ករណីឃាតកម្មទៅលើស្ត្រីដែលមានផ្ទៃពោះ៨ខែ សមត្ថកិច្ចកំពុង កំណត់មុខសញ្ញា
29-December-2017 | ដោយ ពលមនសិការ
បាត់ដំបង ៖ ជនសង្ស័យដែលជាឃាតករសម្លាប់ស្ត្រីមានផ្ទៃពោះ៨ខែ ព្រមទាំងបានវាយទៅលើកូនស្រីដែលមានអាយុ៣ឆ្នាំ បណ្តាលអោយរងរបួសយ៉ាងធ្ងន់ធ្ងរនោះបច្ចុប្បន្នសមត្ថកិច្ចកំណត់មុខសញ្ញាបានហើយ ហើយក៏កំពុងដុតដៃ ដុតជើងក្នុងការតាមរកចាប់ខ្លួនយកមកផ្តន្ទាទោសនៅចំពោះមុខច្បាប់ផងដែរ ។
គួរបញ្ជាក់ដែរថា នៅថ្ងៃទី ២៨ ខែធ្នូ ឆ្នាំ២០១៧ វេលាម៉ោង ២ និង ២០ នាទីរសៀលនៅចំណុចដងកក់ ភូមិរូងអំពិល ឃុំខ្នាចរមាស ស្រុកបវេលខេត្តបាត់ដំបង មានករណីឃាតកម្មមួយបានកើតឡើងបង្កដោយជនល្មើសមិនស្គាល់អត្តសញ្ញាណ បានធ្វើសកម្មភាពប្រើពូថៅកាប់ទៅលើជនរងគ្រោះឈ្មោះ ហួន រ៉ានី ភេទស្រី អាយុ៣០ឆ្នាំ ទីលំនៅភូមិសួនស្លា ឃុំក្តុលតាហែន ស្រុកបវេល ដែលបានមកស្នាក់នៅធ្វើស្រែចំការនៅភូមិឃុំខាងលើ ។
នៅពេលនោះដែរគឺស្វាមីរបស់ស្ត្រីរងគ្រោះបានចេញទៅលើផ្លែឪឡឹកនៅឯផ្សារ ដោយស្ត្រីរងគ្រោះ នៅជាមួយនឹងកូនស្រីអាយុ៣ឆ្នាំ ក៏ត្រូវបានជនមិនស្គាល់មុខប្រើប្រាស់ពូថៅកាប់ទៅលើស្ត្រីរូបនេះត្រង់ក្បាល ផ្នែកខាងក្រោយបណ្តាលអោយស្លាប់ និងវាយកូនស្រី អាយុ៣ឆ្នាំ បណ្តាលអោយរងរបួសធ្ងន់ រហូតដល់ថ្នាក់គ្រូពេទ្យនៅស្រុកបវេលមិនហ៊ានទទួល ព្រមទាំងបានបញ្ជូនបន្តទៅកាន់មន្ទីរពេទ្យបង្អែកខេត្តបាត់ដំបង ដើម្បីសង្គ្រោះ ដោយឡែកជនសង្ស័យរត់គេចខ្លួនបាត់។
ការស្លាប់របស់ស្ត្រីរងគ្រោះនេះ បើតាមការអះអាងពីក្រុមគ្រូពេទ្យគឺស្ត្រីរូបនេះមានផ្ទៃពោះចំនួន៨ខែ ដោយកូននេះភ្លោះផង ប៉ុន្តែក្រោយពេលដែលសមត្ថកិច្ចទាំងពីរអង្គភាពចុះទៅពិនិត្យជាក់ស្តែង គឺជនរងគ្រោះមានបាត់លុយកាក់ប្រមាណជាង២ម៉ឺនបាតដែលបញ្ហានេះសមត្ថកិច្ចជំនាញមិនទាន់ហ៊ានសន្និដ្ឋានបានទេថា ជាករណីប្លន់សម្លាប់ឬក៏ជាករណីឃាតកម្មនោះឡើយ ដោយគ្រាន់តែបច្ចុប្បន្នមុខសញ្ញាបានកំណត់រួចហើយនិងបាននាំខ្លួនមនុស្សម្នាក់មកសាកសួរជាបណ្តើរៗហើយដែរ ៕
ចំនួនអ្នកទស្សនា
- ថ្ងៃនេះ10001
- ម្សិលមិញ10851
- សប្តាហ៍នេះ76521
- ខែនេះ191671
- ឆ្នាំនេះ191671
- សរុប20634127