បុរសម្នាក់ទៅធ្វើស្មៅដំឡូងមី ត្រូវជ្រូកព្រៃដេញខ្វេះរបួសធ្ងន់
15-January-2018 | ដោយ ពលមនសិការ
ពោធិ៍សាត់ ៖ បុរសវ័យ៧១ឆ្នាំម្នាក់ ទៅធ្វើស្មៅនៅចំការដំឡូងមី ត្រូវជ្រូកព្រៃដេញខ្វេះ បណ្តាលឲ្យរងរបួសយ៉ាងដំណំ ករណីនេះកើតឡើងនៅចំណុចអូររំចេក ស្ថិតក្នុងភូមិ សំឡាញ ឃុំក្រពើពីរ ស្រុកវាលវែង ខេត្តពោធិ៍សាត់ កាលពីវេលាម៉ោង០៨និង៣០នាទីព្រឹកថ្ងៃទី១៤ ខែមករា ឆ្នាំ២០១៨។
តាមការរៀបរាប់របស់ជនរងគ្រោះឈ្មោះ ប្រាក់ អាន ភេទប្រុស អាយុ៧១ឆ្នាំ រស់នៅភូមិ-ឃុំកើតហេតុខាងលើ បានប្រាប់សមត្ថកិច្ចឲ្យដឹងថា នៅថ្ងៃព្រឹកកើតហេតុ គាត់បានយកប្រដាប់ប្រដាសម្រាប់ធ្វើស្មៅ ទៅចំការ ក្នុងគោលបំណងជម្រះស្មៅក្នុងចំការដំឡូងមី លុះធ្វើបានមួយសន្ទុះ ស្រាប់តែប្រទះឃើញសត្វជ្រូកព្រៃមួយក្បាល កំពុងគាស់មើមដំឡូងមីស៊ី លុះវាឃើញរូបគាត់ ជ្រូកព្រៃនោះក៏ដេញគាត់ រត់ពេញចំការ តែសំណាងអាក្រក់គាត់បានរត់ទៅទាក់និងវល្លិ៍ដួល ទើបត្រូវជ្រូកព្រៃខ្វេះត្រូវត្រគៀកខាងឆ្វេងមួយកន្លែង ក្បាលមួយកន្លែង ដៃឆ្វេងមួយកន្លែង និងត្រូកំភួនជើងឆ្វេងមួយកន្លែង បណ្តាលដេកដួលរងរបួសយ៉ាងធ្ងន់ធ្ងរ។ បច្ចុប្បន្នជនរងគ្រោះ កំពុងសម្រាកព្យាបាលនៅមន្ទីរពេទ្យបង្អែកស្រុកវាលវែង ៕
ចំនួនអ្នកទស្សនា
- ថ្ងៃនេះ4721
- ម្សិលមិញ7231
- សប្តាហ៍នេះ32901
- ខែនេះ95331
- ឆ្នាំនេះ697511
- សរុប21139967