រើប្រាស់គ្រឿងញៀន ៥នាក់ត្រូវនគរបាលស្រុកពញាឮឃាត់ខ្លួន
16-December-2017 | ដោយ ពលមនសិការ
កណ្តាល ៖ លោកវរសេនីយ៍ទោ ដួង តេង អធិការស្រុកពញាឮ បានឲ្យដឹងជនសង្ស័យ៥នាក់ត្រូវបានកម្លាំងនគរបាលឃាត់ខ្លួនពាក់ព័ន្ធករណីជួញដូរនិងប្រើប្រាស់សារធាតុខុសច្បាប់ចំនួន ២ករណីផ្សេងគ្នា។
ករណីទី១៖ កាលពីថ្ងៃទី១៥ ខែធ្នូ ឆ្នាំ២០១៧ វេលាម៉ោង១៦និង៥០នាទី នៅចំណុចវាលស្រែ ភូមិស្រែតាមែង ឃុំទំនប់ធំ ស្រុកពញាឮខេត្តកណ្តាល។
សមត្ថកិច្ចបានឃាត់ខ្លួនជនសង្ស័យ ៣នាក់រួមមានទី១-ឈ្មោះ អៀម រិទ្ធី ហៅឡែន ភេទប្រុស អាយុ២៣ ឆ្នាំជនជាតិខ្មែរ មុខរបរកម្មករសំណង់ មានទីលំនៅភូមិតាប្រាប ឃុំម្កាក់ ស្រុកអង្គស្នួលខេត្តកណ្តាល, ទី២-ឈ្មោះ ហួន ម៉ាប់ ភេទប្រុស អាយុ២៣ ឆ្នាំ ជនជាតិខ្មែរ មុខរបរកម្មករសំណង់ ទីលំនៅភូមិត្រពាំងទៃ ឃុំម្កាក់ ស្រុកអង្គស្នួលខេត្តកណ្តាល, ទី៣-ឈ្មោះសំ ពិសិដ្ឋ ភេទប្រុស អាយុ២៧ឆ្នាំ ជនជាតិខ្មែរ មុខរបរលក់ថ្នាំញៀន មានទីលំនៅភូមិបាសិទ្ធិ ឃុំម្កាក់ ស្រុកអង្គស្នួល ខេត្តកណ្តាល។
វត្ថុតាងចាប់យកបានៈ ម្សៅក្រាមពណ៌សថ្លាមេតំហ្វេតាមីន (ICE) ចំនួន០៧ កញ្ចប់(កញ្ចប់តូច៦ កញ្ចប់មធ្យម១), ទូរស័ព្ទ០២គ្រឿង ម៉ាកណូគា ចុចពិល, ឧបករណ៍វិចខ្ចប់ និងប្រើប្រាស់មួយចំនួន, ម៉ូតូមួយគ្រឿង ម៉ាកហុងដា សេ ១២៥ ពណ៌ខ្មៅ សេរី២០១២ ឡើងតែម២០១៣ ពាក់ស្លាកលេខ ភ្នំពេញ 1CY-0674។
លោកអធិការបន្តថា មុនពេលឃាត់ខ្លួនជនសង្ស័យខាងលើ កម្លាំងផ្នែកជំនាញបានទទួលព័ត៌មានពីប្រជាពលរដ្ឋថា មានជនសង្ស័យ២នាក់ (ឈ្មោះអៀម រិទ្ធីហៅឡែន និងឈ្មោះហួន ម៉ាប់) សកម្មភាពជួញដូរថ្នាំញៀន នៅចំណុចវាលស្រែកើតហេតុ។ ក្រោយពីទទួលព័ត៌មានភ្លាម កម្លាំងផ្នែកជំនាញ សហការណ៍ជាមួយកម្លាំងប៉ុស្តិ៍រដ្ឋបាលទំនប់ធំ បានចុះដល់កន្លែងកើតហេតុ ប្រទះឃើញជនសង្ស័យទាំង២នៅជាមួយគ្នាកំពុងធ្វើសកម្មភាព ក៏បានបង្ក្រាបចាប់ឃាត់ខ្លួនជនសង្ស័យទាំង២នាក់ ឆែកឆេរឃើញថ្នាំញៀនចំនួនមួយតូច និងទូរស័ព្ទណូគាចុចពិលមួយគ្រឿង។
យោងតាមចម្លើយសារភាព របស់ជនសង្ស័យឈ្មោះ អៀម រិទ្ធី ហៅឡែន និងឈ្មោះហួន ម៉ាប់។ កម្លាំងផ្នែកជំនាញ បានបន្តការស្រាវជ្រាវ និងសហការណ៍ជាមួយកម្លាំងប៉ុស្តិ៍រដ្ឋបាលឃុំម្កាក់ ស្រុកអង្គស្នួល ចាប់ឃាត់ខ្លួនជនសង្សយ័ឈ្មោះ សំ ពិសិដ្ឋ និងចាប់យកវត្ថុតាងបានថ្នាំញៀនចំនួន០៦កញ្ចប់(កញ្ចប់មធ្យម០១ និងតូច០៥)។ នៅចំពោះមុខសមត្ថកិច្ច ជនសង្ស័យ ឈ្មោះសំ ពិសិដ្ឋបានសារភាពថា ថ្នាំញៀនដែលខ្លួនយកមកជួញដូរនៅថ្ងៃកើតហេតុនេះ បានទិញមកពីជន មិនស្គាល់ឈ្មោះភេទប្រុស មានទូរស័ព្ទលេខ០៧០៨០៨៣៧៨ ទីលំនៅ ភ្នំពេញ។
ករណីទី២៖ កាលពីថ្ងៃទី១៥ ខែធ្នូ ឆ្នាំ២០១៧ វេលាម៉ោង១៥និង៤៥នាទី នៅចំណុចភូមិស្រែតាមែង ឃុំទំនប់ធំ ស្រុកពញាឮ ខេត្តកណ្តាល។
សមត្ថកិច្ចបានឃាត់ខ្លួនជនសង្ស័យចំនួន ២នាក់រួមមានទី១- ឈ្មោះ អុល សំណាង ហៅឌុន ភេទប្រុស អាយុ១៧ ឆ្នាំជនជាតិខ្មែរ មុខរបរ លក់ថ្នាំញៀន មានទីលំនៅភូមិស្រែតាមែង ឃុំទំនប់ធំ ស្រុកពញាឮ ខេត្តកណ្តា, ទី២-ឈ្មោះ ផន ហុងនី ហៅថ្លែន ភេទប្រុស អាយុ១៧ ឆ្នាំ ជនជាតិខ្មែរ មុខរបរមិនពិត ទីលំនៅភូមិ ស្រែតាមែង ឃុំទំនប់ធំ ស្រុកពញាឮ ខេត្តកណ្តាល។
វត្ថុតាងចាប់យកបាន៖ ម្សៅក្រាមពណ៌សថ្លាមេតំហ្វេតាមីន (ICE) ចំនួន ០៧ (កញ្ចប់តូច៦ កញ្ចប់ធំ១), ទូរស័ព្ទ ០២ គ្រឿង ម៉ាកណូគា ចុចពិល, ឧបករណ៍វិចខ្ចប់ និងប្រើប្រាស់មួយចំនួន។
សមត្ថកិច្ចបានឲ្យដឹងថាមុនពេលឃាត់ខ្លួនជនសង្ស័យ ខាងលើកម្លាំងផ្នែកជំនាញបានទទួលព័ត៌មានពីប្រជាពលរដ្ឋថា មានឈ្មោះខាងលើ ធ្វើសកម្មភាពជួញដូរថ្នាំញៀន នៅចំណុចកើតហេតុ។ ក្រោយពីទទួលព័ត៌មានភ្លាម កម្លាំងផ្នែកជំនាញ សហការណ៍ជាមួយកម្លាំងប៉ុស្តិ៍រដ្ឋបាលទំនប់ធំ បានចុះដល់កន្លែងកើតហេតុ ឃើញជនសង្សយ័ទាំងពីរនៅជាមួយគ្នាកំពង់ធ្វើសកម្មភាព ក៏បានបង្ក្រាបចាប់ឃាត់ខ្លួនជនសង្ស័យទាំងពីរនាក់ ឆែកឆេរឃើញថ្នាំញៀនចំនួន០៧ កញ្ចប់(កញ្ចប់ធំ១ និងកញ្ចប់តូច៦) និងឧបករណ៏វិចខ្ចប់ និងប្រើប្រាស់សារធាតុញៀនមួយចំនួន។ នៅចំពោះមុខសមត្ថកិច្ច ជនសង្ស័យ បានសារភាពថា ថ្នាំញៀនដែលខ្លួនយកមកជួញដូរនៅថ្ងៃកើតហេតុនេះ បានទិញពីឈ្មោះ លៀង ភេទប្រុស មានទូរស័ព្ទលេខ ០១៦២៦៥០៩២ ពុំស្គាល់ទីលំនៅ យកមកលក់បន្តក្នុងមួយកញ្ចប់តូចតម្លៃ ១០ដុល្លារ។
បច្ចុប្បន្នជនសង្ស័យកំពុងឃាត់ខ្លួន នៅអធិការដ្ឋាននគរបាលស្រុកពញាឮដើម្បីសាកសួរ និងចាត់ការតាមនីតិវិធី ៕
ចំនួនអ្នកទស្សនា
- ថ្ងៃនេះ7981
- ម្សិលមិញ10851
- សប្តាហ៍នេះ74501
- ខែនេះ189651
- ឆ្នាំនេះ189651
- សរុប20632107