បុរសម្នាក់ត្រូវសមត្ថកិច្ចឃាត់ខ្លួន ពាក់ព័ន្ធករណីគប់ម្តាយបែកក្បាល សម្រាកព្យាបាលនៅមន្ទីរពេទ្យ
18-December-2017 | ដោយ ពលមនសិការ
ពោធិ៍សាត់ ៖ ជនសង្ស័យឈ្មោះ កា វ៉ៃ ភេទប្រុស អាយុ១៩ឆ្នាំ រស់នៅភូមិក្រសាំងគ្រួ ឃុំបឹងខ្នារ ស្រុកបាកាន ខេត្តពោធិ៍សាត់ ត្រូវសមត្ថកិច្ចនគរបាលចាប់ឃាត់ខ្លួនមកកាន់ប៉ុស្តិ៍នគរបាលរដ្ឋបាលបឹងខ្នារ ដើម្បីសួរនាំពាក់ព័ន្ធករណី គប់ម្តាយបែកក្បាល កាលពីវេលាម៉ោង១៧ និង២០នាទី ល្ងាចថ្ងៃទី១៦ ខែធ្នូ ឆ្នាំ២០១៧ នៅចំណុចភូមិ.ឃុំរបស់ជនសង្ស័យរស់នៅ ។
តាមការរៀបរាប់របស់ជនរងគ្រោះ សុខ ថា ភេទស្រី អាយុ៦៩ឆ្នាំ ត្រូវជាម្តាយជនសង្ស័យបានរៀបរាប់ប្រាប់សមត្ថកិច្ចឲ្យដឹងថា មុនពេលកើតហេតុ ជនសង្ស័យឈ្មោះ កា វ៉ៃ ត្រូវជាកូន ផឹកស្រាជាមួយមិត្តភក្តិស្រវឹងជោគជាំ លុះត្រឡប់មកផ្ទះវិញក៏មកសុំលុយពីរូបគាត់ ខណៈដែលឃើញកូនស្រវឹងជោគជាំ ជនរងគ្រោះឆ្លើយថា គ្មានលុយទេ ជនសង្ស័យជាកូនក្រឡេកឃើញគ្រាប់ត្នោត នៅក្បែរខ្លួនក៏រើសគ្រាប់ត្នោតនោះ គប់សំដៅចំក្បាលគាត់ បណ្តាលឲ្យបែកក្បាលក្រោយពេលកើតហេតុ ក្រុមគ្រួសារបានបញ្ជូនទៅព្យាបាលនៅមន្ទីរពេទ្យបង្អែកបាកាន ។
លោកអនុសេនីយ៍ឯក ញៀន សាវឿន នាយប៉ុស្តិ៍នគរបាលរដ្ឋបាលបឹងខ្នា បានឲ្យដឹងថា ការចាប់ខ្លួនជនសង្ស័យឈ្មោះ កា វ៉ៃ គឺសមត្ថកិច្ចធ្វើឡើងបន្ទាប់ពីទទួលបានពាក្យបណ្តឹងពីក្រុមគ្រួសារជនរងគ្រោះ ហើយសមត្ថកិច្ចចុះដល់កន្លែងកើតហេតុ ឃាត់ខ្លួនជនសង្ស័យយកកាន់ប៉ុស្តិ៍នគរបាលរដ្ឋបាល ដើម្បីកសាងសំណុំរឿង ចាត់ការតាមច្បាប់ តែដោយការសុំអង្វរពីជនរងគ្រោះជាម្តាយ សមត្ថកិច្ចនគរបាលនៃអធិការដ្ឋាននគរបាលស្រុកបាកាន បានធ្វើការអប់រំជនសង្ស័យឲ្យបញ្ឈប់ប្រើហឹង្សាក្នុងគ្រួសារ នៅព្រឹកថ្ងៃទី១៨នេះ ហើយឲ្យត្រឡប់ទៅមើលថែម្តាយនៅមន្ទីរពេទ្យវិញ ៕
ចំនួនអ្នកទស្សនា
- ថ្ងៃនេះ7891
- ម្សិលមិញ10851
- សប្តាហ៍នេះ74411
- ខែនេះ189561
- ឆ្នាំនេះ189561
- សរុប20632017