នគរបាលខណ្ឌពោធិ៍សែនជ័យឃាត់ខ្លួនជនសង្ស័យ៣នាក់ពាក់ព័ន្ធគ្រឿងញៀន
15-January-2018 | ដោយ ពលមនសិការ
ភ្នំពេញ ៖ កម្លាំងនគរបាលខណ្ឌពោធិ៍សែនជ័យបានឃាត់ខ្លួនជនសង្ស័យ ៣នាក់ពាក់ព័ន្ធករណីការប្រើប្រាស់គ្រឿងញៀន។ ការឃាត់ខ្លួនជនសង្ស័យខាងលើបានធ្វើឡើងកាលពីថ្ងៃទី១៤ ខែមករា ឆ្នាំ២០១៨ វេលាម៉ោង២១និង៣០នាទីនៅចំណុចមុខផ្សារស៊ិនជូរី ផ្លូវសហព័ន្ធរុស្សី ស្ថិតក្នុងភូមិតាងួន សង្កាត់កាកាបទី១ ខណ្ឌពោធិ៍សែនជ័យ រាជធានីភ្នំពេញ។
លោកវរសេនីយ៍ឯក យឹម សារ៉ាន់ អធិការខណ្ឌបានឲ្យដឹងថាជនសង្ស័យទាំង៣នាក់រួមមានទី១-ឈ្មោះ សុន មួយហៀង ភេទប្រុស អាយុ២៤ឆ្នាំ មុខរបរ កម្មករសំណង់ ជនជាតិខ្មែរ មានទីលំនៅភូមិឫស្សី ឃុំព្រះនិពាន្ធ ស្រុកគងពិសី ខេត្តកំពង់ស្ពឺ ជាអ្នកប្រើប្រាស់គ្រឿងញៀន, ទី២-ឈ្មោះ ផុន រ៉ាឌី ភេទប្រុស អាយុ២២ឆ្នាំ មុខរបរនៅផ្ទះ ជនជាតិខ្មែរ មានទីលំនៅភូមិថ្មី ឃុំថ្មី ស្រុកកណ្តាលស្ទឹង ខេត្តកណ្តាល ជាអ្នកប្រើប្រាស់គ្រឿងញៀន និងទី៣-ឈ្មោះ រឿន ធារ៉ា ភេទប្រុស អាយុ២៧ឆ្នាំ មុខរបរកម្មកររោងចក្រ ជនជាតិខ្មែរ មានទីលំនៅភូមិថ្មី ឃុំថ្មី ស្រុកកណ្តាលស្ទឹង ខេត្តកណ្តាល ជាអ្នកប្រើប្រាស់គ្រឿងញៀន។
ក្នុងការឃាត់ខ្លួនជនសង្ស័យខាងលើសមត្ថកិច្ចបានដកហូតវត្ថុតាងរួមមានៈ ក្រាមពណ៌សថ្លា ចំនួន១កញ្ចប់ថង់សង្ស័យមានតម្រុយជាគ្រឿងញៀន ប្រភេទមេតំហ្វេតាមីនរបស់ឈ្មោះ សុន មួយហៀង, ម៉ូតូចំនួន២គ្រឿង ម៉ាក SUZUKI NEX ពណ៌ស ពាក់ស្លាកលេខភ្នំពេញ 1CH-6836មួយគ្រឿង និងម៉ាកហុងដា សេ១២៥ ពណ៌ខ្មៅ ពាក់ស្លាកលេខភ្នំពេញ 1CX-7531។
លោកអធិការបន្តថាមុនពេលឃាត់ខ្លួនជនសង្ស័យខាងលើ កម្លាំងចម្រុះដែលដឹកនាំដោយលោកអភិបាលរង សេង គន្ធ នៃសាលាខណ្ឌពោធិ៍សែនជ័យបានចុះប្រតិបត្តិការត្រួតពិនិត្យអាវុធជាតិផ្ទុះ និងពង្រឹងច្បាប់ចរាចរណ៍នៅចំណុចមុខផ្សារស៊ិនជូរី ផ្លូវសហព័ន្ធរុស្សី ភូមិតាងួន សង្កាត់កាកាបទី១ ខណ្ឌពោធិ៍សែនជ័យ ដោយពេលនោះកម្លាំងសមត្ថកិច្ចនគរបាលយើងបានត្រួតពិនិត្យនិងឆែកឆេរ លើម៉ូតូចំនួន២គ្រឿង ដោយមានការសង្ស័យទើបកម្លាំងសមត្ថកិច្ចនគរបាលយើង បានហៅជនសង្ស័យឲ្យឈប់រួចធ្វើការឆែកឆេរ និងត្រួតពិនិត្យលើខ្លួនប្រាណារបស់ជនសង្ស័យ រកឃើញវត្ថុតាងខាងលើ។ បន្ទាប់មកទើបកម្លាំងសមត្ថកិច្ចបាននាំខ្លួនជនសង្ស័យទាំង៣នាក់រួមនឹងវត្ថុតាងយកមកសួរនាំងនៅផ្នែកប្រឆាំងគ្រឿងញៀន នៃអធិការដ្ឋាននគរបាលខណ្ឌពោធិ៍សែនជ័យ ដើម្បីធ្វើការសាកសួរនិងធ្វើតេស្តទឹកនោម។
ក្រោយការសាកសួរនិងធ្វើតេស្តទឹកនោម របស់ជនសង្ស័យទាំង៣នាក់ ជាលទ្ធផលបានបង្ហាញថាគឺមានភាពវិជ្ជមាន។
បច្ចុប្បន្នជនសង្ស័យរួមនឹងវត្ថុតាងត្រូវបានកម្លាំងជំនាញកំពុងកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ5111
- ម្សិលមិញ7231
- សប្តាហ៍នេះ33291
- ខែនេះ95721
- ឆ្នាំនេះ697901
- សរុប21140357