ស្រី្តម្នាក់ត្រូវបានគ្រួសារប្រទះឃើញស្លាប់ នៅស្រុកអង្គស្នួល សង្ស័យករណីឃាតកម្ម
13-January-2018 | ដោយ ពលមនសិការ
កណ្ដាល ៖ ស្ដ្រីចំណាស់ម្នាក់បានចេញទៅផ្លាស់គោ មិនឃើញត្រឡប់មកវិញ ផ្អើលដល់ក្រុមគ្រួសារដើរស្វែងរកស្រាប់តែឃើញដេកស្លាប់ដោយក្រមារិតក ដោយសង្ស័យថាជាករណីឃាតកម្ម។
ករណីនេះបង្កឲ្យមានការភ្ញាក់ផ្អើលឡើង កាលពីថ្ងៃទី១២ ខែមករា ឆ្នាំ២០១៨ វេលាម៉ោង៧និង០៥នាទី ត្រង់ចំណុចត្រពាំងពង្រ ស្ថិតនៅភូមិគោល ឃុំទួលព្រេជ ស្រុកអង្គស្នួល ខេត្តកណ្ដាល។
មន្ដ្រីនគរបាលស្រុកអង្គស្នួលបានឲ្យដឹង ស្ដ្រីរងគ្រោះឈ្មោះ ឃួន ខឿន អាយុ៦៧ឆ្នាំ មុខរបរកសិករ មានទីលំនៅក្នុងភូមិគោល ឃុំទួលព្រិច ស្រុកអង្គស្នួល ខេត្តកណ្ដាល។ ស្ត្រីរូបនេះមានប្ដីឈ្មោះសន ស៊ុយ អាយុ៧៣ឆ្នាំ ។
ប្រភពដដែលបន្តថា តាមការបំភ្លឺរបស់ក្រុមគ្រួសារស្ដ្រីរងគ្រោះបានឲ្យដឹងថា នៅមុនពេលកើតហេតុវេលាព្រឹកថ្ងៃទី១១ ខែមករា ឆ្នាំ២០១៨ ស្ត្រីរងគ្រោះបានទៅចូលរួមក្នុងកម្មវិធីបុណ្យសង្ឃទាន ផ្ទះអ្នកជិតខាងដោយមានពាក់គ្រឿងអលង្ការ និងដាក់លុយចំនួន៥០០ដុល្លារ ជាប់ខ្លួនផងដែរ។ ក្រោយមកនៅវេលាម៉ោងប្រហែល២រសៀល ប្ដីរបស់ស្ត្រីរងគ្រោះបានជិះម៉ូតឌុបកូនស្រីម្នាក់ ហើយបានដួលម៉ូតូ បណ្ដាលឲ្យរងរបួសយ៉ាងដំណំ។ ខណៈនោះស្ត្រីរងគ្រោះបានដាំទឹកក្ដៅស្អំរបួសឲ្យប្ដីគាត់រួចរាល់ រហូតមកដល់វេលាម៉ោង៣រសៀលថ្ងៃដដែល ទើបគាត់ចាកចេញពីផ្ទះទៅផ្លាស់គោ ហើយក៏ស្រាប់តែបាត់រហូតមិនឃើញត្រឡប់មកផ្ទះវិញឡើយ។ ចំណែកឯក្រុមគ្រួសារមានការងឿងឆ្ងល់បាត់យូទៅៗមិនឃើញត្រឡប់មកវិញ រហូតដល់វេលាម៉ោង៤និង៣០នាទីល្ងាច ក៏បាននាំគ្នាតាមរកគ្រប់ទីកន្លែងរហូតដល់ជិតភ្លឺ ប៉ុន្តែនៅតែរកមិនឃើញ រួចក៏ឈប់សម្រាកសិន។ លុះដល់ព្រឹកឡើងថ្ងៃទី១២ ខែមករា បានបន្ដដើររកតទៅទៀត ក៏បានប្រទះឃើញសាកសពស្ដ្រីរងគ្រោះដេកស្លាប់នៅក្នុងព្រៃលើដីទួលមាត់ត្រពាំងពង្រនោះដោយក្រមារិតក ទើបមានការភ្ញាក់ផ្អើលដល់ពលរដ្ឋជិតខាងនិងរាយការណ៍ជូនសមត្ថកិច្ចមកធ្វើការពិនិត្យ ។
ប្រភពពីសមត្ថកិច្ចបានឲ្យដឹងថា ក្រោយពីទទួលបានព័ត៌មាន ភ្លាមនោះសមត្ថកិច្ចបច្ចេកទេសនិងវិទ្យាសាស្ត្រខេត្តបានចុះ មកដល់កន្លែងកើតហេតុ រួចពិនិត្យសព ដោយមានការចូលរួមពី កម្លាំងជំនាញនគរបាលស្រុក លោកក្រុមប្រឹក្សាឃុំ គ្រូពេទ្យ មេភូមិ នគរបាលប៉ុស្តិ៍ ផងដែរ រួចបានបញ្ចាក់ថា ស្ដ្រីរងគ្រោះពិតជាស្លាប់ដោយសារករណីឃាតកម្ម ដោយការរឹតកនឹងក្រមាបណ្តាលឲ្យស្លាប់។
តាមការរៀបរាប់របស់ក្រុមគ្រួសារសាច់ញាតិបានឲ្យដឹងទៀតថា ក្រោយពីត្រឡប់មកពីបុណ្យសង្ឃទានវិញ ស្ត្រីរងគ្រោះបានដោះគ្រឿងអលង្ការ រួមជាមួយលុយទុកនៅទូក្នុងផ្ទះអស់ហើយ ទើបចេញពីផ្ទះទៅផ្លាស់គោ ដោយនៅសល់តែចិញ្ចៀនចំរៀកផ្ដៅពាក់ជាប់ដៃ១វង់ប៉ុណ្ណោះ ហើយនៅពេលប្រទះឃើញសាកសពចិញ្ចៀននេះក៏បានបាត់មិនឃើញនៅជាប់និងខ្លួនស្ដ្រីរងគ្រោះដែរ ដែលសង្ស័យឃាតកដោះយកក្រោយពេលសម្លាប់គាត់រួច ។
ករណីខាងលើនេះ ត្រូវបានសមត្ថកិច្ចកំពុងកសាងសំណុំរឿងធ្វើការស្រាវជ្រាវរកមុខឃាតកដើម្បីយកមកផ្តន្ទាទោសចាត់ការតាមនីតិវិធីច្បាប់ ។ ចំពោះសាកសពត្រូវបានសមត្ថកិច្ចប្រគល់ទៅឲ្យក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
ចំនួនអ្នកទស្សនា
- ថ្ងៃនេះ941
- ម្សិលមិញ12921
- សប្តាហ៍នេះ941
- ខែនេះ195541
- ឆ្នាំនេះ195541
- សរុប20637997