មន្ត្រីនគរបាលម្នាក់ជិះម៉ូតូបុកគូទរថយន្តស្លាប់យ៉ាងអាណោចអាធ័ម
29-December-2017 | ដោយ ពលមនសិការ
បាត់ដំបង ៖ មន្ត្រីនគរបាលមួយរូប ដែលបម្រើការនៅក្នុងអធិការដ្ឋាន នគរបាលស្រុកមោងឫស្សី បានស្លាប់យ៉ាងអាណោចអាធ័មជាទីបំផុត នៅក្នុងថ្លុកឈាមខណៈដែលនគរបាលរូបនោះបានបើកបរម៉ូតូទាំងយប់ហើយទៅបុកនឹងគូទរថយន្តដែលកំពុងចតនៅលើទ្រូងផ្លូវដើម្បីដឹកស្រូវ ។
ហេតុការណ៍នេះបានកើតឡើង នៅវេលាម៉ោង ៩ និង ៤០នាទីយប់ថ្ងៃទី២៨ ខែធ្នូ ឆ្នាំ២០១៧ លើកំណាត់ផ្លូវជាតិលេខ៥ត្រង់ ចំនុចក្រុមទី៥ ភូមិអំពិលឈូង ឃុំឫស្សីក្រាំង ស្រុកមោងឫស្សី ខេត្តបាត់ដំបង រវាងម៉ូតូម៉ាកស៊ុយស៊ូគីវីវ៉ា ពណ៌ខ្មៅ សេរី២០១១ ពាក់ស្លាកលេខ បាត់ដំបង1K-4726 ជាមួយនឹងរថយន្ត ម៉ាកហ៊ីយ៉ាន់ដាយ ពណ៌ស ពាក់ស្លាកលេខ តាកែវ 3A-0422 ក្នុងទិសដៅស្របគ្នាពីភ្នំពេញ ទៅបាត់ដំបង ។
យោងតាមប្រភពមួយចំនួនបានអោយដឹងថា នៅមុនពេលកើតហេតុគេឃើញរថយន្តខាងលើ បានបើកមកឈប់សំចតដើម្បីលើកស្រូវឡើង គឺរហូតដល់យប់ជ្រៅក៏ស្រាប់តែមានម៉ូតូមួយគ្រឿង ដែលបើកបរដោយឈ្មោះ មិល ផាន់ណារ៉ា ភេទប្រុស អាយុ២៧ឆ្នាំជាមន្ត្រីនគរបាលស្រុកមឫស្សី ផ្នែកអត្តសញ្ញាណប័ណ្ណ មានទីលំនៅ ភូមិប្រឡាយស្តៅ ឃុំតាលាស់ ស្រុកមោងឫស្សី ខេត្តបាត់ដំបង បានបើកម៉ូតូយ៉ាងលឿនទៅបុកនឹងគូទរថយន្តពីក្រោយ បណ្តាលអោយស្លាប់នៅនឹងកន្លែងតែម្តង។
តាមការពិនិត្យជាក់ស្តែងគឺ គេអាចសន្និដ្ឋានបានថា ភាគីម៉ូតូទំនងចេញពីស៊ីការហើយមានសភាពស្រវឹងផងបានជាបើកបរខ្វះការប្រុងប្រយ័ត្ន ទៅបុកនឹងរថយន្តពីក្រោយបែបនេះដោយឡែករថយន្តដែលចតនៅលើទ្រូងផ្លូវដោយមិនបានដាក់សញ្ញាអ្វីជាសម្គាល់ក៏ស្ថិតក្នុងការខុសផងដែរដោយបច្ចុប្បន្នរថយន្ត និងម៉ូតូ ត្រូវបានសមត្ថកិច្ចនាំយកទៅរក្សាទុកនៅអធិការដ្ឋាន ដោយសារតែអ្នកបើកបររថយន្តបានរត់គេចខ្លួនបាត់ទៅហើយចំណែកសពក៏ត្រូវបានប្រគល់ទៅអោយក្រុមគ្រួសារដើម្បីយកទៅធ្វើបុណ្យតាមប្រពៃណីផងដែរ ៕
ចំនួនអ្នកទស្សនា
- ថ្ងៃនេះ3601
- ម្សិលមិញ5511
- សប្តាហ៍នេះ37301
- ខែនេះ99731
- ឆ្នាំនេះ701911
- សរុប21144367