បុរសម្នាក់ត្រូវបានសមត្ថកិច្ចធ្វើការចាប់ខ្លួនពាក់ព័ន្ធករណី ប៉ុនប៉ងប្លន់នៅស្រុកស្អាង
15-January-2018 | ដោយ ពលមនសិការ
កណ្ដាល ៖ នគរបាលស្រុកស្អាងអនុវត្ដន៍ដីការបស់សាលាដំបូងខេត្ដកណ្ដាលធ្វើការចាប់ខ្លួនជនសង្ស័យម្នាក់ពីបទប៉ុនប៉ងប្លន់។ ប្រតិបត្ដិការចាប់ខ្លួនខាងលើនេះធ្វើឡើងនៅវេលាម៉ោង១០និង៥៥នាទី ថ្ងៃទី១៥ ខែមករា ឆ្នាំ២០១៨ ស្ថិតក្នុងភូមិចុងកោះគរ ឃុំស្វាយប្រទាល ស្រុកស្អាង ខេត្តកណ្ដាល ។
លោកវរសេនីយ៍ឯក សេង សុជាតិ អធិការនគរបាលស្រុកស្អាងបានឲ្យដឹងថា ជនត្រូវចោទចាប់ខ្លួនបានមានឈ្មោះ អ៊ុយ វិចិត្ត ភេទប្រុស អាយុ៣០ឆ្នាំ ជនជាតិខ្មែរ មុខរបរ កសិករ មានទីលំនៅភូមិចុងកោះគរ ឃុំស្វាយប្រទាល ស្រុកស្អាង ខេត្តកណ្ដាល។ ជននេះមានដីកាបង្គាប់ឲ្យចាប់ខ្លួនលេខ៥៥០ ដកបចខ ចុះថ្ងៃទី១៨ ខែកញ្ញា ឆ្នាំ២០១២ ចុះហត្ថលេខដោយលោក អិន វ៉ានវិបុល ចៅក្រមស៊ើបសួរនៃសាលាដំបូងខេត្តកណ្ដាល ចោទប្រកាន់ពីបទប៉ុនប៉ងប្លន់ ដែលប្រព្រឹត្ដិកាលពីថ្ងៃទី៣០ ខែធ្នូ ឆ្នាំ២០០៩ នៅត្រង់ចំណុចភូមិបារ៉េនលើ ឃុំស្វាយប្រទាល ស្រុកស្អាង ខេត្តកណ្តាល ។
លោកអធិការបន្ដថា ក្រោយពីជនត្រូវចោទខាងលើនេះបានធ្វើសកម្មភាពប្លន់តែពុំបានសម្រេចរួចហើយ ជននេះបានរត់គេចខ្លួនចេញពីមូលដ្ឋានអស់រយៈពេលជាច្រើនឆ្នាំ ដោយពុំដឹងថាទៅរស់នៅឯខេត្ដណានោះទេ ទើបចៅក្រមសម្រេចចេញដីកាបង្គាប់ឲ្យសមត្ថកិច្ចស្វែងរកចាប់ខ្លួនដើម្បីយកមកដាក់ពន្ធនាគារបណ្ដោះអាសន្នរងចាំការកាត់ទោស។ លុះមកដល់ថ្ងៃទី១៥ ខែមករា ឆ្នាំ២០១៨ លោកបានទទួលព័ត៌មានថា ជនសង្ស័យកំពុងរស់នៅក្នុងមូលដ្ឋានខាងលើ ភ្លាមនោះលោកក៏បានបញ្ជាឲ្យមន្ដ្រីក្រោមឱវាទចុះធ្វើការឃាត់ខ្លួនជនត្រូវចោទខាងលើនេះដោយអនុវត្ដន៍ដីកាបង្គាប់ឲ្យចាប់ខ្លួនរបស់សាលាដំបូងខេត្ដ យកមកអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធីច្បាប់ ៕
ចំនួនអ្នកទស្សនា
- ថ្ងៃនេះ2131
- ម្សិលមិញ5781
- សប្តាហ៍នេះ7921
- ខែនេះ202521
- ឆ្នាំនេះ202521
- សរុប20644977